ធ្មេចបើក ធ្មេចបើក ពេលប្រឡងក៏កាន់តែខិតមកដល់​ នៅសល់មិនច្រើនថ្ងៃនោះទេ បេក្ខជនមួយចំនួនក៏បានត្រៀមខ្លួនរូចរាល់ ហើយបេក្ខជនមួយចំនួនទៀតក៏នៅមិនទាន់រួចរាល់ បើបែបនេះ តើគួរត្រៀមខ្លួនត្រៀមចិត្តបែបណាទៅ?

យុវតី ប៊ុន ដារ៉ាវត្តី អតីតសិស្សនិទ្ទេស A ឆ្នាំ២០២២ មកពីសាលាប៊ែលធីអន្តរជាតិ សាខាកាំកូស៊ីធី បច្ចុប្បន្ន ជានិស្សិតឆ្នាំទី២ សិក្សាជំនាញហិរញ្ញវត្ថុ និងធនាគារ នៃមណ្ឌលសិក្សាបច្ចេកទេសធនាគារ (CBS) និងជានិស្សិតជំនាញបច្ចកវិទ្យាហិរញ្ញវត្ថុ (Fintech)  នៃសាកលវិទ្យាល័យ ពាណិជ្ជសាស្រ្ត អេស៊ីលីដា បានចែករំលែកគន្លឹះត្រៀមខ្លួនមួយសប្ដាហ៍មុនប្រឡងបាក់ឌុប ដែលធ្វើ​ឱ្យ​រូបនាងជោគជ័យ​ក្នុងការ​ប្រឡង​។

យុវតី ប៊ុន ដារ៉ាវត្តី និយាយថា សម្រាប់ប្អូនៗដែលជាបេក្ខជនប្រឡងបាក់ឌុបនាពេលខាងមុខនេះ ត្រូវតែព្យាយាមត្រៀមខ្លួនឱ្យរួចរាល់មុនពេលទៅប្រឡង ពោលគឺត្រៀមខ្លូនឱ្យរួចរាល់ទាំងកាយ ទាំងចិត្ត សម្រាប់ការប្រឡងនាពេលខាងមុខដែលកាន់តែខិតជិតមកដល់ ដើម្បីបញ្ចៀសអស់នូវភាពភ័យខ្លាច ភាពស្ទាក់ស្ទើរ និងមានភាពជឿជាក់ជាងមុន។

ក្នុងនាមជាសិស្សច្បងម្នាក់ យុវតី ប៊ុន ដារ៉ាវត្តី បន្តថា រូបគេបានដឹងច្បាស់ពីអារម្មណ៍កំឡុងពេលជិតប្រឡងនេះច្បាស់ណាស់ គឺសិស្សទាំងអស់គ្នាពេលនេះកំពុងភ័យនេះ ភ័យនោះ​ ភ័យខ្លាចខ្លូនឯងធ្វើមិនបានល្អ ភ័យខ្លាចកំឡុងពេលប្រឡង បានពិន្ទុមិនសូវល្អ និយាយរួម គឺភ័យគ្រប់យ៉ាង។ ដំណោះស្រាយដែលល្អគឺ ប្អូនៗដែលជាបេក្ខជនប្រឡងទាំងអស់ ត្រូវខិតខំប្រឹងប្រែងបន្ថែម ខំឱ្យអស់ពីសមត្ថភាព តាំងចិត្តឱ្យស្ងប់ កុំភ័យព្យាយាមសម្រួលអារម្មណ៍ ជាពិសេសនោះត្រូវតែថែរក្សាសុខភាពឱ្យបានល្អ ព្រោះសុខភាពល្អជាចម្បង។ ប្អូនត្រូវតែត្រៀមខ្លូនឱ្យបានរួចរាល់ ​កុំសម្រុករៀនដាច់យប់ពេក ត្រូវតែសម្រាកឱ្យបានគ្រប់គ្រាន់ សម្រាកខួរក្បាលខ្លះ បើសម្រុករៀនពេកអាចធ្វើឱ្យយើងឈឺបាន។

