ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថ្លែងក្នុងពិធីដាក់ឱ្យប្រើប្រាស់ជាផ្លូវការសៀវភៅសិក្សាគោលមុខវិជ្ជាសុខភាពសិក្សា ក្រោមចំណងជើងថា “សុខភាពសិក្សាសម្រាប់ទាំងអស់គ្នាជំហានទៅកាន់ពិភពលោកដែលកាន់តែប្រសើរ” កាលពីចុងសប្តាហ៍កន្លងទៅនេះ លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា ការលើកកម្ពស់សុខភាពសិក្សាសំខាន់ក្នុងការចូលរួមចំណែកធានាការសិក្សាមានគុណភាព និងបង្កើនអត្រាបញ្ចប់ការសិក្សារបស់សិស្ស។
រដ្ឋលេខាធិការក្រសួងអប់រំ បញ្ជាក់បន្ថែមថា រាជរដ្ឋាភិបាលកម្ពុជាបានដាក់ចេញនូវចក្ខុវិស័យក្នុងការប្រែក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០ និងជាប្រទេសដែលមានប្រាក់ចំណូលខ្ពស់ក្នុងឆ្នាំ២០៥០ តាមរយៈការកំណត់សំណុំយុទ្ធសាស្ត្រ ដើម្បីអភិវឌ្ឍធនធានមនុស្សប្រកបដោយគុណភាព ផលិតភាពការងារខ្ពស់ និងសុខភាពរឹងមាំ។ ក្នុងបរិបទនេះ ការលើកកម្ពស់សុខភាពសិក្សា គឺជាកត្តាដ៏សំខាន់ និងមិនអាចខ្វះបានក្នុងការចូលរួមចំណែកដល់ការធានាបាននូវការសិក្សារបស់សិស្សប្រកបដោយគុណភាព និងបង្កើនអត្រាបញ្ចប់ការសិក្សារបស់ពួកគេ ដើម្បីឈានទៅដល់ការសម្រេចគោលដៅនៃការអប់រំ និងចក្ខុវិស័យរបស់ជាតិ។
គួរជម្រាបជូនថា សៀវភៅសិក្សាគោលមុខវិជ្ជាសុខភាពសិក្សា គឺជាសមិទ្ធផលថ្មីមួយបន្ថែមទៀតនៃការអនុវត្តផែនការសកម្មភាពជាតិស្តីពី សុខភាពសិក្សាឆ្នាំ២០២១-២០៣០ ស្របតាមគោលនយោបាយជាតិស្តីពីសុខភាពសិក្សារបស់ប្រទេសកម្ពុជា។ ជាមួយគ្នានេះ ក៏ជាផ្លែផ្កានៃកិច្ចខិតខំប្រឹងប្រែងអស់រយៈពេលជិត៣ឆ្នាំ ចាប់ពីឆ្នាំ២០២០មក ក្រោម “គម្រោងអភិវឌ្ឍន៍សុខភាពសិក្សាសម្រាប់កុមារកម្ពុជា” ដែលហៅកាត់ថា (SHCC) របស់សាកលវិទ្យាល័យតូក្យូ ហ្គាគឹហ្គេ នៃប្រទេសជប៉ុន ដោយមានកិច្ចសហការជាមួយនាយកដ្ឋានសុខភាពសិក្សា នៃក្រសួងអប់រំ យុវជន និងកីឡា តាមរយៈការគាំទ្រហិរញ្ញប្បទានពីមូលនិធិនីបប៉ុន (The Nippon Foundation)។
ឯកឧត្តមបណ្ឌិត សិត សេង នាយកវិទ្យាស្ថានគរុកោសល្យរាជធានីភ្នំពេញ បានបញ្ជាក់ថា ការគាំទ្ររបស់គម្រោងអភិវឌ្ឍន៍សុខភាពសិក្សាសម្រាប់កុមារកម្ពុជា (SHCC) នៃសាកលវិទ្យាល័យតូក្យូ ហ្គាគឹហ្គេ នៃប្រទេសជប៉ុន ដែលគាំទ្រថវិកាដោយមូលនិធិនីបប៉ុន កន្លងមកនេះ គឺពិតជាបានជួយដោះស្រាយកង្វល់ដល់វិទ្យាស្ថានគរុកោសល្យរាជធានីភ្នំពេញ និងបាត់ដំបង ក៏ដូចជាបានជួយក្នុងការរួមចំណែកដល់ការសម្រេចបាននូវកំណែទម្រង់អប់រំគ្រូបង្រៀន ដែលជាសរសរស្តម្ភទី១ ក្នុងចំណោមសរសរស្តម្ភទាំង៥។
នាយកវិទ្យាស្ថានគរុកោសល្យរាជធានីភ្នំពេញ បន្ថែមទៀតថា សមិទ្ធិផលដ៏មានសារៈសំខាន់នេះនឹងក្លាយជាមូលដ្ឋានគ្រឹះដ៏រឹងមាំសម្រាប់ការកសាងធនធានគ្រូបង្រៀន ឱ្យមានជំនាញបង្រៀនមុខវិជ្ជាឯកទេសសុខភាពសិក្សានៅប្រទេសកម្ពុជាទៅថ្ងៃអនាគត សំដៅលើកកម្ពស់សុខភាពកុមារ ក៏ដូចជាសិស្សានុសិស្សកម្ពុជាឱ្យកាន់តែមានភាពប្រសើរឡើង៕
