ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កំពង់ឆ្នាំង – ខេត្តកំពង់ឆ្នាំងបានក្លាយជាខេត្តទី៥ នៅកម្ពុជា ដែលបញ្ឈប់ការបន្ទោបង់ពាសវាលពាសកាលទាំងស្រុង (ខេត្ត ODF) និងបានប្រកាសទទួលស្គាល់ជាផ្លូវការដោយក្រសួងអភិវឌ្ឍន៍ជនបទ នៅថ្ងៃទី២០ ខែមិថុនា ឆ្នាំ២០២៣ ។ តាមរយៈវឌ្ឍនភាពការងារលើកកម្ពស់ទឹកស្អាតនិងអនាម័យនេះ ក្រសួងអភិវឌ្ឍន៍ជនបទជឿជាក់ថា ប្រជាជនទូទាំងខេត្តកំពង់ឆ្នាំងនឹងរស់នៅក្នុងបរិស្ថានល្អ ព្រមទាំងទទួលបានការអប់រំអនាម័យសុខភាពជនបទបានត្រឹមត្រូវ ។ លទ្ធផលវិជ្ជមាននេះនឹងរួមចំណែកលើកកម្ពស់សេដ្ឋកិច្ច និងសុខុមាលភាពរបស់ប្រជាពលរដ្ឋ ។
ឯកឧត្តម សួស គង់ រដ្ឋលេខាធិការប្រចាំការ នៃក្រសួងអភិវឌ្ឍន៍ជនបទ មានប្រសាសន៍ថា ខេត្តកំពង់ឆ្នាំងសម្រេចលទ្ធផលបញ្ចប់ការបន្ទោបង់ពាសវាលពាសកាលទាំងស្រុងក្នុងឆ្នាំ២០២៣ ជាមោទនភាពបំផុតរបស់រដ្ឋបាលខេត្តកំពង់ឆ្នាំងទាំងមូល ។ ខេត្តកំពង់ឆ្នាំងបានអនុវត្តសកម្មភាពការងារឆ្លើយតបតាមចក្ខុវិស័យរបស់រាជរដ្ឋាភិបាលកម្ពុជា នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវមានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យ ប្រកបដោយនិរន្តរភាព ។
ស្របគ្នានេះដែរ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានឱ្យដឹងថា គិតត្រឹមចុងឆ្នាំ២០២២ ខេត្តកំពង់ឆ្នាំងមានខ្នងផ្ទះចំនួន ១១៦, ៦៤៨ ខ្នងមានបង្គន់អនាម័យប្រើប្រាស់ បើធៀបនឹងខ្នងផ្ទះសរុបចំនួន ១៩៥, ៤០៦ ខ្នងផ្ទះ ។ រីឯខ្នងផ្ទះប្រើបង្គន់អនាម័យរួមគ្នាមានចំនួន ១១, ២០២ ខ្នង ខណៈចំនួនខ្នងផ្ទះមានកន្លែងលាងសម្អាតដៃនឹងសាប៊ូស្មើនឹង ១០០ភាគរយនៃចំនួនខ្នងផ្ទះសរុប ។ ចំណែកខ្នងផ្ទះមានទឹកស្អាតសម្រាប់ហូបនិងប្រើប្រាស់មានចំនួន ១០២, ២៨០ខ្នង ស្មើនឹង ៨០ភាគរយនៃចំនួនខ្នងផ្ទះសរុបដូចគ្នា ។
សូមជម្រាបថា ខេត្តកំពង់ឆ្នាំងជាខេត្តគោលដៅបញ្ចប់ការបន្ទោបង់ពាសវាលពាសកាលមួយ (ខេត្ត ODF) ក្នុងចំណោមខេត្តគោលដៅទាំងប្រាំ ដែលក្រសួងអភិវឌ្ឍន៍ជនបទគ្រោងសម្រេចលទ្ធផលការងារខេត្ត ODF ត្រឹមដំណាច់ឆ្នាំ២០២៣ រួមមាន ខេត្តស្វាយរៀង ព្រៃវែង កែប កំពង់ឆ្នាំង និងខេត្តកំពង់ស្ពឺ ។ គិតត្រឹមពាក់កណ្តាលឆ្នាំ២០២៣ កម្ពុជាសម្រេចលទ្ធផលខេត្ត ODF បានចំនួនប្រាំ រួមមាន ខេត្តស្វាយរៀង ព្រៃវែង កណ្តាល ខេត្តកំពង់ស្ពឺ និងខេត្តកំពង់ឆ្នាំង ខណៈខេត្តកែបកៀកនឹងបញ្ចប់ការបន្ទោបង់ពាសវាលពាសកាលតាមផែនការនៅរវាងពាក់កណ្តាលឆ្នាំ២០២៣ នេះដែរ ៕
