ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈសាលារៀននៅទូទាំងប្រទេសនឹងបើកបវេសនកាលឆ្នាំសិក្សាថ្មី ២០២៥-២០២៦ នៅថ្ងៃទី១ វិច្ឆិកា, សាលារៀនចំនួន៥ ស្ថិតនៅក្នុងខេត្តបន្ទាយមានជ័យ ឧត្តរមានជ័យ និងខេត្តព្រះវិហារ នៅមិនទាន់អាចបើកបវេសនកាលឆ្នាំសិក្សាថ្មីនឹងគេបាននៅឡើយទេ ព្រោះសាលារៀនទាំងនោះនៅមានគ្រាប់មិនទាន់ផ្ទុះមិនទាន់បានរំដោះ អគារសិក្សារងការខូចខាត និងសិស្សកំពុងស្នាក់នៅក្នុងជំរុំមិនទាន់វិលត្រឡប់មកលំនៅដ្ឋានវិញ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា សាលារៀននៅទូទាំងប្រទេសបានត្រៀមលក្ខណៈរួចហើយ ក្នុងការបើកបវេសនកាលឆ្នាំសិក្សាថ្មី លើកលែងតែសាលារៀនចំនួន៥ ក្នុងនោះ១សាលាស្ថិតនៅក្នុងខេត្តបន្ទាយមានជ័យ ២សាលាស្ថិតនៅក្នុងខេត្តឧត្តរមានជ័យ និង២សាលាទៀតស្ថិតនៅក្នុងខេត្តព្រះវិហារ ដោយសារសាលាទាំងនោះរងផលប៉ះពាល់ខ្លាំងពីសង្រ្គាម ទាមទារឱ្យមានការពិនិត្យអាវុធជាតិផ្ទុះឱ្យបានម៉ត់ចត់។
ទោះយ៉ាងណាដើម្បីធានាដល់ការសិក្សារបស់សិស្សានុសិស្សនៅសាលារៀនដែលផលប៉ះពាល់នោះ បើតាមលោកជំទាវ ឃួន វិច្ឆិកា ក្រសួងអប់រំបានរៀបចំយន្តការ ដោយអនុញ្ញាតឱ្យសិស្សានុសិស្សចូលរៀននៅសាលាក្បែរនោះជាបណ្តោះអាសន្ន ក៏ដូចជារៀបចំឱ្យមានការរៀន និងបង្រៀនជាបណ្តុំនៅទីតាំងសុវត្ថិភាពថែមទៀត។ លោកជំទាវពន្យល់ថា ការសិក្សាជាបណ្តុំ គឺជាការប្រមូលផ្តុំសិស្សានុសិស្សនៅតាមភូមិ ទៅកាន់ទីតាំងសុវត្ថិភាព ហើយគ្រូបង្រៀនរបស់គាត់ផ្ទាល់ ឬគ្រូបង្រៀនស្ម័គ្រចិត្ត នឹងដឹកនាំការរៀន និងបង្រៀននេះ។
ជាមួយគ្នានេះ ក្រសួងអប់រំ ក៏នឹងផ្តល់ជាសៀវភៅ ឯកសារ និងសម្ភារៈ ដើម្បីគាំទ្រដល់ការសិក្សារបស់សិស្សានុសិស្សដែលស្ថិតនៅតំបន់រងផលប៉ះពាល់ខ្លាំងផងដែរ ដោយនៅថ្ងៃបើកបវេសនកាលនេះ ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា នឹងអញ្ជើញចុះទៅផ្ទាល់ ដោយនាំយកសម្ភារៈសិក្សាទាំងនោះទៅចែកជូនដល់សិស្សានុសិស្ស ក៏ដូចជាលោកគ្រូអ្នកគ្រូ។ លោកជំទាវបណ្ឌិត បន្តថា ក្នុ្ងនោះក៏មានការប្រគល់ថេបប្លេត ដល់សាលារៀនដែលមានការប៉ះពាល់ខ្លាំងដើម្បីឱ្យគ្រូ និងសិស្ស អាចប្រើប្រាស់បានសម្រាប់ដំណើរការរៀន និងបង្រៀនតាមអនឡាញ ឬប្រើថ្នាលឌីជីថល។
