ក្នុង​ពិធីសំណេះសំណាល​ជាមួយ​សិស្ស​ជ័យ​លាភី​ដែល​បាន​ប្រឡង​ជាប់​សញ្ញាបត្រ​មធ្យមសិក្សា​ទុតិយភូមិ (បាក់ឌុប) និទ្ទេស A ក្នុង​ខេត្តកំពត កាលពីចុងសប្តាហ៍កន្លង​ទៅនេះ ឯកឧត្តមឧបនាយករដ្ឋមន្រ្តី សាយ សំអាល់ បានលើកឡើងថា កិច្ចការ​អប់រំ​ ជា​កិច្ចការ​ដ៏​សំខាន់​ចាំបាច់​បំផុត​ដែល​តម្រូវ​ឱ្យ​មានការ​រួមគ្នា​ជួយ​ជ្រោមជ្រែង​លើកកម្ពស់​វិស័យ​នេះ​ឱ្យ​កាន់តែ​មាន​គុណភាព និង​ល្អប្រសើរ ដើម្បី​បង្កើត​មូលធន​មនុស្ស​សម្រាប់​ចូលរួម​អភិវឌ្ឍន៍​ប្រទេសជាតិ។

ឯកឧត្តម សាយ សំអាល់ បាន​សង្កត់ធ្ងន់​ថា អនាគត​របស់​កម្ពុជា​គឺ​ពឹងផ្អែក​លើ​សិស្សានុសិស្ស​ទាំងអស់ ដែលជា​ធនធាន​មនុស្ស​ដ៏​ល្អ ជា​គ្រាប់ពូជ​ដ៏​មាន​តម្លៃ​សម្រាប់​កសាង​និង​អភិវឌ្ឍន៍​ប្រទេសជាតិ​ឱ្យ​រស់រាន​មានជីវិត​ត​ជំនាន់។ ឯកឧត្តម​ក៏បាន​សម្តែង​នូវ​ក្តី​សង្ឃឹម​យ៉ាង​មុតមាំ​ថា នៅ​ឆ្នាំក្រោយៗ​ទៀត ខេត្ត​កំពត​នឹង​ទទួល​បាន​សិស្ស​ជ័យលាភី​និទ្ទេស A កើនឡើង​ច្រើនជាង​នេះ​បន្ថែមទៀត។

ក្នុង​ឱកាស​សំណេះសំណាល​នេះ​ដែរ ឯកឧត្តម​បាន​ផ្តល់​អនុសាសន៍​ដ៏​មាន​សារៈសំខាន់​ជាច្រើន​ដល់​សិស្ស​ជ័យលាភី ដោយ​ជំរុញឱ្យ​ប្អូនៗ​ក្រៅពី​ការសិក្សា​ក្នុង​ថ្នាក់រៀន គឺត្រូវរៀនពីសង្គមជុំវិញខ្លួន, ត្រូវរៀនរស់ក្នុងសង្គម, ត្រូវយល់ដឹងអំពីច្បាប់ទម្លាប់ផ្សេងៗនិងកិច្ចការឌីជីថល, ត្រូវថែរក្សាសុខភាពឱ្យបានល្អ, ត្រូវមានប្រាក់ចំណូលនិងចេះសន្សំប្រាក់, ត្រូវយល់ដឹងអំពីប្រព័ន្ធនយោបាយរបស់កម្ពុជា, ត្រូវយល់ដឹងអំពីវប្បធម៌អរិយធម៌របស់ខ្មែរ, មានវិចារណញ្ញាណចេះដឹងខុសត្រូវ, ត្រូវរៀនបន្សាំខ្លួនឯងទៅនឹងសង្គម, ត្រូវមានសីលធម៌ គុណធម៌ ព្រហ្មវិហារធម៌, យល់ដឹងពីវិធីសាស្រ្តថែទាំខ្លួន,ចេះគ្រប់គ្រងពេលវេលាឱ្យ​បានល្អ, ត្រូវចេះចូលរួមគ្រប់គ្រងផ្ទះសម្បែងឱ្យបានល្អ, មានភាពជាអ្នកដឹកនាំនិងធ្វើការជាក្រុម ដែលទាំងនេះសុទ្ធសឹងជាកត្តាសំខាន់ដើម្បីជំរុញ ឱ្យអនាគតរបស់ខ្លួននិងប្រទេសជាតិកាន់តែល្អប្រសើរ។

ឯកឧត្តមបន្តថា មានចំណេះដឹង បញ្ញា និងវិជ្ជាជីវៈមិនទាន់គ្រប់គ្រាន់នោះទេសម្រាប់គុណភាព នៃខ្សែជីវិតជាក់ស្តែងនៅក្នុងសង្គមជាតិ ក្នុងនោះប្អូនៗត្រូវមានសុជីវធម៌ សីលធម៌ គុណធម៌ ចរិយាមារយាទ អត់ធ្មត់តស៊ូព្យាយាម ជម្នះរាល់ការលំបាក និងដាក់គោលដៅឱ្យបានជាក់លាក់ ទើបអាចធ្វើឱ្យជីវិតអាចដើរលើផ្លូវមួយទៅកាន់អនាគតបានល្អប្រសើរ។ ទន្ទឹមនឹងនេះ ដើម្បីរត់ប្រណាំងជាមួយនឹងពិភពលោកបច្ចុប្បន្ន ការយល់ដឹងអំពីប្រព័ន្ធបញ្ញាសិប្បនិម្មិត (AI) គឺជាតម្រូវការចាំបាច់ដែលមិនអាចខ្វះបាន ដែលសាលារៀនកម្ពុជាត្រូវតែមាន៕