ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៦ កាន់តែខិតជិតមកដល់ បេក្ខជនទូទាំងប្រទេសកំពុងត្រៀមខ្លួនយ៉ាងយកចិត្តទុកដាក់ ដោយមានទាំងការរំភើប ភ័យបារម្ភ និងក្តីសង្ឃឹម បន្ទាប់ពីបានខិតខំសិក្សាអស់រយៈពេល ១២ឆ្នាំ។ ក្នុងចំណោមនោះ បេក្ខជនអប់រំពិសេសដែលមានពិការភាពផ្នែកភ្នែក និងគថ្លង់ ក៏បានត្រៀមខ្លួនរួចជាស្រេចដើម្បីចូលរួមប្រឡង ដោយបង្ហាញពីការតស៊ូ និងមិនបោះបង់ការសិក្សារបស់ខ្លួន។
លោក ម៉ៅ ផាត នាយកវិទ្យាល័យអប់រំពិសេសភ្នំពេញថ្មី បានប្រាប់ AMS ថា ឆ្នាំនេះមានបេក្ខជនអប់រំពិសេសសរុប ៤៧នាក់ ចូលរួមប្រឡងបាក់ឌុប ក្នុងនោះមានសិស្ស ២១នាក់ មកពីវិទ្យាល័យអប់រំពិសេសភ្នំពេញថ្មី។
លោកបានឱ្យដឹងថា បេក្ខជនពិការភ្នែក នឹងប្រឡងនៅមណ្ឌលសាលាបឋមសិក្សាភ្នំពេញថ្មី ខណៈបេក្ខជនគថ្លង់ នឹងប្រឡងនៅមណ្ឌលសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE)។
សិស្សធម្មតាក៏មានអារម្មណ៍ភ័យ និងអន្ទះសារចំពោះការប្រឡងដែរ ចុះទម្រាំសិស្សពិការភ្នែក និងគថ្លង់ តើពួកគេមានអារម្មណ៍យ៉ាងណា? ប៉ុន្តែទោះជាយ៉ាងណា ពួកគេនៅតែតស៊ូ មិនរួញរា និងមិនបោះបង់។ ពួកគេបានត្រៀមខ្លួនរួចជាស្រេច បន្ទាប់ពីបានរៀន និងបំប៉នតាំងពីដើមឆ្នាំមក
លោកបានពន្យល់ថា ក្រសួងអប់រំ យុវជន និងកីឡា បានរៀបចំដំណើរការប្រឡងដាច់ដោយឡែកសម្រាប់បេក្ខជនអប់រំពិសេស ដោយមានបន្ទប់ប្រឡង និងអនុរក្សដែលជាគ្រូបង្រៀនមកពីសាលាអប់រំពិសេស ដើម្បីអាចទំនាក់ទំនង ពន្យល់ និងជួយដោះស្រាយបញ្ហាផ្សេងៗក្នុងអំឡុងពេលប្រឡង។
ទោះជាយ៉ាងណា លោកបញ្ជាក់ថា វិញ្ញាសាប្រឡងគឺដូចគ្នានឹងសិស្សទូទៅ ខណៈការកែវិញ្ញាសារបស់បេក្ខជនអប់រំពិសេស ក៏ធ្វើឡើងដោយគ្រូជំនាញមកពីសាលាអប់រំពិសេសផងដែរ។
លោកបន្តថា កម្មវិធីសិក្សារបស់សិស្សអប់រំពិសេសមានខ្លឹមសារដូចសិស្សទូទៅ ប៉ុន្តែការបង្រៀនប្រើប្រាស់បច្ចេកទេសពិសេស ដូចជាភាសាសញ្ញា កាយវិការ និងវិធីសាស្ត្របង្រៀនដែលសមស្របទៅនឹងស្ថានភាពរបស់សិស្ស ដើម្បីជួយឱ្យពួកគេយល់មេរៀនបានកាន់តែងាយស្រួល។
លោក ម៉ៅ ផាត បានសម្តែងការកោតសរសើរចំពោះសិស្សអប់រំពិសេសទាំងអស់ ដែលទោះបីប្រឈមនឹងឧបសគ្គក្នុងការសិក្សា ក៏នៅតែខិតខំប្រឹងប្រែង និងមិនបោះបង់ក្តីស្រមៃរបស់ខ្លួន។ លោកក៏បានអំពាវនាវឱ្យសាធារណជនចូលរួមលើកទឹកចិត្តដល់បេក្ខជនអប់រំពិសេសទាំងនេះ ដើម្បីជាកម្លាំងចិត្តឱ្យពួកគេបន្តខិតខំប្រឹងប្រែង។
លោកបានបង្ហាញក្តីរំពឹងថា ដំណើរការប្រឡងឆ្នាំនេះនឹងប្រព្រឹត្តទៅដោយរលូនសម្រាប់បេក្ខជនអប់រំពិសេស ព្រោះក្រសួងបានរៀបចំវិធានការយ៉ាងយកចិត្តទុកដាក់ ដើម្បីធានាឱ្យពួកគេអាចប្រឡងបានដោយស្មើភាព និងមានប្រសិទ្ធភាព។
ក្នុងសន្និសីទសារព័ត៌មានកាលពីថ្ងៃទី៦ ខែសីហា ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឱ្យដឹងថា ការប្រឡងបាក់ឌុបឆ្នាំ២០២៦ មានបេក្ខជនចុះឈ្មោះប្រឡងជាង ១៥ម៉ឺននាក់ ក្នុងនោះមានបេក្ខជនអប់រំពិសេសពិការភ្នែក និងគថ្លង់ ចំនួន ៤៧នាក់។
ឯកឧត្តមបានបញ្ជាក់ថា ក្រសួងបានត្រៀមរៀបចំគ្រប់លក្ខខណ្ឌសម្រាប់ដំណើរការប្រឡង ដើម្បីធានាឱ្យការប្រឡងប្រព្រឹត្តទៅដោយតម្លាភាព យុត្តិធម៌ និងសមធម៌ ខណៈថវិកាប្រមាណ ៦លានដុល្លារអាមេរិក ត្រូវបានប្រើប្រាស់សម្រាប់រៀបចំការប្រឡងឆ្នាំនេះ៕
