សិស្សានុសិស្សសរុបចំនួន ៣៤០០នាក់ មកពីសាលារៀនចំនួន២០ នៅក្នុងខេត្តរតនៈគិរី ទទួលបានសម្ភារសិក្សាជាកាតាបសរុបចំនួន ៣៤០០ និងសៀវភៅសរុបចំនួន ៣ម៉ឺន៤ពាន់ក្បាល ពីគ្រឹះស្ថានមីក្រូហិរញ្ញវត្ថុ អិលអូអិលស៊ី (LOLC)។ ពិធីចែកនេះ បានធ្វើឡើងកាលពីថ្ងៃទី២៥ ខែធ្នូ ឆ្នាំ២០២៤ នៅតាមបណ្តាសាលាបឋមសិក្សាចំនួន២០ ដែលសុទ្ធសឹងតែស្ថិតនៅតំបន់ដាច់ស្រយាល ក្នុងខេត្តរតនៈគិរី។

លោក សុខ វឿន ប្រធាននាយកប្រតិបត្តិ LOLC មានប្រសាសន៍ថា ” អិលអូអិលស៊ី មិនត្រឹមតែជាស្ថាប័នផ្តល់សេវាកម្មហិរញ្ញវត្ថុ និងរកប្រាក់ចំណេញប៉ុណ្ណោះទេ។ បេសកកម្មចម្បងមួយរបស់យើងគឺការបង្កើតឥទ្ធិពលវិជ្ជមានរយៈពេលវែងទៅដល់សហគមន៍ ជាពិសេសនៅតាមតំបន់ជនបទដាច់ស្រយាលដែលខ្វះខាតលទ្ធភាព និងការទទួលបានធនធានផ្សេងៗនៅមានកម្រិត។ តាមរយៈគំនិតផ្តួចផ្តើមនេះ យើងមានគោលបំណងផ្តល់ជំនួយដល់សិស្សានុសិស្សតាមរយៈសម្ភារសិក្សាមួយចំនួនដែលពួកគេត្រូវការចាំបាច់ក្នុងការសិក្សារៀនសូត្រពង្រឹងចំណេះដឹង។ យើងជឿជាក់ថា តាមរយៈការវិនិយោគលើវិស័យអប់រំ និងបណ្ដុះបណ្ដាលទេពកោសល្យវ័យរបស់សិស្សានុសិស្សចាប់ពីវ័យក្មេង បានន័យថាយើងកំពុងវិនិយោគលើអនាគតរបស់ប្រទេសកម្ពុជា “។

លោក សុខ វឿន បន្តថា ជាផ្នែកមួយនៃការចូលរួមសកម្មភាពសង្គម LOLC តែងតែយកចិត្តទុកដាក់លើកកម្ពស់នូវការអប់រំ ដែលកន្លងមកយើងបានផ្តល់ជាសម្ភារៈសិក្សាដល់សាលារៀន ជាពិសេសសាលារៀននៅជនបទ ផ្តល់ជាមធ្យោបាយធ្វើដំណើរដល់សិស្សានុសិស្សក្រីក្រ និងឧបត្ថម្ភជាសម្ភារចាំបាច់នានាដល់សាលារៀនដើម្បីលើកស្ទួយសុខុមាលភាពរបស់សិស្សានុសិស្ស ដែល LOLC បានធ្វើជាបន្តបន្ទាប់រហូតមក ក្នុងការលើកកម្ពស់ការសិក្សាអប់រំ។

សម្រាប់ការចែកសម្ភារសិក្សាដល់សិស្សានុសិស្សនៅខេត្តរតនៈគិរីនេះវិញ ប្រធាននាយកប្រតិបត្តិ LOLC បញ្ជាក់ថា ត្បិតកាតាប និងសៀវភៅ ហាក់ដូចជាសម្ភារសាមញ្ញ ប៉ុន្តែវាដើរតួនាទីយ៉ាងសំខាន់ដើម្បីជួយឱ្យក្មួយៗមានសម្ភារសិក្សាបន្ថែមគ្រប់គ្រាន់ និងជំរុញទឹកចិត្តក្មួយៗឱ្យខិតខំប្រឹងប្រែងរៀនសូត្រ សម្រេចក្តីសុបិន្តរបស់ខ្លួន។

