លោក ឆេង សុភ័ក្រ្ត ដែល​គ្រប់គ្នាស្គាល់ថា ជាស្ថាបនិក “រៀនថត Rean Thort” បានលើកឡើងនៅ​ចំពោះ​មុខសិស្ស​និស្សិតដែល​កំពុងត្រៀម​បន្ត​ការសិក្សា​នៅសាកលវិទ្យាល័យថា អាជីព​ដែល​ធ្វើ​ឱ្យ​លោក​មានអ្វីគ្រប់យ៉ាង គឺជា​មុខ​ជំនាញ​ដែល​លោកចង់ទៅ​រៀន​រាល់ថ្ងៃ។

ក្នុងកម្មវិធី Winning University Life 2025 ដែល​រៀបចំឡើង​ដោយ​សាកលវិទ្យាល័យ​បញ្ញាសាស្រ្ត​កាលពីចុងសប្តាហ៍​កន្លងទៅនេះ ស្ថាបនិក “រៀនថត Rean Thort” បន្ថែមថា សិស្សនិស្សិត គួរជ្រើសរើសរៀនជំនាញដែលខ្លួនស្រឡាញ់ ដើម្បីចាប់យកអាជីពដែលខ្លួនចង់ធ្វើពេញមួយជីវិត ព្រោះជំនាញដែលយើងជ្រើសរើស នឹងក្លាយជាអាជីពដែលយើងធ្វើពេញមួយជីវិត។

“ដូច្នេះ ប្អូនៗសិស្សានុសិស្ស ត្រូវជ្រើសរើសជំនាញណាដែលអាចចិញ្ចឹមខ្លួនឯងរស់ ហើយកុំរើសជំនាញតាមគេឱ្យសោះ”

លោក ឆេង សុភ័ក្រ្ត ត្រូវ​គេដឹងថា គឺជាយុវជនកម្ពុជាម្នាក់ដែលជំនះឧបសគ្គ និងខិតខំតស៊ូរៀនសូត្ររហូតជាប់អាហារូបករណ៍ទៅរៀននៅប្រទេសន័រវែស រួចក៏បន្តជាប់អាហារូបករណ៍៣លើក ទៅសិក្សានៅសហរដ្ឋអាមេរិក។ លោក សុភ័ក្រ្ត និយាយថា កាលជំនាន់ដែលលោករៀន គឺមិនទាន់មានការរីកចម្រើនផ្នែកបច្ចេកវិទ្យានោះឡើយ ប៉ុន្តែដោយសារការសិក្សាស្រាវជ្រាវ លោកកត់សម្គាល់ថា ជំនាញអភិវឌ្ឍកម្មវិធី (App Developer) នឹងឆ្លើយតបទីផ្សារការងារនៅពេលអនាគត ហេតុនេះលោកក៏សម្រេចចិត្តរៀនជំនាញ វិទ្យាសាស្រ្តកុំព្យូទ័រ (Computer scient)។ តែសិក្សា​បានត្រឹមឆ្នាំទី២ លោក​ក៏ប្ដូរទៅរៀនជំនាញទស្សវិជ្ជាវិញ ព្រោះតែលោកខ្សោយមុខវិជ្ជាគណិតវិទ្យា និងមិនចង់ដាក់សម្ពាធលើខ្លួនឯង។

ស្ថានិករៀនថត បន្ថែមថា នៅពេលលោករៀនជំនាញទស្សវិជ្ជារហូតដល់ឆ្នាំទី៣ ក៏មានថ្នាក់ថ្មីផ្នែកថតរូប ដែលធ្វើឱ្យរូបលោកចាប់អារម្មណ៍ចង់រៀនខ្លាំងបំផុត ហើយស្ទើរតែមិនបានចូលរៀនព្រោះអស់ឱកាសប្ដូរជំនាញ។ ប៉ុន្តែលោកបានរកវិធីសាស្រ្តស្នើសុំសាលា ដើម្បីបានរៀនថតរូប ទោះត្រូវរៀនបន្ថែមម៉ោងយ៉ាងណាក៏យល់ព្រម។

“ពីថ្នាក់រៀនដែលខ្ញុំធ្លាប់តែទៅរៀនទាំងភ័យខ្លាច ទៅជាថ្នាក់រៀនដែលខ្ញុំសប្បាយចិត្តក្នុងការរៀនថតរូប”

លោក ឆេង សុភ័ក្រ្ត បន្ថែមថា ការជ្រើសរើសជំនាញឱ្យបានត្រឹមត្រូវនៅសាកលវិទ្យាល័យ វាកើតចេញពីក្ដីស្រឡាញ់ ការស្រាវជ្រាវអំពីអត្ថប្រយោជន៍ និងឱកាសការងាររបស់ជំនាញនោះ។ ជាមួយគ្នា​លោក ឆេង សុភ័ក្រ្ត ក៏បានផ្ដាំផ្ញើ​ទៅ ប្អូនៗសិស្សានុសិស្ស នៅពេលចង់ជ្រើសរើសរៀនជំនាញណាមួយ ត្រូវចេះសួរយោបល់ពីឪពុកម្ដាយ លោកគ្រូ អ្នកគ្រូ មិត្តភក្ដិ និងចេះទាញប្រយោជន៍ពីបច្ចេកវិទ្យា (សួរបច្ចេកវិទ្យា) ហើយប្រសិនបើជ្រើសរើសជំនាញខុស ត្រូវហ៊ានផ្លាស់ប្ដូរ ព្រោះជំនាញដែលយើងរើស យើងនឹងធ្វើការជាមួយវាអស់មួយជីវិត៕