អគ្គនាយកនិយ័តករមូលបត្រ​កម្ពុជា (ន.ម.ក.) ឯកឧត្តម ស៊ូ សុជាតិ លើកទឹកចិត្ត​ដល់​សិស្សានុសិស្ស​ទាំងអស់​ចាប់ផ្តើម​បណ្តុះគំនិត និង​បង្កើត​ទម្លាប់សន្សំ ក៏​ដូចជា​រៀន​វិនិយោគ​ពីវ័យក្មេងទៅ ដើម្បី​អភិវឌ្ឍចំណេះ​ដឹង​ផ្នែកហិរញ្ញវត្ថុរបស់ខ្លួន​ឱ្យ​បានល្អ។

ការលើកឡើងរបស់ ឯកឧត្តម ស៊ូ សុជាតិ​ បានធ្វើ​ឡើងក្នុង​ឱកាស​អញ្ជើញ​ជាអធិបតីក្នុងសិក្ខា​សាលា​ផ្សព្វផ្សាយស្តីពី “ការលើក​កម្ពស់​ការ​យល់ដឹងអក្ខរ​កម្ម​ហិរញ្ញវត្ថុ នៃវិស័យ​មូលបត្រ” ដល់សិស្សានុសិស្សនៃបណ្តាញ​សាលា​រៀន​វ៉េស្ទឡាញន៍ កាលពីដើមសប្តាហ៍នេះ។

ឧកញ៉ា ប៉ិច បូឡែន អគ្គនាយកបណ្តាញគ្រឹះអប់រំ វេសឡាញ អេឌ្យូខេសិន គ្រុប លើកឡើងថា “ក្រៅពីអនុវត្តតាមកម្មវិធីសិក្សាគោលរបស់ក្រសួងអប់រំ យុវជន និងកីឡា បណ្តាញសាលារៀនវេសឡាញក៏​បានបន្ថែមកម្មវិធីគាំទ្រ និងកម្មវិធីសិក្សាអមដែលនាំមកពីក្រៅប្រទេស ដែលផ្តោតសំខាន់លើការអភិវឌ្ឍបុគ្គលលក្ខណៈ ការប្រាស្រ័យទាក់ទង បំណិន ជីវិត វប្បធម៌ចម្រុះ ដើម្បីប្រាកដប្រជាថា សិស្សអាចសម្របសម្រួលខ្លួនរស់នៅប្រកបអាជីវកម្ម និងបំពេញការងារក្នុងមជ្ឈដ្ឋានប្រទេសកម្ពុជា និងអន្តរជាតិ។

លោកឧញ៉ា មានប្រសាសន៍បន្ថែមទៀត “ក្នុងកម្មវិធីសិក្សាអមនោះ ក៏មានកម្មវិធីបណ្តុះបណ្តាលចំណេះដឹងផ្នែកហិរញ្ញវត្ថុ សេដ្ឋកិច្ច និងសហគ្រិន សម្រាប់សិស្សចាប់ពីថ្នាក់ទី១ ដល់ទី១២ ដែលជួយជំរុញសិស្សចេះសន្សំប្រាក់ ទប់ទល់សម្ពាធសម្ភារនិយម ចេះគិតពិចារណាលើវត្ថុណាគួទិញនិងវត្ថុណាមិនគួរទិញ រៀនដេញថ្លៃសម្ភារ រៀនឈ្វេងយល់ពីប្រព័ន្ធធនាគារ និងការនិយោគក្នុងទីផ្សារភាគហ៊ុន ការចុះទស្សនកិច្ចសិក្សាតាមបណ្តាសហគ្រាសអាជីវកម្ម ព្រមទាំងរៀនពីរបៀបអនុវត្តគម្រោងអាជីវកម្មផងដែរ។”

សូមបញ្ជាក់ថា សិក្ខាសាលាស្តីពី “ការលើក​កម្ពស់​ការ​យល់ដឹងអក្ខរ​កម្ម​ហិរញ្ញវត្ថុ នៃវិស័យ​មូលបត្រ” ត្រូវបានរៀបចំឡើងដើម្បីបញ្រ្ជាបនូវចំណេះដឹងពាក់ព័ន្ធនឹងអក្ខរកម្មហិរញ្ញវត្ថុសម្រាប់សិស្សានុសិស្ស នៃសាលារៀន វ៉េស្ទឡាញន៍ ដែលជាទំពាំងស្នងឫស្សី ឱ្យចេះរៀបចំផែនការហិរញ្ញវត្ថុផ្ទាល់ខ្លួនសម្រាប់អនាគត និងការគ្រប់គ្រងហិរញ្ញវត្ថុរបស់ខ្លួនឱ្យបានជោគជ័យ និងចាប់ផ្តើមបណ្តុះទម្លាប់សន្សំ កត់ត្រា គ្រប់គ្រងការចំណាយឱ្យបានច្បាស់លាស់ និងវិនិយោគក្នុងវ័យសិក្សា ជាពិសេសផ្តល់សញ្ញាណ ដែលជាមូលដ្ឋានគ្រឹះ នៃវិស័យមូលបត្រ និងអត្ថប្រយោជន៍ក្នុងការចូលរួមវិនិយោគក្នុងវិស័យនេះ៕