“LOLC ពិតជាមានមោទកភាពក្នុងការរួមចំណែកដល់ការផ្លាស់ប្តូរ និងផ្តល់លទ្ធផលវិជ្ជមានយូរអង្វែងទៅកាន់សហគមន៍”

ក្នុងឱកាសនោះផងដែរ លោកនាយកសាលាបឋមសិក្សាឡុំ បានលើកឡើងថា “ចំពោះខ្ញុំបាទជាគណៈគ្រប់គ្រងសាលាឡុំផ្ទាល់ ខ្ញុំមានអារម្មណ៍សប្បាយរីករាយឥតឧបមា ដោយសារតែសាលាយើងខ្ញុំមិនដែលមានកម្មវិធីបែបនេះពីមុនមកទេ។ ដូចនេះ ខ្ញុំសូមអរគុណយ៉ាងខ្លាំង ចំពោះគ្រឹះស្ថានមីក្រូហិរញ្ញវត្ថុ អិលអូអិលស៊ី ដែលផ្តល់ឱកាសចែកសម្ភារសិក្សាដល់សាលាបឋមសិក្សាខ្ញុំ ហើយធ្វើឱ្យសិស្សានុសិស្សទាំងអស់ទទួលបាននូវសម្ភាររៀនសូត្រ ក៏ដូចជាផ្តល់កិត្តិយសមកដល់សាលាខ្ញុំបាទផ្ទាល់។”

ជាមួយគ្នានេះ លោក សុខ វឿន ក៏សង្ឃឹមថា សិស្សានុសិស្សទាំងអស់នឹងប្រើប្រាស់សម្ភារសិក្សាដ៏មានសារៈសំខាន់នេះ ក្នុងការរៀនសូត្រដើម្បីអនាគតខ្លួនឯង ក្រុមគ្រួសារ និងក្លាយខ្លួនជាសរសរទ្រូងដ៏រឹងមាំដើម្បីរួមចំណែកអភិវឌ្ឍប្រទេសជាតិយើង។

សូមបញ្ជាក់ថា សាលារៀនទាំង២០នៅក្នុងខេត្តរតនៈគិរី ដែលទទួលបានសម្ភារសិក្សាពី LOLC រួមមាន ៖
១. សាលាបឋមសិក្សាឡុំ
២. សាលាបឋមសិក្សាប៉ក់តូច
៣. សាលាបឋមសិក្សាប៉ក់ធំ
៤. សាលាបឋមសិក្សាកាតែ
៥. សាលាបឋមសិក្សាគងយុគ
៦. សាលាបឋមសិក្សាពាក់
៧. សាលាបឋមសិក្សាគងធំ
៨. សាលាបឋមសិក្សាឡុំកម
៩. សាលាបឋមសិក្សាសោមគល់
១០. សាលាបឋមសិក្សាក្រេះ
១១. សាលាបឋមសម្តេចឪម៉ែយាក់ប៉ូយ
១២. សាលាបឋមសិក្សាសោមត្រកថ្មី
១៣. សាលាបឋមសិក្សាប៉ាដល
១៤. សាលាបឋមសិក្សាសោមធំ(សោមកានីញ)
១៥. សាលាបឋមសិក្សាប៉ក់ប៉ូ
១៦. សាលាបឋមសិក្សាឯកភាព
១៧. សាលាបឋមសិក្សាក្រឡា
១៨. សាលាបឋមសិក្សាតងណងឡិៈ
១៩. សាលាបឋមសិក្សាកាំ
២០. សាលាបឋមសិក្សាល្អឺនក្រែន៕