ដើម្បីឆ្លើយតបតម្រូវការមនុស្សធម៌ជាបន្តបន្ទាប់ នៅជំរំភៀសសឹកតាមតំបន់ព្រំដែនដែលរងផលប៉ះពាល់ដោយជម្លោះកម្ពុជា-ថៃ សហព័ន្ធអាល្លឺម៉ង់កំពុងផ្តល់មូលនិធិគាំទ្រជំនួយអាហារូបត្ថម្ភបន្ទាន់ ដែលអនុវត្តដោយអង្គការទស្សនៈពិភពលោកអន្តរជាតិប្រចាំកម្ពុជា ដើម្បីជួយកុមារ រួមទាំងស្រ្តីមានផ្ទៃពោះ និងស្រ្តីកំពុងបំបៅដោះកូន ដែលកំពុងរស់នៅសហគមន៍រងផលប៉ះពាល់ក្នុងខេត្តព្រះវិហារ សៀមរាប និងឧត្តរមានជ័យ។

បើតាមសេចក្តីប្រកាសព័ត៌មានកាលពីចុងសប្តាហ៍កន្លងទៅនេះ អង្គការទស្សនៈពិភពលោក បានអះអាងថា បច្ចុប្បន្ននេះ កុមារតូចៗ និងស្រ្តីមានផ្ទៃពោះ ឬស្រ្តីបំបៅដោះកូន កំពុងស្នាក់នៅជំរំជនភៀសសឹក ពឹងផ្អែកលើការផ្តល់ជំនួយជាអាហារ ដូចជា មីកញ្ចប់ ត្រីកំប៉ុង និងអង្ករជាដើម ខណៈអាហារទាំងនេះ គ្រប់គ្រាន់សម្រាប់ទ្រទ្រង់អាហារប្រចាំថ្ងៃ ប៉ុន្តែនៅតែមិនអាចបំពេញបាននូវតម្លៃអាហារូបត្ថម្ភដែលត្រូវការដើម្បីទ្រទ្រង់សុខភាពម្តាយ និងកុមារតូចៗនោះទេ។

ដើម្បីដោះស្រាយហានិភ័យទាំងនេះ គម្រោងបាននិងកំពុងផ្តល់អាហារបំប៉នដែលរួចរាល់អាចបរិភោគបានសម្រាប់ព្យាបាលកុមារកង្វះអាហារូបត្ថម្ភស្រួចស្រាល់មធ្យម (RUSF) និងកុមារកង្វះអាហារូបត្ថម្ភស្រួចស្រាល់ធ្ងន់ធ្ងរ (RUTF) អាយុក្រោម ៥ ឆ្នាំ (៦-៥៩ ខែ) ដែលត្រូវបានកំណត់តាមរយៈការស្រាវជ្រាវ។ ស្ត្រីមានផ្ទៃពោះ និងបំបៅដោះកូន ក៏នឹងទទួលបានអាហារបំប៉នមីក្រូសារជាតិច្រើន (MMS) ដែលមានជាតិដែក និងអាស៊ីតហ្វូលិក ដើម្បីទ្រទ្រង់សុខភាពមាតា។

លោកបណ្ឌិត Gidon Windecker អនុប្រធាននៃកិច្ចសហប្រតិបត្តិការអភិវឌ្ឍន៍ប្រចាំស្ថានទូតអាល្លឺម៉ង់ បានមានប្រសាសន៍ថា តាមរយៈការគាំទ្រជំនួយអាហារូបត្ថម្ភនេះ យើងគូសបញ្ជាក់ពីការប្តេជ្ញាចិត្តរបស់យើងក្នុងការការពារក្រុមដែលងាយរងគ្រោះបំផុត។ អន្តរាគមន៍នេះគឺជាផ្នែកមួយនៃគម្រោងជាបន្តបន្ទាប់ដែលអនុវត្តដោយប្រទេសអាល្លឺម៉ង់ នៅក្នុងវិស័យសុខស្បៀង សុខភាព និងការការពារសង្គម ដើម្បីលើកកម្ពស់ជីវភាពប្រជាពលរដ្ឋកម្ពុជា។ ការចូលរួមចំណែកនេះ គឺជាផ្នែកមួយនៃកិច្ចខិតខំប្រឹងប្រែងរបស់សហភាពអឺរ៉ុប។

