ក្រសួងព័ត៌មាននៅថ្ងៃនេះ (១ មេសា) បានប្រកាស​ពីការ​បើក​យុទ្ធនាការ “និយាយថាទេ ចំពោះព័ត៌មានក្លែងក្លាយ!” ដើម្បីកាត់បន្ថយព័ត៌មានក្លែងក្លាយមកនូវកម្រិតតិចបំផុត នឹងឈានទៅលុបបំបាត់នូវព័ត៌មានក្លែងក្លាយពីលំហក្នុងសង្គមកម្ពុជា ដោយ​ជំរុញ​ការផ្សព្វផ្សាយ​ព័ត៌មានពិតទៅដល់ប្រជាពលរដ្ឋ។

លើកឡើង​នៅ​ក្នុងសន្និសីទសារព័ត៌មាន​កាលពីរសៀលថ្ងៃទី៣១ មីនា ឯកឧត្តម នេត្រ ភត្រា រដ្ឋមន្រ្តីក្រសួងព័ត៌មាន​ បានមានប្រសាសន៍ថា គោលដៅនៃយុទ្ធនាការនេះ គឺផ្តោតលើការផ្លាស់ប្ដូរឥរិយាបទរបស់ប្រជាពលរដ្ឋដែលជាអ្នកប្រើប្រាស់បណ្ដាញទំនាក់ទំនងសង្គម និងប្រព័ន្ធផ្សព្វផ្សាយទំនើប ដើម្បីទប់ស្កាត់ការរីកសាយភាយព័ត៌មានក្លែងក្លាយក្នុងសង្គមកម្ពុជា តាមរយៈ ទី១. ការផ្សព្វផ្សាយបញ្ជ្រាបចំណេះដឹងអ្វីជាព័ត៌មានក្លែងក្លាយ ប្រភេទព័ត៌មានក្លែងក្លាយ អំពីគ្រោះថ្នាក់និងផលវិបាកកើតចេញពីព័ត៌មានក្លែងក្លាយ ទី២. លើកកម្ពស់អក្ខរកម្មប្រព័ន្ធផ្សព្វផ្សាយនៅក្នុងចំណោមប្រជាពលរដ្ឋទូទៅ ពិសេសយុវវ័យ ឱ្យស្គាល់ព័ត៌មានពិត និងព័ត៌មានក្លែងក្លាយ ដើម្បីចែករំលែក និងជឿដោយប្រុងប្រយ័ត្ន និងទី៣. កាត់បន្ថយចំនួនព័ត៌មានក្លែងក្លាយ។

ឯកឧត្តម នេត្រ ភត្រា លើកឡើងថា អ្នកសារព័ត៌មាន អ្នកបង្កើតមាតិកា អ្នកមានឥទ្ធិពលក្នុងសង្គម ដើរតួនាទីសំខាន់ក្នុងការផ្សព្វផ្សាយព័ត៌មានពិតត្រឹមត្រូវ ដោយត្រូវឈរលើមូលដ្ឋានតុល្យភាពព័ត៌មាន ប្រភពព័ត៌មានច្បាស់លាស់ ផ្ទៀងផ្ទាត់ព័ត៌មានច្បាស់លាស់មុននឹងធ្វើការផ្សព្វផ្សាយ។ ឯកឧត្តមបន្តថា ព័ត៌មានដែលប្រជាជនប្រើប្រាស់ត្រូវតែជាព័ត៌មានដែលពិត និងត្រឹមត្រូវ មិនមែនជាព័ត៌មានក្លែងក្លាយ ព្រោះព័ត៌មានពិតនឹងធ្វើឱ្យប្រជាពលរដ្ឋសម្រេចចិត្តបានត្រឹមត្រូវ។

រដ្ឋមន្រ្តីក្រសួងព័ត៌មាន រំពឹងទុកថា លទ្ធផលដែលចេញពីយុទ្ធនាការ “និយាយថាទេ ចំពោះព័ត៌មានក្លែងក្លាយ!” ដែលធ្វើឡើងចាប់ពីថ្ងៃទី១ ខែមេសា មានរយៈពេល១២ខែ នៅតាមបណ្ដាខេត្តនីមួយៗក្នុងការប្រឆាំងព័ត៌មានក្លែងក្លាយនឹងប្រកបដោយភាពជោគជ័យ។

យោង​តាមគណៈកម្មការប្រយុទ្ធប្រឆាំងព័ត៌មានក្លែងក្លាយ ក្នុងឆ្នាំ២០២៣កន្លងមក គេបានរកឃើញថា មានព័ត៌មានក្លែងក្លាយចំនួន៣២០៨ ហើយក្នុងឆ្នាំ ២០២៤ មានព័ត៌មានក្លែងក្លាយសរុបចំនួន៣៦៥១ ត្រូវបានកត់សម្គាល់ ហើយបើគិតគឺមានកំណើនប្រមាណ១៤ភាគរយ នៃព័ត៌មានក្លែងក្លាយ។ ក្នុងចំណោមព័ត៌មានក្លែងក្លាយនេះបានកត់សម្គាល់តែទៅលើព័ត៌មានសំខាន់ៗដូចជា សន្តិសុខជាតិ សណ្តាប់ធ្នាក់សាធារណៈ ការដឹកនាំរបស់រាជរដ្ឋាភិបាល និងក្រសួងស្ថាប័នពាក់ព័ន្ធក៏ដូចជាវិស័យសំខាន់ៗក្នុងសង្គម រួមព័ត៌មានក្លែងក្លាយមួយចំនួនពាក់ព័ន្ធទៅនឹងថ្នាក់ដឹកនាំ ដែលយល់ថាជាការនាំឱ្យមានការយល់ច្រឡំបង្កើតជាចលាចលសង្គម ឬក៏បះពាល់ដល់សន្តិសុខសណ្តាប់ធ្នាប់៕