ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
“ធម្មជាតិបង្កើតមកបុរស និងស្ត្រីគឺមានភាពខ្លាំង និងភាពល្អផ្សេងគ្នា ដើម្បីជួយបំពេញឱ្យគ្នាទៅវិញទៅមក” នេះជាការលើកឡើងរបស់ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន ក្នុងពិធីអបអរទិវាអន្តរជាតិនារី ។
លោកឧកញ៉ាបានមានប្រសាសន៍ថា ដោយសារមនុស្សកើតមកមានកាយសម្បទាមិនដូចគ្នា ហើយការងារមួយចំនួនស្រ្តីធ្វើល្អប្រសើរជាងបុរស រីឯការងារមួយចំនួនទៀតបុរសអាចធ្វើជំនួសស្រ្តីបាន។ ដូចនេះ ជំនួសឱ្យការកំណត់យក ឬប្រើពាក្យថា “ស្ត្រីជាភេទទន់ខ្សោយ” ស្រ្តីគួរឆ្លុះបញ្ចាំងបង្ហាញពីសមត្ថភាពផ្ទាល់ខ្លួនជាជាងប្រៀបធៀបជាមួយបុរស ហើយស្រ្តីនិងបុរសគួរធ្វើការងារបំពេញឱ្យគ្នាទៅវិញទៅមក ជាពិសេសក្នុងសង្គមគ្រួសារ ក៏ដូចសង្គមជាតិផងដែរ។
យោងតាមបទពិសោធន៍ក្នុងពិភពការងារជាច្រើនឆ្នាំកន្លងមក លោកឧកញ៉ាបានលើកឡើងថា ក្នុងកម្រិតថ្នាក់ដឹកនាំ ឬមុខតំណែងគ្រប់គ្រង ចំនួនស្រ្តីហាក់នៅមានចំនួនតិចតួចនៅឡើយ។ កត្តានេះអាចបណ្តាលមកពី ស្រ្តីមួយចំនួននៅស្ទាក់ស្ទើរ មិនមានទំនុកចិត្ត ខ្លាចការសាកល្បងធ្វើការងារថ្មីៗ មិនទាន់យល់ច្បាស់ពីសក្តានុពលរបស់ខ្លួន មានកាតព្វកិច្ចក្នុងគ្រួសារ និងមិនទាន់ទទួលបានការលើកទឹកចិត្តនិងគាំទ្រពេញលេញពីមជ្ឈដ្ឋានជុំវិញ។
លោកឧកញ៉ាបានលើកទឹកចិត្តស្រ្តីគួរមានភាពជឿជាក់លើសមត្ថភាពខ្លួនឯង និងឱ្យតម្លៃលើខ្លួនឯង ព្រមទាំងត្រូវខិតខំប្រឹងប្រែងអភិវឌ្ឍសមត្ថភាពបន្ថែមជានិច្ច ក្នុងការចាប់យកមុខតំណែងសំខាន់ៗ ដើម្បីការរីកចម្រើន ជាពិសេសបង្កើតសេដ្ឋកិច្ចដ៏មាំទាំសម្រាប់ខ្លួនឯងផងដែរ សម្រាប់ការចូលរួមចំណែកកសាងសុភមង្គលក្រុមគ្រួសារ។ មជ្ឈដ្ឋានជុំវិញជាពិសេសក្នុងក្រុមគ្រួសារ ស្ថាប័ន និងប្រព័ន្ធអប់រំក៏ត្រូវដើរតួឱ្យកាន់តែល្អក្នុងការផ្តល់ការគាំទ្រដល់កុមារី និងស្រ្តីទូទៅ។
លោកឧកញ៉ាបានបញ្ជាក់ថា នៅក្នុងស្ថាប័នរបស់លោកតែងតែផ្តល់វគ្គបណ្តុះបណ្តាល សិក្ខាសាលាអភិវឌ្ឍចំណេះ ជំនាញ សមត្ថភាពនិងកសាងភាពអង់អាច និងអត្ថប្រយោជន៍គាំពារនានាដល់បុគ្គលិកទាំងបុរសនិងស្រ្តី ដើម្បីទទួលបានឱកាសរីកចម្រើនស្មើគ្នាលើមុខតំណែង និងតួនាទីដឹកនាំបន្ទាប់៕
