ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការឈ្លានពានរបស់ថៃមកលើទឹកដីកម្ពុជា បានបង្កការលំបាកដល់ប្រជាជនខ្មែរ ជាជនស៊ីវិលភៀសសឹក ស្រ្តីមានផ្ទៃពោះ ចាស់ជរា កុមារ ហើយសាលារៀន ៦០០កន្លែងបិទទ្វារ ប៉ះពាល់ដល់សិស្ស១៥ម៉ឺននាក់ និងគ្រូបង្រៀន៦ពាន់នាក់។ យ៉ាងណា អ្នកជំនាញអប់រំលើកទឹកចិត្តបេក្ខជនបាក់ឌុបទាំងអស់ ខិតខំស្វ័យសិក្សា និងតាំងស្មារតីឱ្យរឹងមាំក្នុងស្ថានភាពប្រឈមជម្លោះព្រំដែនកម្ពុជា-ថៃនេះ។
លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា មានប្រសាសន៍ថា ស្ថិតក្នុងដំណាក់កាលជម្លោះព្រំដែនរវាងកម្ពុជា-ថៃនេះ ពិតជាប៉ះពាល់ទៅដល់អារម្មណ៍សិស្សានុសិស្សដែលជាបេក្ខជនប្រឡងបាក់ឌុប ជាពិសេសបេក្ខជនដែលស្ថិតក្នុងតំបន់ប៉ះពាល់ បើទោះជាមានការលើកថ្ងៃប្រឡងបាក់ឌុបក៏ដោយ ក៏អារម្មណ៍មិនស្ងប់។ ការជម្លៀសចេញពីកន្លែងដែលរងការប៉ះពាល់ មករកកន្លែងសុវត្ថិភាព ក៏ពុំមានកន្លែងដែលស្រួលស្ងប់ដើម្បីរៀនសូត្រ ក៏អាចមានការលំបាកដែរ។
ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា ក៏បានលើកទឹកចិត្តដល់បេក្ខជនបាក់ឌុបទាំងអស់បន្តខិតខំស្វ័យសិក្សារៀនសូត្រ។ លោកបណ្ឌិតថា សម្រាប់បេក្ខជនបាក់ឌុប ដែលស្ថិតក្នុងតំបន់ភៀសសឹក គួរមានលោកគ្រូ អ្នកគ្រូ បង្កើតជាក្រុមដើម្បីបង្រៀន និងលើកទឹកចិត្តឱ្យសិស្សានុសិស្សខំរៀនកាន់តែល្អ។
ជាមួយគ្នានេះ សម្រាប់លោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា ក្រសួងអប់រំ យុវជន និងកីឡា បានលើកថ្ងៃប្រឡងបាក់ឌុប១០ថ្ងៃ ដូច្នេះ ប្អូនៗជាបេក្ខជនប្រឡង សូមកុំបន្ធូរដៃ ដោយត្រូវតែផ្តោតឱ្យខ្លាំង រៀនឱ្យចេះពិត។ លោកបន្តថា សម្រាប់ឱកាសនេះ សិស្សានុសិស្សកុំយកលេសថៃឈ្លានពានដើម្បីខ្ជិលរៀន តែត្រូវយកលេសនេះជំរុញខ្លួនឯងឱ្យប្រឹងប្រែងរៀនសូត្រឱ្យបានខ្លាំងជាងមុន ស្វាហាប់ជាងមុន។ លោកក៏ជូនពរប្អូនៗឱ្យជោគជ័យក្នុងការប្រឡងនាពេលខាងមុខនេះផងដែរ។
ស្ថាបនិកសាលាបង្វឹក Startup Community បន្ថែមថា គ្រប់ការអភិវឌ្ឍប្រទេស ត្រូវការចំណេះដឹង និងចំណេះជំនាញ ហើយទាំងនេះអាចកើតមានឡើងតាមរយៈការប្រឹងប្រែងរៀនសូត្រ បន្តអភិវឌ្ឍសមត្ថភាព ពង្រឹងគុណភាព ពង្រឹងស្នាដៃ។ លោកបន្តថា នៅជាសិស្សត្រូវប្រឹងប្រែងរៀនឱ្យបានខ្លាំងបំផុត ពេលចេញធ្វើការ ត្រូវប្រឹងប្រែងធ្វើការឱ្យបានខ្លាំងបំផុត ចេញរកស៊ីក៏ត្រូវតែខ្លាំងដែរ ពេលយើងខ្លាំង ប្រទេសយើងក៏ខ្លាំងដែរ ហើយគេនឹងលែងហ៊ានមើលងាយយើង។ កិច្ចការនេះត្រូវការពេលយូរដើម្បីធ្វើ ហេតុនេះយើងត្រូវបន្តប្រឹងប្រែងកុំឈប់ ពីមួយឆ្នាំទៅមួយឆ្នាំ ពីមួយជំនាន់ទៅមួយជំនាន់ យើងនឹងកាន់តែខ្លាំងពូកែ។
បើតាម លោក គីម ដារ៉ា នៅសម័យអង្គរយើងខ្លាំង ជាក់ស្ដែងយើងរីកចម្រើនណាស់ សូម្បីសម័យកាលហ្នឹងបច្ចេកវិទ្យាមិនទាន់រីកចម្រើនក៏ដោយ តែយើងអាចសាងសង់អង្គរដ៏អស្ចារ្យ ដែលនេះបង្ហាញពីគុណភាពធនធានមនុស្សសម័យកាលនោះ។ “ពូជអង្គរ ឈាមដែលរត់ក្នុងខ្លួនយើង គឺបន្សល់ពីដូនតាយើង ហេតុនេះ យើងត្រូវតែប្រឹងប្រែងឡើងវិញ ដើម្បីបង្ហាញទៅពិភពលោកថា ពូជអង្គរខ្លាំងបែបនេះ”។
គួរជំរាបជូនថា ការប្រទ្បងសញ្ញាបត្រមធ្យមសិក្សាទុតិយភូមិ (បាក់ឌុប) កាលដើមឡើយគ្រោងនឹងប្រព្រឹត្តទៅនៅថ្ងៃ១៨-១៩ សីហា ប៉ុន្តែត្រូវពន្យារពេលទៅថ្ងៃ២៨-២៩ សីហា វិញ ដើម្បីឱ្យបេក្ខជនដែលស្ថិតនៅតំបន់ជម្លោះព្រំដែនរវាងកម្ពុជា-ថៃ អាចមានពេលបន្ថែមក្នុងការត្រៀមខ្លួនសម្រាប់ការប្រឡងថ្នាក់ជាតិមួយនេះ៕
