ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសចូលរួមជាអធិបតីក្នុងសិក្ខាសាលាចែករំលែកចំណេះដឹង និងបទពិសោធន៍ស្តីពីការត្រៀមខ្លួនចូលទីផ្សារការងារក្នុងយុគសម័យឌីជីថលកាលពីពេលថ្មីៗនេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានជំរុញដល់សិស្សនិស្សិតដែលកំពុងត្រៀមខ្លួនចូលទីផ្សារការងារ ត្រូវស្គាល់ពីតម្រូវការទីផ្សារឱ្យច្បាស់លាស់ និងស្គាល់នូវក្តីស្រមៃរបស់ខ្លួន ក្នុងការជ្រើសរើសការសិក្សាមួយដែលត្រឹមត្រូវ និងនាំមកនូវជោគជ័យផ្ទាល់ខ្លួន សង្គមគ្រួសារ និងសង្កមជាតិ។
ឯកឧត្តម ហេង សួរ មានប្រសាសន៍ថា កន្លងទៅ ពេលខ្លះយុវជនយើងជ្រើសរើសជំនាញទាំងការប្រថុយ ហើយខ្លះទៀតជ្រើសរើសជំនាញតាមរយៈមិត្តភក្តិ ដោយវាមិនប្រាកដថា ជាការសម្រេចចិត្តជ្រើសរើសជំនាញមួយ ដែលនឹងបំពេញទៅតាមក្តីស្រមៃរបស់ខ្លួននោះទេ។ ជាការកត់សម្គាល់ ឯកឧត្តមមើលឃើញថា បច្ចុប្បន្នយុវជនយើងមួយចំនួនចាប់ផ្តើមឯករាជ្យធ្វើការក្រៅម៉ោងដើម្បីយកប្រាក់មកបង់ថ្លៃសាលា ប៉ុន្តែភាគច្រើនប្រហែលជានៅពឹងអាស្រ័យទៅលើការគាំទ្រពីក្រុមគ្រួសារនៅឡើយ ដូច្នេះ ភារកិច្ចរបស់យុវជន ដំបូងប្រហែលជាត្រូវគិតថា រៀនជំនាញណា ដែលជាជំនាញមានការងារធ្វើច្រើន ជំនាញដែលសមទៅនឹងអ្វីដែលជាទេពកោសល្យ ឬមួយសមត្ថភាព ឬដុងពីកំណើតរបស់ខ្លួន។ « ឧទាហរណ៍ មនុស្សច្រើនចូលចិត្តទំនាក់ទំនង ចូលចិត្តឡើងមានមតិ ប៉ុន្តែដល់ពេលយើងទៅធ្វើការខាងផ្នែកមេកានិក ដែលមិនសូវជួបជាមួយអ្នកខាងក្រៅច្រើន អញ្ចឹងជួនកាលវាអត់ស៊ីគ្នាជាមួយនឹងដុងពីកំណើត ហើយនិង អ្វីដែលជាក្តីស្រមៃរបស់ខ្លួន»។
ដូច្នេះ តើធ្វើយ៉ាងដូចម្តេច ទើបយុវជនអាចស្វែងរកទេពកោសល្យ ឬសមត្ថភាពពីកំណើតរបស់ខ្លួនបាន? បើតាមប្រសាសន៍របស់ ឯកឧត្តមរដ្ឋមន្រ្តីក្រសួងការងារ យុវជនអាចស្វែងរកសមត្ថភាព ឬដុងពីកំណើតរបស់ខ្លួនបានតាមរយៈការធ្វើតេស្តខ្លួនឯងថា តើយើងពូកែខាងអ្វី ដូចជាពូកែខាងគណិតវិទ្យា ឬពូកែភាសាខ្មែរ ឬក៏ពូកែខាងទំនាក់ទំនង រួចសម្លឹងមើលអាជីពដែលសាកសម។ មួយវិញទៀត យុវជនអាចធ្វើតេស្តតាមរយៈកម្មវិធីរបស់ទីភ្នាក់ងារជាតិ មុខរបរ និងការងារក៏បាន។
យ៉ាងណាក៏ដោយ ឯកឧត្តមរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បង្ហាញក្តីរំពឹងថា យុវជនរបស់យើងនឹងពិចារណាលើការជ្រើសរើសវិថីជីវិតនាពេលអនាគត ដើម្បីសម្រេចក្តីស្រមៃដោយឈរលើមូលដ្ឋានបទពិសោធន៍របស់អ្នកជំនាញ និងតម្រូវការការងារជាក់ស្តែង ។
ឯកឧត្តមបញ្ជាក់ថា ការធ្វើយ៉ាងដូចនេះ នឹងជំរុញឱ្យកម្លាំងពលកម្មវ័យក្មេងកម្ពុជា សម្រេចក្តីស្រមៃរបស់ខ្លួន ហើយក៏ស្របទៅនឹងផែនការយុទ្ធសាស្រ្តរយៈពេល៥ឆ្នាំរបស់ក្រសួងការងារ និងបណ្តុះបណ្តាលវិជ្ជាជីវៈលើវិស័យការងារ សន្តិសុខ និងបណ្តុះបណ្តាលវិជ្ជាជីវៈ ដោយអនុវត្តតាមយុទ្ធសាស្រ្តបញ្ចកោណ របស់រាជរដ្ឋាភិបាលកម្ពុជាអាណត្តិទី៧ ដែលមានទិសដៅផ្តល់នូវព័ត៌មានគ្រប់គ្រាន់ ទូលំទូលាយ និងច្រើនជម្រើសសម្រាប់ប្រជាពលរដ្ឋ និងយុវជន៕
