ក្រសួងអប់រំ យុវជន និងកីឡា សហការជាមួយ កាយរឹទ្ធិជាតិកម្ពុជា បានប្រកាស​ពី​ការរៀបចំការប្រកួតរូបថតកាយរឹទ្ធិ ថ្នាក់ជាតិ លើកទី៣ ដោយ​ឆ្នាំនេះ​នឹងធ្វើ​ឡើង ក្រោមប្រធានបទ “ការអប់រំកាយរឹទ្ធិកម្មគាំទ្រសាលារៀនគំរូ”។

លោក ឯម ពិសិដ្ឋ ប្រធានលេខាធិការដ្ឋាន នៃកាយរឹទ្ធកម្ពុជា មានប្រសាសន៍ថា ការរៀបចំការប្រកួតរូបថតកាយរឹទ្ធិថា្នក់ជាតិនេះ ធ្វើឡើងដើម្បីជំរុញ និងលើកទឹកចិត្តយុវជនឱ្យ​ចូលរួមកម្មវិធីបណ្តុះបណ្ដាលការថតរូបអាជីព ព្រមទាំងផ្តល់ឱកាសដល់យុវជនចូលរួមបង្ហាញស្នាដៃថតរូបអាជីពនៅក្នុងព្រឹត្តិការណ៍ប្រកួតរូបថតកាយរឹទ្ធិអន្តរជាតិនៅថ្នាក់តំបន់ និងពិភពលោក។

លោក ឯម ពិសិដ្ឋ បញ្ជាក់ថា កម្មវិធីនេះ ក៏ជួយឱ្យយុវជនយល់ដឹងពីការប្រើរូបថតវិជ្ជមាននៅក្នុងបណ្ដាញសង្គម​ ជាពិសេសឱ្យយុវជនយល់ច្បាស់ពីសិទ្ធិបុគ្គល ការពារកម្មសិទ្ធិបញ្ញា និងប្រើប្រាស់រូបភាពប្រកបដោយគុណភាព និងការទទួលខុសត្រូវក្នុងសង្គមផងដែរ។

ប្រធានលេខាធិការដ្ឋាននៃកាយរឹទ្ធកម្ពុជា បន្ថែមថា ប្អូនៗដែលចូលរួមក្នុងកម្មវិធីនេះ នឹងទទួលបានឱកាសចូលរួមប្រកួតនៅក្រៅប្រទេសកម្រិតថ្នាក់អាស៊ីប៉ាស៊ីហ្វិក រៀបចំដោយអង្គការចលនាកាយរឹទ្ធពិភពលោក ដែលមាន៤០ប្រទេសចូលរួម ដើម្បីអាចកសាងទំនាក់ទំនង និងបង្កើនកិត្យានុភាពជាតិរបស់កម្ពុជាលើឆាកអន្តរជតិ។ ក្នុងនាមអ្នករៀបចំកម្មវិធី លោក ឯម ពិសិដ្ឋ ក៏លើកទឹកចិត្តឱ្យប្អូនៗយុវជន ចូលរួមប្រកួតកម្មវិធីនេះ ព្រោះផ្ដល់ឱកាសរៀនពីរបៀបថតរូបបែបអាជីព ការប្រើប្រាស់កាម៉េរាទូរស័ព្ទដៃថតរូបប្រកបដោយវិជ្ជាជីវៈ ព្រមទាំងឱកាសបង្ហាញទេពកោសល្យលើបណ្ដាញសង្គម។

សម្រាប់បេក្ខជនដែលមានបំណងចូលរួមប្រកួតរូបថតកាយរឹទ្ធិ ត្រូវមានលក្ខខណ្ឌវិនិច្ឆ័យ រួមមាន ជាសមាជិកកាយរឹទ្ធិជាតិកម្ពុជា ដែលមានអាយុចាប់ពី ១៥ឆ្នាំ ដល់ ២៥ឆ្នាំ, មានឆន្ទៈ គំនិតផ្តួចផ្តើម ការច្នៃប្រឌិត និងចំណង់ចំណូលចិត្តថតរូប, មានទំនាក់ទំនងល្អ និងស្មារតីជាក្រុម និងមានចំណេះដឹងភាសាអង់គ្លេសអាចប្រើប្រាស់បាន។

សម្រាប់ការប្រកួតជម្រុះជុំទី១ បេក្ខជនត្រូវចុះឈ្មោះតាមរយៈអនឡាញតាមតំណភ្ជាប់(Google Form) https://forms.gle/4JDZZqpZGjoTrbw59 ។ បេក្ខជនត្រូវភ្ជាប់រូបថតចំនួន៣សន្លឹក និងខ្លឹមសារឆ្លើយតបទៅនឹងប្រធានបទ ហើយគណៈកម្មការរបស់នាយកដ្ឋានសហប្រតិបត្តិការកាយរឹទ្ធិជ្រើសរើសយក ៥០នាក់។ សិក្ខាកាម ៥០នាក់ ដែលបានជាប់ជម្រុះជុំទី១ ត្រូវចូលរួមវគ្គបណ្ដុះបណ្តាលមានរយៈពេល២ថ្ងៃ នៅរាជធានីភ្នំពេញ ដោយគ្រូឧទ្ទេសចំនួន៣នាក់ ដែលមានជំនាញបច្ចេកទេសថតរូបអាជីព។

សម្រាប់ការប្រកួតជម្រុះជុំទី២ បេក្ខជនដែលទទួលបានការបណ្ដុះបណ្តាលចំនួន៥០នាក់ ត្រូវថតរូបចំនួន៥សន្លឹក ដោយភា្ជប់នឹងខ្លឹមសារឆ្លើយតបនឹងប្រធានបទ ដើម្បីផ្ញើមកគណៈកម្មការវាយតម្លៃ។ គណៈកម្មការវាយតម្លៃមានសមាសភាព ៣នាក់ជាអ្នកជំនាញថតរូបអាជីពមកពីស្ថាប័ន ឬអង្គភាពព័ត៌មាន។ គណៈកម្មការវាយតម្លៃជ្រើសរើសយកបេក្ខជនចំនួន១០នាក់ ដើម្បីចូលរួមវគ្គផ្ដាច់ព្រ័ត្រ។

មកដល់ការប្រកួតផ្តាច់ព្រ័ត្រ បេក្ខជនទាំង១០នាក់ ត្រូវរៀបចំរូបថត៥សន្លឹក និងបទបង្ហាញរយៈពេល៥នាទី។ គណៈកម្មការផ្តល់យោបល់ដល់បេក្ខជនទាំង១០នាក់ និងបូកសរុបពិន្ទុ ដោយប្រកាសលទ្ធផលជ័យលាភីលេខ១ លេខ២ និងលេខ៣។

ការទទួលពាក្យចាប់ពីថ្ងៃជូនដំណឹងនេះរហូតដល់ថ្ងៃទី២៣ ខែឧសភា ឆ្នាំ២០២៥ វេលាម៉ោង ១៧.០០នាទី។ ចំពោះព័ត៌មានលម្អិត បេក្ខជនអាចទាក់ទងតាមរយៈ លេខទូរស័ព្ទ និងប្រព័ន្ធតេឡេក្រាម ០៧០ ៦៤០ ០៥២/០១៧ ៦៤០ ០៥២ រៀងរាល់ម៉ោងធ្វើការ៕