ក្រោមកិច្ចសហការជាមួយមន្ទីរអប់រំ យុវជន និងកីឡា ខេត្តរតនគិរី គម្រោងការលើកកម្ពស់គុណភាពសិក្សាសម្រាប់កុមារដែលបាត់បង់ឱកាសសិក្សានៅភូមិភាគឦសាននៃប្រទេសកម្ពុជា ហៅកាត់ថា EQUAL នឹងគាំទ្រដល់សិស្សដែលបាត់បង់ឱកាសសិក្សាចំនួន ៥៤០០ នាក់ឱ្យចូលរៀនឡើងវិញ ។ គម្រោងនេះមានគោលបំណងជួយដល់កុមារដែលបាត់បង់ឱកាសសិក្សា និងកុមារប្រឈមនឹងការបោះបង់ការសិក្សានៅខេត្តរតនគិរីឱ្យមានឱកាសបំពេញសិទ្ធិក្នុងការអប់រំរបស់ពួកគេតាមរយៈកម្មវិធីសិក្សាពីចម្ងាយតាមប្រព័ន្ធឌីជីថល ។

លោក យី គឹមថាន នាយករងប្រចាំប្រទេសទទួលបន្ទុកកម្មវិធី និងជានាយកប្រចាំប្រទេសស្តីទី នៃអង្គការភ្លែនអន្តរជាតិកម្ពុជា មានប្រសាសន៍ថា ផ្អែកលើទិន្នន័យប្រព័ន្ធតាមដានការអប់រំ និងព័ត៌មាន (EMIS) នៃខេត្តរតនគិរី ឆ្នាំ២០២១ -២០២២ បានឱ្យដឹងថា អត្រាចុះឈ្មោះរបស់កុមារ គឺមានចំនួន ៤៩,៦% អត្រាកុមារត្រួតថ្នាក់ គឺមានចំនួន ៥,៥% អត្រាកុមារឆ្លងមធ្យមសិក្សាបឋមភូមិមានចំនួន ៧៨,១% ហើយអត្រាឆ្លងមធ្យមសិក្សាទុតិយភូមិមានចំនួន ៧៧% ។ ផ្អែកលើទិន្នន័យនេះ ដៃគូរពាក់ព័ន្ធចាំបាច់ត្រូវបង្កើតគម្រោងការសិក្សាពីចម្ងាយតាមប្រព័ន្ធឌីជីថល ដើម្បីជាដំណោះស្រាយអក្ខរកម្មសម្រាប់កុមារនៅខេត្តរតនគិរី ។

លោក យី គឹមថាន បានបញ្ជាក់បន្ថែមថា គម្រោងលើកកម្ពស់គុណភាពសិក្សាសម្រាប់កុមារដែលបាត់បង់ឱកាសសិក្សានៅភូមិភាគឦសាននៃប្រទេសកម្ពុជា ត្រូវបានរៀបចំឡើងក្នុងគោលបំណងដោះស្រាយបញ្ហាសិទ្ធិទទួលបានការអប់រំរបស់ក្មេងស្រី និងកុមារបាត់បង់ឱកាសសិក្សាក្នុងសហគមន៍ដាច់ស្រយាល និងក្រីក្រក្នុងខេត្តរតនគិរី ។ គម្រោងនេះគាំទ្រជាពិសេសដល់ក្មេងស្រី និងក្មេងប្រុសដែលបានបាត់បង់ឱកាសសិក្សា ដើម្បីបង្កើនការចុះឈ្មោះចូលរៀន កាត់បន្ថយអត្រាបោះបង់ការសិក្សា អត្រាគង់វង្សរបស់សិស្ស និងពង្រឹងគុណភាពអប់រំ ។

សូមជម្រាបថា គម្រោង EQUAL នឹងរៀបចំបរិក្ខារសិក្សាតាមប្រព័ន្ធឌីជីថលនៅតាមសាលាអនុវិទ្យាល័យ និងវិទ្យាល័យចំនួន១០ ក្នុងស្រុកតាវែង ស្រុកអូរជុំ ស្រុកអង្គអណ្តូងមាស និងស្រុកវឿនសៃ ។ បរិក្ខារទាំងនោះរួមមាន កុំព្យូទ័រ ម៉ាស៊ីនបញ្ចាំង LCD និងការតភ្ជាប់អ៊ីនធឺណិតសម្រាប់ថ្នាក់រៀន។ គ្រូបង្រៀននៅក្នុងទីក្រុងនឹងបង្រៀននិងភ្ជាប់ទំនាក់ទំនងជាមួយសិស្សានុសិស្ស ។ សម្រាប់សាលាកម្រិតវិទ្យាល័យចំនួន ៨សាលា ត្រូវបង្រៀន ៤មុខវិជ្ជា រួមមានគណិតវិទ្យា គីមីវិទ្យា រូបវិទ្យា និងភាសាអង់គ្លេស ហើយសម្រាប់សាលាកម្រិតអនុវិទ្យាល័យចំនួន ២សាលា ត្រូវបង្រៀន ៣មុខវិជ្ជា រួមមាន គណិតវិទ្យា គីមីវិទ្យា និងភាសាខ្មែរ៕