អតីតសិស្សនិទ្ទេស A ឆ្នាំ២០២២ រូបនេះ បញ្ជាក់បន្ថែមថា មួយសប្តាហ៍មុនប្រឡង ក៏ជាពេលវេលាមួយដែលបញ្ជាក់ថា បេក្ខជនទាំងអស់គ្នា គឺបានត្រៀមខ្លួនរួចរាល់ខ្លះហើយសម្រាប់ឈានជើងចូលសមរភូមិបាក់ឌុប ព្រោះថាបានរៀនតាំងពីដើមឆ្នាំហើយ។ បើតាមរយៈបទពិសោធន៍របស់ យុវតី ប៊ុន ដារ៉ាវត្តី វិធីសាស្រ្តត្រៀមខ្លួនមួយសប្តាហ៍មុនប្រឡងបាក់ឌុប គឺរំលឹកមេរៀនបន្ថែម ដោយត្រូវរំលឹកមេរៀនទាំងឡាយឱ្យចេះ ចាំស្ទាត់ ចាំឱ្យច្បាស់គ្រប់មុខវិជ្ជា ដោយប្រើសំណុំឯកសារដែលបានរៀបចំតាំងពីដើមឆ្នាំមក ។ លើសពីនេះ ធ្វើលំហាត់វិញ្ញាសាបាក់ឌុបឆ្នាំចាស់ៗ និងវិញ្ញាសាថ្មីដោយកំណត់នូវពេលវេលាទៅតាមកាលវិភាគបាក់ឌុប ដើម្បីអាចតេស្តដឹងសមត្ថភាពរបស់យើងផ្ទាល់ ធ្វើបែបនេះធ្វើឱ្យបន្សាំខ្លួនបាន ពេលទៅប្រឡងលែងសូវភ័យ។

ក្នុងឱកាសបុណ្យភ្ជុំបិណ្ឌឈប់សម្រាកនេះ ជាពេលដែលគេដើរលេងកំសាន្ត ឬទៅលេងស្រុកហើយ តែផ្ទុយទៅវិញក៏ជាពេលដែលបេក្ខជនថ្នាក់ទី១២កាន់តែជិតដល់ថ្ងៃប្រឡងដែរ។ យុវតី ប៊ុន ដារ៉ាវត្តី ក៏បានលើកទឹកចិត្ត ដល់សិស្សានុសិស្សដែលជាបេក្ខជនប្រឡងបាក់ឌុប ត្រូវតែចេះបែងចែកដោយខ្លូនឯងថា តើមួយណាជាភាពចាំបាច់សម្រាប់យើង រវាងប្រឡង និងការដើរលេង។ យុវតី ប៊ុន ដារ៉ាវត្តី បន្តថា ពិធីភ្ជុំបិណ្ឌភាគច្រើនគេទៅស្រុកជួបជុំបងប្អូន ជាជាងដើរលេងកំសាន្ត។ លើសពីនេះ ជាឱកាសមួយបានទៅធ្វើបុណ្យជួបជុំគ្រួសារ និងអាចបួងសួងសុំពរជ័យសម្រាប់ការប្រឡងនាពេលខាងមុខនេះដែរ។

សម្រាប់ យុវតី ប៊ុន ដារ៉ាវត្តី មួយសប្តាហ៍មុនប្រឡងមកដល់ សិស្សានុសិស្សត្រូវតែស្គាល់ខ្លួនឯងឱ្យច្បាស់ ត្រូវស្វែងយល់អំពីការប្រឡងលើមុខវិជ្ជានីមួយៗឱ្យបានច្រើន ដឹងពីតិចនិចក្នុងការយកពិន្ទុខ្ពស់តាមដែលអាចធ្វើបាន និងដឹងចំណុចណាជាសញ្ញាសម្គាល់ ដើម្បីបង្ការ និងមានភាពប្រុងប្រយ័ត្នខ្ពស់។ លើសនេះ គិតក្នុងផ្លូវវិជ្ជមានជានិច្ច  ដោយសារតែយើងបានត្រៀមខ្លួនយ៉ាងពេញលេញសម្រាប់ការប្រឡងរួចហើយ។ យើងត្រូវមានគំនិតថា “ការប្រឡងរបស់ខ្ញុំនឹងប្រព្រឹត្តិទៅប្រកបដោយភាពរលូន ហើយទទួលជោគជ័យត្រឡប់មកវិញជាក់ជាមិនខាន”។ ជាពិសេស ត្រូវគិតក្នុងផ្លូវវិជ្ជមានថា ខ្លួនឯងនឹងទទួលបាននិទ្ទេសល្អថែមទៀតផង។ អ្វីដែលខ្វះមិនបាន ត្រៀមសម្ភារៈប្រឡងឱ្យបានគ្រប់គ្រាន់រួមមាន ប៊ិច បន្ទាត់ ថ្នាំសង្កូវជាដើម។

អតីតសិស្សនិទ្ទេសA ឆ្នាំ២០២២ ក៏បានលើកទឹកចិត្តទៅដល់សិស្សប្អូនដែលត្រៀមប្រឡងនាពេលខាងមុខនេះ ខិតខំប្រឹងប្រែងអោយអស់ពីសមត្ថភាព តាំងចិត្តឱ្យស្ងប់ កុំភ័យ កុំបាក់ស្បាត ព្រោះថានរណាក៏ចេះភ័យដែរ។ លើសពីនេះ ត្រូវមានភាពជឿជាក់ មានក្តីសង្ឃឹមថា គេអាចធ្វើបាន យើងក៏អាចធ្វើបាន “និទ្ទេសAកំពុងរង់ចាំអ្នក”៕