ការសិក្សា​នៅ​ថ្នាក់​មហាវិទ្យាល័យ គឺជា​ក្តីស្រមៃ របស់យុវជនជាច្រើន​, ប៉ុន្តែក្តីស្រមៃ​នេះ ភាគច្រើន​​ត្រូវ​បាន​រាំងស្ទះ​ដោយ​បញ្ហា​ប្រឈម​ធំ​មួយ នោះគឺឧបសគ្គ​ផ្នែក​ហិរញ្ញវត្ថុ។ ឥណទានសិក្សា ត្រូវ​បានគេចាត់ទុកថា គឺជា​ជំនួយ​ហិរញ្ញវត្ថុមួយ​​ដែល​កំពុង​ជួយ​និស្សិត​ដែលមាន​ជីវភាពខ្វះខាត សម្រាប់​បង់ថ្លៃសាលា ក៏​ដូចសម្រាប់ទិញ​សម្ភារៈចាំបាច់​នានា​ក្នុងការសិក្សា​នៅ​មហាវិទ្យាល័យជាដើម ។ បច្ចុប្បន្ន​មានធនាគារ ក៏​ដូចជា​មីក្រូហិរញ្ញវត្ថុ​​មួយ​ចំនួន កំពុង​ដំណើរ​ការ​ឥណទាន​សិក្សា​នេះ ប៉ុន្តែមាន​សិស្ស​និស្សិតតិចតួចប៉ុណ្ណោះ​ដែល​បាន​ដឹង​ពីវត្តមានរបស់វា។

លោក កុក ថា អគ្គនាយកគ្រឹះស្ថាន អេហ្វអេចអេហ្វ ឃែភីថល ម.ក បានលើកឡើងថា ឥណទានសិស្ស-និស្សិត ត្រូវបានស្ថាប័នរបស់លោក​បង្កើតឡើងកាលពីចុងឆ្នាំ២០២៤ ដើម្បីលើកស្ទួយវិស័យអប់រំ និងកសាងធនធានមនុស្សនៅព្រះរាជាណាចក្រកម្ពុជា តាមរយៈការជួយដល់សិស្ស និស្សិតក្រីក្រដែលមានបំណងចង់បន្តការសិក្សា រៀនជំនាញ និងពង្រឹងសមត្ថភាពជាដើម។

តាមរយៈ ឥណទានសិស្ស-និស្សិត នេះ សិស្សអាចស្នើ​កម្ចីសម្រាប់បង់ថ្លៃសិក្សា រៀនជំនាញវិជ្ជាជីវៈ វគ្គខ្លី រៀនភាសា ទិញសម្ភារៈសិក្សាដូចជាកុំព្យូទ័រ ទូរស័ព្ទដែលមានតម្លៃសមរម្យក្នុងគោលបំណងសិក្សា ដោយសិស្ស​ និស្សិត អាចស្នើកម្ចីរហូតដល់៤លានរៀល ឬ១០០០ដុល្លារអាមេរិក។

បើតាម​លោក កុក ថា បច្ចុប្បន្ននេះ មានសិស្ស និស្សិត ក៏​ដូចជា​ឪពុកម្តាយ និងអាណាព្យាបាលរបស់សិស្ស និស្សិត មានសរុប ១៧៨នាក់ហើយ បាន​មក​ទទួល​យកឥណទាន​សិស្ស-និស្សិត ដែល​សរុបជាទំហំឥណទានស្មើនឹង ១២៣,២៥៥ដុល្លារអាមេរិក។

លោក ង៉ែត យូដារិត អនុប្រធានបណ្ឌិត្យសភាបច្ចេកវិទ្យាឌីជីថលកម្ពុជា (CADT) មានប្រសាសន៍ថា នៅ CADT ក៏​មានកម្ចីសិក្សាចំនួន ២ប្រភេទ សម្រាប់សិស្សនិស្សិតដែលអាចចាប់យកឱកាសសិក្សាជំនាញបច្ចេកវិទ្យាឌីជីថល ប៉ុន្តែមិនមានលទ្ធភាពគ្រប់គ្រាន់។ បើតាម​លោក យូដារិត កម្ចីសិក្សាទី១ គឺកម្ចីសិក្សាជាមួយធនាគារហ្វីលីព និងទី២ គឺកម្មវិធីអភិវឌ្ឍន៍ជំនាញឌីជីថល។