ជម្លោះព្រំដែនរវាងប្រទេសកម្ពុជា និងថៃ កាលពីចុងខែកក្កដា បានធ្វើឱ្យសាលារៀនមួយចំនួននៅតាមបណ្តោយព្រំដែន ត្រូវរងការខូចខាត, ក្នុងនោះអគារសាលារៀនខ្លះត្រូវបានបំផ្លាញដោយគ្រាប់ផ្លោង ក៏ដូចជាគ្រាប់ទម្លាក់ពីលើអាកាស ហើយសាលារៀនខ្លះមានគ្រាប់កាំភ្លើងធំធ្លាក់នៅបរិវេណសាលា ដែលមិនអាចធានាដល់សុវត្ថិភាពសិស្សានុសិស្ស។
ចំពោះសាលារៀនដែលរងផលប៉ះពាល់ពីសង្រ្គាមនៅតាមតំបន់ព្រំដែនកម្ពុជា-ថៃ នេះ ក្នុងសារលិខិតបើកបវេសនកាលឆ្នាំសិក្សា២០២៥-២០២៦ សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានស្នើដល់ក្រសួងអប់រំ យុវជន និងកីឡា ត្រូវសហការជាមួយអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្រ្គោះជនពិការដោយសារមីន ដើម្បីចុះពិនិត្យទីតាំងសាលារៀន វាយតម្លៃផលប៉ះពាល់ឱ្យបានគ្រប់ជ្រុងជ្រោយ និងតម្រូវឱ្យមានការបោសសម្អាតយុទ្ធភណ្ឌគ្រឿងផ្ទុះជាមុន មុននឹងគិតគូររៀបចំផែនការសាងសង់ និងជួសជុលសំណង់អគារឡើងវិញ ដោយរួមបញ្ចូលទាំងកម្មវិធីអប់រំផ្សព្វផ្សាយឱ្យមានការយល់ដឹងអំពីយុទ្ធភណ្ឌ គ្រឿងផ្ទុះ ដល់ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស ព្រមទាំងធ្វើការបោសសម្អាតជាមុន ដើម្បីធានាសុវត្ថិភាពដល់ដំណើរការរៀន និងបង្រៀន។
ចំពោះសាលារៀនដែលរងផលប៉ះពាល់ខ្លាំង និងមិនអាចដំណើរការរៀន និងបង្រៀនបាននៅក្នុងឆ្នាំសិក្សាថ្មីនេះ មន្ទីរអប់រំ យុវជន និងកីឡា និងគណៈគ្រប់គ្រងសាលារៀន ត្រូវជ្រើសរើសសាលារៀនដែលនៅជិត ហើយជាកន្លែងនៅជិតទីតាំងស្នាក់នៅរបស់សិស្សផងដែរ ដើម្បីបើកបវេសនកាលឆ្នាំសិក្សាថ្មី និងដំណើរការរៀន និងបង្រៀនជាបណ្តោះអាសន្ន។
ដោយឡែកសម្រាប់តំបន់ និងសាលារៀនដែលមិនអាចដំណើរការរៀន និងបង្រៀនបាន មន្ទីរអប់រំ យុវជន និងកីឡា ត្រូវសម្របសម្រួលជាមួយអាជ្ញាធរមានសមត្ថកិច្ច រៀបចំបង្កើតថ្នាក់រៀននៅតាមជំរំ ដូចជាជំរំវត្តពោធិ៍ ៥០០០ដើម និងទួលអណ្តែត ជាដើម តាមកម្រិតសិក្សាជាក់ស្តែង។
គួរជំរាបជូនថា ក្រសួងអប់រំ យុវជន និងកីឡា បានតៀមថវិកាប្រមាណ៥០ម៉ឺនដុល្លារ ដើម្បីជួសជុលអគារសិក្សានិងត្រៀមលក្ខណៈបើកដំណើរសាលារៀនទាំងនោះឡើងវិញ៕
