ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្រាប់ឆ្នាំ២០២៥នេះ ក្រសួងកសិកម្ម រុក្ខាប្រមាញ់ និងនេសាទ ប្រកាសជ្រើសរើសមន្រ្តីកសិកម្មឃុំចំនួន ៣៧២នាក់បន្ថែមទៀត ដើម្បីទៅបម្រើការងារនៅតាមឃុំសង្កាត់សរុបចំនួន ៣៦១ឃុំ ក្នុងខេត្តចំនួន២៣ ដែលមិនទាន់មានមន្រ្តីកសិកម្មឃុំនៅឡើយ។
យោងតាមសេចក្តីជូនដំណឹងរបស់ក្រសួងមុខងារសាធារណៈ ការដាក់ពាក្យប្រឡងប្រជែង នឹងត្រូវធ្វើឡើងចាប់ពីថ្ងៃទី១៦ ខែមិថុនា រហូតដល់ថ្ងៃទី១៥ ខែកក្កដា ឆ្នាំ២០២៥ វេលាម៉ោង៥ល្ងាចជាកំហិត។
អ្នកដែលអាចចុះឈ្មោះសម្រាប់ការប្រឡងជ្រើសរើសមន្រ្តីកសិកម្មឃុំ ត្រូវមានសញ្ជាតិខ្មែរ, មានវិញ្ញាបនបត្រ សញ្ញាបត្រ ឬសមមូលឡើងទៅ ពាក់ព័ន្ធនឹងកសិកម្ម, មានអាយុយ៉ាងតិច ១៨ឆ្នាំ។ ក្នុងនោះត្រូវបានលើកទឹកចិត្ត និងផ្តល់អាទិភាព ចំពោះ ជនមានពិការភាពដែលមានគុណសម្បត្តិ និងសមត្ថភាពបំពេញនូវមុខងារ តួនាទី និងការទទួលខុសត្រូវក្នុងមុខតំណែងដែលបានដាក់ពាក្យ, ស្រ្តី, ជនជាតិដើមភាគតិច, មន្រ្តីជាប់កិច្ចសន្យាដែលបម្រើការងារក្នុងរដ្ឋបាលសាធារណៈ។
ការដាក់ពាក្យប្រឡងប្រជែង ធ្វើឡើងតាមរយៈប្រព័ន្ធអនឡាញ ដោយបេក្ខជនត្រូវចូលទៅកាន់គេហទំព័រ https://go.gov.kh/era/mcs25agri ដើម្បីបំពេញព័ត៌មានសុំសិទ្ធិប្រឡងប្រជែង ដោយភ្ជាប់ឯកសាររួមមាន ៖ អត្តសញ្ញាណប័ណ្ណសញ្ជាតិខ្មែរ ឬឆាយា, វិញ្ញាបនបត្រ សញ្ញាបត្រ ឬសមមូលតាមលក្ខខណ្ឌជ្រើសរើស, រូបថតទំហំ ៤x៦ (ថតចំពីមុខ គ្មានពាក់មួក គ្មានពាក់វ៉ែនតា ផ្ទៃពណ៌ស ឬផ្ទៃមេឃ) ថតថ្មី ៦ខែចុងក្រោយ, ចំពោះមន្រ្តីរាជការ ត្រូវមានលិខិតអនុញ្ញាតឱ្យចូលរួមប្រឡងប្រជែងចេញដោយប្រធានស្ថាប័ន ឬអាជ្ញាធរដែលមានសិទ្ធអនុញ្ញាតឱ្យផ្ទែរ។
អត្ថប្រយោជន៍ការងារ ៖ បេក្ខជនដែលបានប្រឡងជាប់ជាស្ថាពរនឹងត្រូវធ្វើកម្មសិក្សា និងតាំងស៊ប់ក្នុងក្របខណ្ឌ “ក” ឬ “ខ” ឬ “គ” ផ្អែកលើកម្រិតបណ្តុះបណ្តាលរបស់សាម៉ីខ្លួន។ បេក្ខជនដែលបានប្រឡងជាប់ជាស្ថាពរ នឹងត្រូវទទួលបានបៀវត្សទាបបំផុតចាប់ពី ១,៤៩៦,៩៥០រៀល (មួយលានបួនរយកៅសិបប្រាំមួយពាន់ប្រាំបួនរយហាសិបរៀលគត់) ទៅតាមប្រភេទក្របខណ្ឌ និងទទួលប្រាក់ឧបត្ថម្ភប្រចាំខែចំនួន ១៦០,០០០រៀល (មួយរយហុកសិបពាន់រៀលគត់) ក្នុង១ខែ រួមទាំងអត្ថប្រយោជន៍ផ្សេងៗទៀតរបស់មន្រ្តីរាជការស៊ីវិល។
វិញ្ញាសាប្រឡង ៖ ១.វិញ្ញាសាសរសេរ : ជំនាញ/ឯកទេសពាក់ព័ន្ធកសិកម្ម រយៈពេល ២ម៉ោង, ២.វិញ្ញាសាពហុចម្លើយ : ភាសាអង់គ្លេសកម្រិតមូលដ្ឋានពាក់ព័ន្ធកសិកម្ម រយៈពេល១ម៉ោង, ៣.វិញ្ញាសាពហុចម្លើយ : ចំណេះដឹងទូទៅ រយៈពេល១ម៉ោង។
សូមជំរាបជូនថា បច្ចុប្បន្នកម្ពុជាមានមន្ត្រីកសិកម្មឃុំសង្កាត់ចំនួន ១២៥០នាក់បានកំពុងបម្រើការនៅតាមឃុំសង្កាត់ចំនួន១៥១០ទូទាំងប្រទេសកម្ពុជា។ មន្ត្រីកសិកម្មឃុំដើរតួនាទីសំខាន់ក្នុងការជួយកសិករបង្កើនផលិតភាព និងគុណភាពកសិផល តាមរយៈការផ្សព្វផ្សាយបច្ចេកទេសកសិកម្មថ្មីៗ និងសម្របសម្រួលទីផ្សារ។ ក្នុងនោះរាជរដ្ឋាភិបាលក៏កំពុងពង្រឹងសមត្ថភាពមន្ត្រីកសិកម្មតាមរយៈវគ្គបណ្តុះបណ្តាល និងដាក់ពង្រាយមន្ត្រីបន្ថែមនៅតាមឃុំទូទាំងប្រទេស ដើម្បីផ្តល់ជំនួយដល់កសិករឱ្យបានទាន់ពេលវេលា និងចំគោលដៅ៕
