លោកបណ្ឌិត តាន់ មុនីវណ្ណ អគ្គនាយករងក្រុមហ៊ុន ម៉ុង ឬទ្ធី គ្រុប បានលើកឡើងថា នៅក្នុងសង្គមបច្ចុប្បន្ន ការជជែកអំពីផែនការជីវិត ហាក់មិនសូវមានភាពទូលំទូលាយដូចផែនការដទៃនោះទេ បើប្រៀបទៅនឹងកិច្ចការអាជីវកម្ម និងគម្រោងនានា។ យ៉ាងណា ប្រសិនបើយើងធ្វើអ្វីមួយដោយគ្មានផែនការ នោះភាពលេចធ្លោ ឬភាពពូកែ គឺមិនអាចនឹងរះឡើងបានឡើយ។ ក្នុងនាមជាអ្នកមានបទពិសោធន៍ក្នុងអាជីវកម្ម លោកបញ្ជាក់ថា ការធ្វើផែនការ គឺរឿងល្អ មិនថាសម្រាប់ការរៀនសូត្រ ឬជីវិតនោះទេ។

ថ្លែងនៅក្នុងកម្មវិធីសិក្ខាសាលាប្រចាំឆ្នាំរបស់សាកលវិទ្យាល័យបញ្ញាសាស្ត្រកម្ពុជា ក្រោមប្រធានបទ “Winning University Life 2024″ លោកបណ្ឌិត តាន់ មុន្នីវណ្ណមើលឃើញថា ចំពោះសិស្សដែលដាក់ផែនការរៀន គឺនៅមានចំនួនតិចតួចនៅឡើយ នេះក៏ដោយសារតែភាពមិនច្បាស់លាស់នៃស្ថានភាពហិរញ្ញវត្ថុ ប៉ុន្តែអ្វីក៏ដោយ គឺត្រូវតែមានផែនការ។

លោកបន្តទៀតថា ដើម្បីមានមូលដ្ឋានគ្រឹះនៃការដាក់ផែនការ គឺត្រូវចូលរៀនបរិញ្ញាបត្រ ពីព្រោះចំណេះដឹងនៅថ្នាក់ឧត្តមមួយនេះ វានឹងផ្តល់ភាពងាយស្រួលក្នុងការធ្វើផែនការជីវិត។ ចំណែកចំណេះដឹងត្រឹមកម្រិតមធ្យមសិក្សាទុតិយភូមិវិញ ក៏អាចធ្វើបានដែរ គ្រាន់តែ វាមិនមានភាពពេញលេញ។

ជានិស្សិតក៏ត្រូវមានផែនការដែរ សូមកុំអាងតែមានស្ថានភាពគ្រួសារល្អ មានផ្ទះនៅល្អ មានគ្រួសារស្រឡាញ់ រួចក៏បំភ្លេចចោលនូវផែនការ ពីព្រោះផែនការ វាជាមជ្ឈដ្ឋានបង្កើនសេចក្តីប្តេជ្ញាខ្ពស់ និងជំរុញឱ្យយុវជនចាក់ចេញពីកន្លែងដែលមិនមានភាពប្រកួតប្រជែង (Comfort zone)

លោកបណ្ឌិត តាន់ មុនីវណ្ណ

ជាមួយគ្នានេះ លោកបណ្ឌិត តាន់ មុន្នីវណ្ណ បានផ្តល់ដំបូន្មានទៅដល់សិស្សនិស្សិតត្រូវចេះមើលមនុស្ស​ក្នុងការសេពគ​ប់ ដោយលោកលើកឡើងថា សៀវភៅ​មានសរសេរច្រើនណាស់ គឺក្រុមមនុស្សប្រើប្រាស់ជីវិតរស់នៅជាបីប្រភេទ ដែលមនុស្សកម្រិតទី១ មានរបៀបក្នុងការរស់នៅតាមដំណើរធម្មតាៗ ដែលមានន័យថា បានប៉ុន្មានក៏ទទួលយកប៉ុណ្ណោះ និងរស់នៅដោយគ្មានការកំណត់អ្វីនោះទេ, ចំណែកក្រុមមនុស្សទី២ ភាគច្រើនប្រើប្រាស់បញ្ញាណដើម្បីរស់នៅ ហើយក្រុមនេះមានភាពងាយស្រួលក្នុងការរស់នៅជាងក្រុមទី១, ចំណែកកម្រិតទី៣វិញ ការរស់នៅគឺមានសមត្ថភាពខ្ពស់ក្នុងការទទួលខុសត្រូវចំពោះរឿងដែលសំខាន់ៗ និងមានសមត្ថភាពដឹកនាំស្ថាប័នទៀតផង។ ការដឹងអំពីកម្រិតនៃមនុស្សក៏ដូចជាការសេពគប់មនុស្សត្រូវ ក៏ជាចំណែកមួយ ជួយឱ្យការចំណាយពេលប្រចាំថ្ងៃរបស់សិស្សនិស្សិតមានប្រសិទ្ធភាព និងជាការសម្រួចទៅកាន់ផែនការរស់នៅរបស់ខ្លួន។

លោកបណ្ឌិត តាន់ មុនីវណ្ណ បញ្ជាក់ថា ពេលវេលានិងផែនការមានសារៈសំខាន់ណាស់ក្នុងការដឹកនាំជីវិតរបស់យើង ហើយបើរៀបចំខុស គឺនឹងនាំឱ្យដំណើរជីវិតវាខុសទៅតាមនោះដែរ។ ជាទូទៅយើងប្រើពេលយ៉ាងហោចណាស់ប្រាំបីម៉ោងក្នុងមួយថ្ងៃទៅក្នុងសាលារៀន ឬកន្លែងការងារ, ដូច្នេះត្រូវប្រើវាឱ្យមានប្រសិទ្ធភាព និងគ្រប់គ្រងពេលវេលាឱ្យបានត្រឹមត្រូវ ពីព្រោះពេលវេលាមានតម្លៃជាងមាស ឬក៏ពេជ្រទៅទៀត៕