តាមរយៈកម្ចីសិក្សាទាំង២ប្រភេទនេះ និស្សិតអាចខ្ចីយកទៅបង់ថ្លៃសិក្សាសម្រាប់ថ្នាក់បរិញ្ញាបត្រជំនាញបច្ចេកវិទ្យា​ឌីជីថល​រយៈពេល៤ឆ្នាំ ដោយមិនគិតការប្រាក់។ ហើយ​សិស្ស​និស្សិតនឹង​ធ្វើ​ការសងត្រឡប់ទៅកាន់គ្រឹះស្ថានសិក្សា ឬសាកលវិទ្យាល័យវិញ ក្នុង​ចំនួន​ទឹកប្រាក់ប្រមាណ១០០ដុល្លារអាមេរិកប៉ុណ្ណោះក្នុងមួយខែ ប្រសិន​បើ​ពួកគាត់មានប្រាក់ខែលើសពី៥០០ដុល្លារក្នុងមួយខែ ឬបង់ត្រឡប់ទៅកាន់គ្រឹះស្ថានសិក្សាចំនួន ២០% នៃប្រាក់ខែរបស់ពួកគេ។

បច្ចុប្បន្ន​ហិរញ្ញប្បទានសិក្សា តាមរយៈកម្មវិធីអភិវឌ្ឍន៍ជំនាញឌីជីថល កំពុង​ផ្ដល់កម្ចីសិក្សាដល់និស្សិតដែលកំពុងសិក្សានៅក្នុងគ្រឹះស្ថានសិក្សាចំនួន៥ រួមមាន ៖ បណ្ឌិតសភាបច្ចេកវិទ្យាឌីជីថលកម្ពុជា (CADT), សាកលវិទ្យាល័យភូមិន្ទភ្នំពេញ (RUPP), សាកលវិទ្យាល័យជាតិគ្រប់គ្រង (NUM), វិទ្យាស្ថានបច្ចេកវិទ្យាកម្ពុជា (ITC), សាកលវិទ្យាល័យអាមេរិកាំងភ្នំពេញ (AUPP) និងសាកលវិទ្យាល័យអន្តរជាតិផារ៉ាហ្គន (Paragon.U)។

លោក ង៉ែត យូដារិត ក៏​បាន​បញ្ជាក់ដែរថា ការផ្ដល់កម្ចីសិក្សានេះ CADT បានផ្តោត​ទៅ​ដល់បេក្ខជនដែលមានជីវភាពខ្វះខាត និងមិនទទួលបានអាហារូបករណ៍ ប៉ុន្តែចង់រៀនផ្នែកឌីជីថល។ ក្រៅពីថ្លៃសិក្សានេះ CADT ក៏មានការផ្ដល់ប្រឹក្សាពីក្រុមប្រឹក្សាដល់និស្សិត​អំពីការរៀនសូត្រ ក៏​ដូចជា​ការតម្រង់ទិសការងារឱ្យត្រូវជំនាញជាដើម។ បើតាមលោក យូដារិត បច្ចុប្បន្ននេះ មាននិស្សិតចំនួន៦៨នាក់ កំពុងប្រើប្រាស់សេវាកម្មកម្ចីសិក្សានេះ ដោយមួយចំនួនតូចទើបនឹងបញ្ចប់ឆ្នាំទី៤ ហើយ​ត្រៀមចូលបម្រើការងារ។

យុវជន ថា មករា ជានិស្សិត​ឆ្នាំទី៣ ជំនាញ​ធុរកិច្ច​ឌីជីថល នៅបណ្ឌិតសភាបច្ចេកវិទ្យាឌីជីថលកម្ពុជា លើកឡើងថា តាមរយៈកម្ចីសិក្សា​ បានផ្តល់​ឱកាសឱ្យ​ខ្លួនបន្ត​ការ​សិក្សា​នៅ​ថ្នាក់ឧត្តមសិក្សា​ទៅ​លើ​ជំនាញ​ដែលខ្លួន​ស្រឡាញ់, លើសពីនេះ អាចឱ្យ មករា មានឯករាជ្យ​ភាពផ្នែកហិរញ្ញវត្ថុសម្រាប់សិក្សា ដោយ​មិនត្រូវការចំណាយពីគ្រួសារឡើយ។

មករា បញ្ជាក់ថា កម្ចីសិក្សា​នេះ​បាន​ផ្លាស់ប្តូរ​អនាគតរបស់ខ្លួន ព្រោះបើ​ពុំ​មាន​កម្ចី​ជួយ​ឱ្យ​បានចូលរៀន​មហាវិទ្យាល័យ​កាលពី៣ឆ្នាំមុនទេ ម្ល៉េះពេលនេះ មករា មិនដឹងថា ខ្លួនឯងកំពុងធ្វើអ្វីនោះឡើយ៕