នៅក្នុងពិធិបើក កម្មវិធីអាហារូបករណ៍រដ្ឋាភិបាលអូស្ត្រាលីឆ្នាំ២០២៦ កាលពីចុងសប្តាហ៍កន្លងទៅនេះ ឯកឧត្តម សោម រតនា អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា ប្រជាជនកម្ពុជាជាច្រើនរូបមានឱកាសបានទៅបន្តការសិក្សានៅប្រទេសអូស្ត្រាលី និងបាននាំយកចំណេះដឹងយ៉ាងទូលំទូលាយមកអនុវត្តន៍ក្នុងវិស័យការងាររបស់ខ្លួន ដែលជាចំណែកជួយពង្រឹងសមត្ថភាពរបស់ពួកគេឱ្យកាន់តែខ្លាំង និងមានការទទួលស្គាល់ពីថ្នាក់ដឹកនាំផងដែរ។

បើតាមឯកឧត្ដម សោម រតនា រយៈពេល៣០ឆ្នាំនៃការគាំទ្ររវាងរដ្ឋាភិបាលអូស្ត្រាលី មកកាន់កម្ពុជា តាំងពីឆ្នាំ១៩៩៤ ដល់ឆ្នាំ២០២៥ អាហារូបករណ៍អូស្ត្រាលី ឬហៅថា AAC (Australia Award Cambodia) មាននិស្សិតជាងមួយពាន់នាក់ទៅបន្តការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ហើយការសិក្សាទៀតសោតមានទាំងបុគ្គលិកឯកជន សាធារណៈជន និងមន្ត្រីរាជការក្នុងជួររដ្ឋាភិបាលផង។

តាមរយៈការផ្ដល់ជូនជារៀងរាល់ឆ្នាំ កម្មវិធីអាហារូបករណ៍អូស្ត្រាលីឆ្នាំ២០២៦ នឹងផ្ដល់ឱកាសសិក្សាចំនួន៥៥កន្លែង ដូចនេះ ឯកឧត្ដម សោម រតនា សូមលើកទឹកចិត្តដល់សាធារណៈជន ជាពិសេសមន្ត្រីរាជការកម្ពុជាគ្រប់រូប សាកល្បងចាប់យកឱកាសសិក្សានៅក្រៅប្រទេស តាមរយៈអាហារូបករណ៍អូស្ត្រាលី ធ្វើជាបទពិសោធន៍ថ្មីៗ និងជាច្រើនសម្រាប់យកទៅអនុវត្តន៍ក្នុងការងារក្រោយបញ្ចប់ការសិក្សា។

ក្នុងឱកាសនោះដែរ លោកជំទាវ សុខ ច័ន្ទឆវី រដ្ឋលេខាធិការក្រសួងកិច្ចការនារី មានប្រសាសន៍ថា តាមរយៈកម្មវិធីអាហារូបករណ៍អូស្ត្រាលីនេះ នឹងផ្ដល់ឱកាសជាច្រើនដល់និស្សិត ជាពិសេសស្ត្រីឱ្យមានឱកាសបង្កើនសមត្ថភាព និងឈានទៅរកភាពជាអ្នកដឹកនាំស្ត្រីនៅក្នុងតួនាទីជាមន្ត្រីរាជការ។ ជាមួយគ្នានេះ លោកជំទាវក៏​សូមអំពាវនាវ និងលើកទឹកចិត្តដល់មន្ត្រីរាជការកម្ពុជា ជាពិសេសស្ត្រី ចាប់យកឱកាសអាហារូបករណ៍អូស្ត្រាលីនេះ ឱ្យបានច្រើនព្រោះនេះជាឱកាសដែលអាចពង្រឹងសមត្ថភាពរបស់ខ្លួនតាមរយៈ ការអប់រំបន្ថែមពីសាកលវិទ្យាល័យក្រៅប្រទេស ឱកាសបង្កើនទំនាក់ទនងជាមួយបណ្ដានិស្សិតមកពីជុំវិញពិភពលោក និងទទួលបានការចែករំលែកបទពិសោធន៏ និងត្រឡប់មកអភិវឌ្ឍប្រទេសជាតិវិញតាមរយៈការអនុវត្តការងារនៅក្នុងជំនាញរបស់ខ្លួន។

ក្នុងនាមតំណាងឱ្យ ក្រសួងអប់រំ យុវជន និងកីឡា ឯកឧត្តម សោម រតនា ក៏​បានថ្លែង​អំណរគុណដល់ថ្នាក់ដឹកនាំប្រទេសអូស្ត្រាលី និងដៃគូរពាក់ព័ន្ធដែលចូលរួមផ្ដល់ឱកាស និងបង្កើនធនធានមនុស្សនៅកម្ពុជា។ តាមរយៈភាពជាដៃគូយូរអង្វែងរបស់រដ្ឋាភិបាលកម្ពុជា និងរដ្ឋាភិបាលអូស្ត្រាលី ចូលរួមជាមួយរាជរដ្ឋាភិបាលកម្ពុជាគ្រប់អាណត្តិ នៅក្នុងយុទ្ធសាស្ត្រអភិវឌ្ឍជាតិ ក្នុងការអភិវឌ្ឍធនធានមនុស្ស និងមូលធននិយមលើគ្រប់វិស័យ ជាពិសេសក្នុងវិស័យអប់រំ តាមរយៈផ្ដល់អាហារូបករណ៍ដល់សិស្ស និស្សិត និងមន្ត្រីរាជការកម្ពុជាជាច្រើនកន្លែង៕