ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទំហំកាន់តែធំនៃការចូលប្រើបណ្ដាញឌីជីថល ត្រូវបានអ្នកជំនាញកំណត់ថា ជាមូលហេតុ នាំឱ្យមានការផ្លាស់ប្ដូររបៀបធ្វើការជាច្រើន គ្រប់ឧស្សាហកម្ម។ ៦០ភាគរយ នៃនិយោជក រំពឹងថា ការប្រើបណ្ដាញឌីជីថល នឹងកំណត់របៀប ដែលពួកគេធ្វើអាជីវកម្មឡើងវិញនៅឆ្នាំ២០៣០, នេះបើយោងតាមរបាយការណ៍អនាគតការងារ ឆ្នាំ២០២៥ ដែលចេញផ្សាយដោយវេទិកាសេដ្ឋកិច្ចពិភពលោក។
ភាពជឿនលឿននៃបច្ចេកវិទ្យាសំខាន់ៗ រួមមាន បញ្ញាសិប្បនិម្មិត (AI) និងការដំណើរការព័ត៌មាន (៨៦%), បច្ចេកវិទ្យាមនុស្សយន្ត និងស្វ័យប្រវត្តិកម្ម (៥៨%) និងការបំប្លែង ផ្ទុក និងចែកចាយថាមពល (៤១%) គឺជាការត្រៀម ដើម្បីជំរុញការផ្លាស់ប្ដូរយ៉ាងសំខាន់នាពេលអនាគត។
ក្នុងការផ្លាស់ប្ដូរនេះ អ្នកជំនាញបច្ចេកវិទ្យា គឺមានតម្រូវការខ្ពស់ នៅគ្រប់វិស័យការងារ ដែលជំនាញទាំងនោះរួមមាន បញ្ញាសិប្បនិម្មិត (AI) និងទិន្នន័យធំ (Big data), បណ្ដាញ និងសន្តិសុខសាយប័រ និងអក្ខរកម្មបច្ចេកវិទ្យា។
ការវិវត្តន៍នេះ បានបង្ហាញថា តម្រូវការជំនាញ ដែលជាសមត្ថភាពពិសេសរបស់មនុស្ស ក៏មានខ្ពស់ និងមាននិរន្តរភាពផងដែរ ដែលជំនាញទាំងនោះមានដូចជា សមត្ថភាពច្នៃប្រឌិត ការគិតស៊ីជម្រៅ និងពិស្ដារ និងសមត្ថភាពសម្របខ្លួន។ ជំនាញទាំងនេះ ជាជំនាញបំពេញបន្ថែមលើជំនាញបច្ចេកទេស ដែលធ្វើឱ្យបុគ្គលិក មានការរីកចម្រើនក្នុងបរិយាកាសការងារ ដែលមានសម្ពាធ និងរួមចំណែកយ៉ាងសកម្មក្នុងការបង្កើតថ្មី និងការអភិវឌ្ឍ។
ស្ថាប័នដែលផ្ដល់អាទិភាពដល់ការបណ្ដុះបណ្ដាលជំនាញថ្មីដល់បុគ្គលិក ក្នុងយុទ្ធសាស្ត្ររបស់ខ្លួន, គាំទ្រដោយភាពជាអ្នកដឹកនាំ និងវប្បធម៌នៃការរៀនសូត្រពេញមួយជីវិត គឺមានលទ្ធភាពខ្ពស់ ក្នុងការដោះស្រាយបញ្ហាប្រឈមសំខាន់ៗ និងអាចចាប់ឱកាសបានច្រើន ក្នុងលក្ខខណ្ឌសេដ្ឋកិច្ចនាពេលអនាគត។
តាមរយៈការជំរុញឱ្យមានការរួមបញ្ចូលគ្នា ប្រកបដោយតុល្យភាពនៃសមត្ថភាពបច្ចេកទេស និងធនធានមនុស្សមានសមត្ថភាពខ្ពស់, អាជីវកម្ម និងបុគ្គលម្នាក់ៗ អាចដើរតួនាទីយ៉ាងសំខាន់ ក្នុងការបង្កើតអនាគត ប្រកបដោយបរិយាប័ន្ន និរន្តរភាព និងវិបុលភាពសម្រាប់ទាំងអស់គ្នា។
ដោយមើលឃើញពីសារៈសំខាន់ នៃការពង្រឹងជំនាញសម្រាប់បុគ្គលិក និងការរៀនជំនាញថ្មី វេទិកាសេដ្ឋកិច្ចពិភពលោក (WE Forum) បានរកឃើញថា មាននិយោជក ៨៥ភាគរយ គ្រោងនឹងបណ្ដុះបណ្ដាលជំនាញថ្មីដល់បុគ្គលិក (Reskill) របស់ខ្លួន ដើម្បីអភិវឌ្ឍកម្លាំងពលកម្មឱ្យកាន់តែមានប្រសិទ្ធភាព ដើម្បីកាត់បន្ថយគម្លាតជំនាញ និងផ្ដល់អត្ថប្រយោជន៍ទាំងសម្រាប់ក្រុមហ៊ុន និងបុគ្គលិក៕