បើតាមលោកបណ្ឌិត Gidon Windecker សហភាពអឺរ៉ុបបានផ្តល់ថវិកាចំនួន ៧០០.០០០ អឺរ៉ូ កាលពីខែមុន ដើម្បីឆ្លើយតបតម្រូវការមនុស្សធម៌ជាបន្ទាន់របស់សហគមន៍ដែលរងផលប៉ះពាល់។ ក្នុងនាមជាសមាជិកសហភាពអឺរ៉ុប និងជាអ្នករួមចំណែកដ៏ធំបំផុតមួយ អាល្លឺម៉ង់បំពេញកិច្ចខិតខំប្រឹងប្រែងរបស់សហភាពអឺរ៉ុបតាមរយៈការគាំទ្រទ្វេភាគីរបស់ខ្លួន។

លោក អ៉ីម៉ានូអ៊ែល ហ្គីនទីញ នាយកប្រចាំប្រទេសអង្គការទស្សនៈពិភពលោកប្រចាំនៅកម្ពុជា មានប្រសាសន៍ថា «ស្ត្រីមានផ្ទៃពោះ និងម្តាយទើបនឹងសម្រាលកូនត្រូវការការថែទាំ និងអាហារូបត្ថម្ភពិសេស ដើម្បីរក្សាភាពរឹងមាំ ជាសះស្បើយក្រោយសម្រាល និងផ្តល់អាហារបំប៉នល្អបំផុតសម្រាប់ទារក។ តាមរយៈការគាំទ្រទាន់ពេលវេលា កុមារអាចលូតលាស់ប្រកបដោយសុខភាពល្អ ម្តាយឆាប់មានភាពរឹងមាំឡើងវិញ ហើយគ្រួសារអាចមានភាពធន់ ទោះបីជាស្ថិតក្នុងស្ថានភាពភៀសសឹកក៏ដោយ។ កុមារគ្រប់រូបសមនឹងទទួលបានឱកាសមិនត្រឹមតែរស់រានមានជីវិតប៉ុណ្ណោះទេ ប៉ុន្តែដើម្បីលូតលាស់។

លោក អ៊ីម៉ានូអ៊ែល បញ្ជាក់ថា ការចិញ្ចឹមទារក និងកុមារ ត្រូវបានរំខានយ៉ាងធ្ងន់ធ្ងរ ដោយសារតែការប៉ះពាល់ផ្លូវចិត្ត ភាពតានតឹង និងកន្លែងស្នាក់នៅដែលមានមនុស្សច្រើន។ ម្តាយជាច្រើនរាយការណ៍ពីការលំបាកក្នុងការបំបៅកូនដោយទឹកដោះម្តាយ ហើយអ្នកថែទាំខ្លះងាកទៅរកការប្រើប្រាស់ផលិតផលជំនួស ដូចជាទឹកដោះគោកំប៉ុង ឬបបរធម្មតា។ ដូច្នេះហើយ ប្រសិនបើគ្មានការអន្តរាគមន៍ទាន់ពេលវេលាក្នុងការផ្តល់អាហារបំប៉នបន្ថែម អាហារបន្ថែមមីក្រូសារជាតិ ការផ្តល់ប្រឹក្សាអន្តរបុគ្គលស្តីពីអាហារូបត្ថម្ភមាតា ទារក និងកុមារតូច និងការតាមដាន រួមទាំងអន្តរាគមន៍អាហារូបត្ថម្ភជាមូលដ្ឋានដំបូងទេ នោះហានិភ័យនៃបញ្ហាកង្វះអាហារូបត្ថម្ភនៅកាន់តែខិតជិតពួកគេបំផុត។

យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បើទោះបីជាស្ថានភាពជម្លោះព្រំដែនបានស្ងប់ស្ងាត់ ប៉ុន្តែនៅមានបងប្អូនជនភៀសសឹកជាច្រើនទៀតមិនទាន់បានចាកចេញពីមណ្ឌលសុវត្ថិភាពនៅឡើយ។ បើតាមតួលេខ គិតត្រឹមដើមខែកញ្ញានេះ ជនភៀសសឹកក្នុងខេត្តទាំង៤ មានសរុបចំនួន ៦២៦២គ្រួសារ ស្មើនឹង ២០៦៩១នាក់ ក្នុងនោះជនភៀសសឹកដែលត្រឡប់ទៅលំនៅដ្ឋានវិញ មានចំនួន ៥៩៥គ្រួសារ៕