ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងអំឡុងពេលនៃសម័យប្រជុំមហាសន្និបាតលើកទី៤២ នៃអង្គការយូណេស្កូ នៅទីស្នាក់ការកណ្ដាលរបស់អង្គការយូណេស្កូ ទីក្រុងប៉ារីស សាធារណរដ្ឋបារាំង លោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន បានផ្ដល់អនុសាសន៍២ចំណុចថ្លែងនៅក្នុង “វេទិកាយុវជនលើកទី១៣ របស់អង្គការយូណេស្កូ” (13th UNESCO Youth Forum) ស្តីពីការបំរែបំរួលអាកាសធាតុ ដែលប្រព្រឹត្តទៅកាលពីថ្ងៃទី១៤ ខែវិច្ឆិកា ឆ្នាំ២០២៣កន្លងទៅ។
នៅក្នុង “វេទិកាយុវជនលើកទី១៣ របស់អង្គការយូណេស្កូ” ក្រោមប្រធានបទ «ផលប៉ះពាល់សង្គមលើបំរែបំរួលអាកាសធាតុ និងតម្រូវការដើម្បីសម្រេចបាននូវការផ្លាស់ប្តូរអាកាសធាតុប្រកបដោយសមធម៌» លោកជំទាវ ស្រូយ សុជាតិ បានលើកឡើងអំពីការចូលរួមយ៉ាងសកម្មរបស់កម្ពុជាក្នុងវិធានការប្រឆាំងនឹងការប្រែប្រួលអាកាសធាតុ រួមមាន UNFCCC, Tokyo Protocol, Paris Agreement, និងយុទ្ធសាស្ត្ររយៈពេលវែងសម្រាប់អព្យាក្រឹតភាពកាបូន (LTS4CN)។
នៅក្នុងឱកាសនេះដែរ លោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន បានផ្ដល់អនុសាសន៍សំខាន់ៗមួយចំនួន ជូនដល់អង្គវេទិកាទាំងមូល រួមមាន៖
ទី១. ការរៀបចំសាលារៀន និងសាកលវិទ្យាល័យឱ្យក្លាយជាមជ្ឈមណ្ឌលគាំទ្រប្រព័ន្ធអេកូឡូស៊ី ដើម្បីភ្ជាប់ការអប់រំជំនាញ និងចំណេះដឹងជាមួយបរិស្ថានបៃតង។ លើកកម្ពស់សមត្ថភាពដោះស្រាយបញ្ហា បង្កើតការជឿជាក់លើខ្លួនឯង ការសិក្សានិងធ្វើការងារជាក្រុម និងបង្កើតឱ្យយុវជនមានវិន័យជាដើម។
ទី២. ការបង្កើតឱកាសសម្រាប់ការច្នៃប្រឌិតដែលដឹកនាំដោយយុវជន ដោយលើកទឹកចិត្តឱ្យយុវជនចូលរួមក្នុងការដោះស្រាយបញ្ហាក្នុងសង្គម និងមានការចូលរួមពីវិស័យឯកជន ឧទាហរណ៍ Business Model ឬ Project Competition សម្រាប់សិស្សរៀនពីរបៀបដោះស្រាយបញ្ហាប្រឈមនៃសតវត្សទី 21 ដោយរួមបញ្ចូលការបណ្តុះបណ្តាលស្តីពីភាពជាអ្នកដឹកនាំ ការអប់រំបៃតង គោលគំនិតសំខាន់ៗនៃមិត្តភាពបរិស្ថាន។
គួរជម្រាបជូនថា កម្មវិធីនេះមានការចូលរួមពីសំណាក់រដ្ឋមន្ត្រី និងប្រតិភូតំណាងទទួលបន្ទុកវិស័យយុវជនមកពី ៣៣ប្រទេស យុវជនប្រមាណ ១៧០រូប មកពីជុំវិញពិភពលោក ស្ថាប័ន និងអង្គការពាក់ព័ន្ធនានា៕
