ការពង្រឹងសុខភាពសិក្សា និងការអនុវត្តន៍គោលនយោបាយស្តង់ដាសាលារៀនគំរូ គឺសាលានីមួយៗ មានជម្រើសក្នុងការបង្ហាញអំពីស្តង់ដារៀងៗខ្លួន ដោយហេតុថា បើធ្វើសកម្មភាពទាំងអស់ វាលំបាកនឹងសម្រេចនូវលទ្ធផល ថែមទាំងខុសពីស្ថានភាពជាក់ស្ដែង។ ចំពោះសាលា ដែលមិនមានលទ្ធភាព អាចរៀបចំទាក់ទងនឹងមណ្ឌលសុខភាព ផ្តល់ថ្នាំបង្ការទម្លាក់ព្រូន បង្កើនអនាម័យសាលា មានបន្ទប់ទឹកស្អាត សាលារៀនគ្មានសំរាម ដែលសកម្មភាពទាំងនេះ ក៏ជាយុទ្ធនាការ របស់សម្តេចធិបតីដែរ។ នេះជាប្រសាសន៍របស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន​ និងកីឡា តាមរយៈបទបង្ហាញស្តង់ដាសាលារៀនគំរូកាលពីពេលថ្មីៗនេះ។

លោកបណ្ឌិតបញ្ជាក់បន្ថែមថា បន្ទប់សុខភាពសិក្សា អាចធ្វើជាស្តង់ដាធំក៏បាន ឬមួយក៏ត្រឹមតែកម្រិតអនាម័យដែលមានបង្គន់ស្អាត មានទឹកប្រើប្រាស់គ្រប់គ្រាន់ សម្អាតជាប្រចាំ មានកន្លែងសម្រាប់លាងដៃ។ ទន្ទឹមគ្នានោះ ត្រូវមានការយកចិត្តទុកដាក់ និងការដាក់បញ្ចូលអំពីមេរៀនអនាម័យ និងមានទាំងសៀវភៅឯកសារសម្រាប់អានបន្ថែមទៀត។ យ៉ាងណាមិញ រាល់សកម្មភាពដែលបានរៀបរាប់ទាំងអម្បាលមានខាងលើនេះ លោកបណ្ឌិតបានឱ្យដឹងថា សាលាអាចមានជម្រើស ឬជ្រើសរើសយកទៅអនុវត្តន៍ជាក់ស្ដែង និងស្របទៅតាមស្ថានភាព។

ឯកឧត្តមបណ្ឌិតសភាចារ្យរដ្ឋមន្ត្រីក្រសួងអប់រំ យុវជន​ និងកីឡា បានអធិប្បាយបន្តថា ក្រៅពីការគ្រប់គ្រងរដ្ឋបាលសាលារៀន និងគណនេយ្យភាព ឬការតេស្ដង់ដាជាដើម ចំណុចទាំងអស់នេះ វាបានបញ្ជាក់ពីសមាសភាព។ បន្ថែមពីនោះ បណ្ឌិតសភាចារ្យ បានស្នើប្រធានគម្រោងតម្រឹមផែនការសកម្មភាព តម្រង់ទិសឆ្ពោះទៅកាន់សាលាគំរូ ប៉ុន្តែសកម្មភាពទាំងនោះ មិនត្រូវចាកឆ្ងាយពីខ្លឹមសារ ឬឯកសារគម្រោងនោះទេ ។

ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន​ និងកីឡា បានរំលឹកថា នាយកដ្ឋាននីមួយៗត្រូវតម្រង់ទិសដើម្បីជួយគាំទ្រ ហើយប្រធានមន្ទីរនីមួយៗ ក៏ត្រូវតម្រង់ទិសជួយគាំទ្រដែរ។ ហើយចំពោះនាយកសាលាទាំងអស់ មានតួនាទីតម្រង់ទិសដៅអនុវត្តន៍សកម្មភាពជាក់ស្ដែង។

សាលាដែលអនុវត្តន៍នឹងមានការលើកទឹកចិត្ត ទទួលបានប្រាក់ឧបត្ថម្ភបន្ថែម និងការទទួលស្គាល់…

ឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន​ និងកីឡា

ឯកឧត្តមរដ្ឋមន្ត្រីក្រសួងអប់រំបញ្ជាក់បន្ថែមថា ការវាស់វែង គឺមានពីរបែប ដោយចំណុចទីមួយ គិតទៅលើ សាលាដែលមានសិស្សជាប់និទ្ទេសល្អ (A, B, C) ក្នុងចំនួនច្រើន និងចំណុចមួយទៀតគឺ ទោះបីក្នុងសាលា អត់មានសិស្សនិទ្ទេស A ក្នុងភាគរយដែលស្ដង់ដាសាលារៀនគំរូកំណត់ ប៉ុន្តែបើក្នុងករណី មានសិស្សដែលមានអត្រាជាប់មួយរយភាគរយ ចាប់ពី៩៥ភាគរយ ឬ៩០ភាគរយ និងលើសអត្រាថ្នាក់ជាតិ៧២ភាគរយ នោះក៏អាចកំណត់បានថាស្ថិតនៅក្នុងស្តង់ដាសាលាគំរូហើយ ៕