ក្នុងឱកាស​ចូលរួមពិធីប្រកាស​ចូលកាន់តំណែង​ប្រធាន​មន្ទីរអប់រំ យុវជន និងកីឡា ខេត្តត្បូងឃ្មុំ កាលពីដើមសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានលើកឡើងថា ក្រសួងបានផ្តល់អាទិភាពគន្លឹះចំនួន៦ ក្នុងការធ្វើ​កំណែទម្រង់វិស័យអប់រំ និងគោលនយោបាយអប់រំ ដើម្បីលើកកម្ពស់គុណភាពអប់រំ ឆ្លើយតបទៅនឹងយុទ្ធសាស្រ្ត​បញ្ចកោណ ដំណាក់កាលទី១ ដែល​មុំទី១ ផ្តោត​លើ​ការ​អភិវឌ្ឍមូលធន​មនុស្ស និងមុំទី៥ ផ្តោត​លើ​ការ​អភិវឌ្ឍបច្ចេកវិទ្យា វិទ្យាសាស្រ្តឌីជីថល។

បើតាមឯកឧត្តមរដ្ឋមន្រ្តី គន្លឹះអាទិភាពទាំង៦ចំណុច ក្នុងការធ្វើកំណែទម្រង់វិស័យអប់រំ រួមមាន ៖ ១. កំណែទម្រង់ការប្រឡងមធ្យមសិក្សាទុតិយភូមិ ផ្អែកលើគោលការណ៍យុត្តិធម៌ និងតម្លាភាព, ២. កំណែទម្រង់គ្រូបង្រៀន ដោយការបង្កើនបៀវត្សគ្រូបង្រៀន ទាក់ទាញអ្នកមានសមត្ថភាពចូលធ្វើគ្រូបង្រៀន លើកស្ទួយកិត្តិយស និងតួនាទីរបស់គ្រូបង្រៀននៅក្នុងសង្គម ដោយពង្រឹងការបណ្ដុះបណ្ដាលគ្រូប្រកបដោយគុណវុឌ្ឍិ។

៣. កំណែទម្រង់សាលារៀន ដែលរួមមាន ការកែលម្អភាពជាអ្នកដឹកនាំរបស់នាយក ការលើកកម្ពស់លទ្ធផលសិក្សារបស់សិស្ស ការអនុវត្តតេស្តស្តង់ដា ដូចជា តេស្ត PISA ការយកចិត្តទុកដាក់លើគុណភាពគ្រូបង្រៀន និងការចូលរួមរបស់ មាតាបិតា និងសហគមន៍, ៤. លើកកម្ពស់ ការអប់រំកុមារតូច ដែលរួមមាន ការទទួលបាននូវអាហារូបត្ថម្ភបានគ្រប់គ្រាន់ ការលើកកម្ពស់សុខុមាលភាពរបស់ម្តាយ ការរៀនតាមរយៈការលេង និងអភិវឌ្ឍគ្រូមត្តេយ្យ។

៥. លើកកម្ពស់ការអប់រំកម្រិតមូលដ្ឋាន ដែលរួមមាន កម្មវិធីអំណានកម្រិតដំបូង និងគណិតវិទ្យាកម្រិតដំបូង ដែលជាមូលដ្ឋានគ្រឹះក្នុងការចាប់យកមុខវិជ្ជាដទៃទៀតមកសិក្សា និង ៦. ការដាក់ឱ្យអនុវត្តស្តង់ដាសាលារៀនគំរូ ដោយក្រសួងបាននឹងកំពុងជំរុញលើកទឹកចិត្ត និងគាំទ្រដល់សាលានៅគ្រប់តំបន់ដែលមានការប្តេជ្ញាចិត្តសម្រេចឱ្យបាននូវស្តង់ដាសាលារៀនគំរូចំនួន៥ ដែលក្រសួងបានដាក់ចេញ។

ឆ្លៀត​ក្នុង​ឱកាសនោះដែរ ឯកឧត្តមរដ្ឋមន្រ្តី ក៏​បានថ្លែងអំណរគុណដល់បុគ្គលិកអប់រំគ្រប់លំដាប់ថ្នាក់ ដែលបានចូលរួមអនុវត្តកំណែទម្រង់វិស័យអប់រំប្រកបដោយស្មារតីទទួលខុសត្រូវខ្ពស់នាពេលកន្លងមក និងបានផ្តល់អនុសាសន៍ដល់ក្រុមការងារពាក់ព័ន្ធឱ្យផ្តោតសំខាន់ និងស្វែងយល់បន្ថែមលើតេស្ត PISA រៀបចំឱ្យមានការអានក្នុងបណ្ណាល័យយ៉ាងតិច ១ម៉ោង ក្នុងមួយសប្តាហ៍ និងជាពិសេសបានស្នើលោកប្រធានមន្ទីរថ្មី រៀបចំ និងពិនិត្យមើលគ្រប់គ្រឹះស្ថានសិក្សា ដើម្បីបន្តជួយគាំទ្របន្ថែម ក្នុងគោលដៅសម្រេចបានស្តង់ដាសាលារៀនគំរូ ដែលជាចក្ខុវិស័យអាទិភាពរបស់ក្រសួងអប់រំ យុវជន និងកីឡា៕