កាលពីថ្ងៃទី៦ ខែកញ្ញា ឆ្នាំ២០២៥ Cambodia Local Guides Connect ដែល​ជា​សហគមន៍​អ្នក​បញ្ចូលទិន្នន័យ​ទីតាំង​ផែនទី Google បានចេញផ្សាយ​របាយការណ៍​ស៊ើបអង្កេតរបស់ខ្លួន ដោយ​បាន​រក​ឃើញពី​ការ​យាយីជា​ប្រព័ន្ធ​ដែល​កំណត់​គោលដៅ​លើ​ប្រទេស​កម្ពុជា តាមរយៈ​ការ​កែប្រែ​ទីតាំង​នៅលើ Google Maps។ ការ​រំលោភ​បំពាន​នេះ បានប៉ះពាល់​ដល់​អធិបតេយ្យ​ភាពឌីជីថល កេរ្តិ៍​ឈ្មោះ​ទេសចរណ៍ និង​សុវត្ថិភាព​សហគមន៍​របស់​ប្រទេស​កម្ពុជា។

របាយការណ៍​កម្រាស់ ៣៣ទំព័រ Cambodia Local Guides បានកត់សម្គាល់ថា កំឡុង​ជម្លោះព្រំដែន​រវាង​ប្រទេសកម្ពុជា និងថៃ កាលពីចុងខែមិថុនា មាន​​​សកម្មភាព​មិន​ប្រក្រតីមួយ​ចំនួន​នៅ​លើ Google Maps ដូចជាមាន​ទីតាំងថ្មីៗបាន​លេចឡើង​ជាភាសាថៃ​នៅ​លើទឹកដី​កម្ពុជា ដែលមាន​ខ្លឹមសារ​ប្រមាថមើលងាយ និង​កំណត់គោលដៅលើ​ឥស្សរជន​ជាន់ខ្ពស់កម្ពុជា​ជាដើម។ ពេលវេលា និង​លំនាំ​ទាំង​នេះ​បានបង្ហាញថា បញ្ហា​ដែល​កើតឡើង​ មិន​មែនជា​ឧប្បត្តិហេតុចៃដន្យ​នោះទេ ប៉ុន្តែវាជា​សកម្មភាពឌីជីថលដែល​មានការ​រៀបចំទុក ភ្ជាប់​ទៅនឹង​ជម្លោះព្រំដែនដែល​​កំពុង​មានជម្លោះជាក់ស្តែង។

ការរំលោភ​បំពាន​ដែលបានកត់ត្រាមានចំនួនសរុប ៥៦៨ទីតាំង ក្នុងនោះ​ខេត្ត​ជាប់ព្រំដែន​ប្រឈម​មុខ​នឹង​ការ​វាយប្រហារធ្ងន់ធ្ងរបំផុត តាមរយៈការ​ដៅ​ទីតាំងថ្មីៗ។ តំបន់ទេសចរណ៍ និង​រាជធានីភ្នំពេញ ក៏​ត្រូវ​បាន​កំណត់​ជា​គោល​ដៅ​យុទ្ធសាស្រ្ត ដើម្បីបំផ្លាញ​កេរ្តិ៍​ឈ្មោះ​កម្ពុជា​លើឆាកអន្តរជាតិ និងផល​ប្រយោជន៍​សេដ្ឋកិច្ច​ផងដែរ។ ជាមួយ​គ្នា​ទីតាំង​វប្បធម៌​ពិសិដ្ឋ រួមទាំង​ទីតាំង​បេតិកភណ្ឌពិភពលោក​របស់របស់អង្គការយូណេស្កូ និង​ស្ថាប័នព្រះមហាក្សត្រ ក៏ប្រឈ​ម​នឹង​ការ​ប្រមាថមើលងាយដោយចេតនា តាមរយៈ​ការ​ផ្សារភ្ជាប់​ជាមួយ​នឹង​ខ្លឹមសារប្រមាថមើលងាយ។

លោក ង៉ែត ម៉ូសេ អ្នកប្រឹក្សាផ្នែកសន្ដិសុខលើប្រព័ន្ធឌីជីថល មានប្រសាសន៍ថា តាមរយៈ​ការ​ស៊ើបអង្កេត​នេះ​បង្ហាញថា Google Maps ដែល​ត្រូវ​បានរចនា​ឡើង​ដើម្បីជួយ​មនុស្ស​រុក​រក​ទីតាំង​នៅលើពិភពលោក ត្រូវ​បានគេ​ប្រែក្លាយ​ទៅដូចជាកន្លែង​ក្មេងលេង ធ្វើសកម្មភាព​រំលោភបំពាន និង​បៀតបៀន​ជា​ប្រព័ន្ធ ជំនួស​ឱ្យ​ការ​បម្រើ​ដល់​គោល​បំណង​ដើម​របស់ខ្លួន​ក្នុងការផ្តល់ព័ត៌មាន​ភូមិសាស្រ្តត្រឹមត្រូវ។

បើតាម​លោក ម៉ូសេ សកម្មភាពនេះ បានប៉ះពាល់ដល់ទីតាំងសំខាន់ៗដូចជា​ទីតាំង​រដ្ឋាភិបាល ទីតាំងសម្បត្តិបេតិកភណ្ឌពិភពលោក ហើយពិសេស​គឺទីតាំងទេសចរណ៍សំខាន់ត្រូវ​បានគេ​យកមកលេងសើច ទោះជា​ទីតាំងទាំងនោះដូចជាប្រាសាទព្រះវិហារ ឬអង្គរវត្ត​គេមិនអាចប្តូរបានក្តី ប៉ុន្តែ​គេ​បានដៅ​កន្លែង​ជុំវិញ​ ធ្វើ​ឱ្យ​មានការភ័នច្រឡំ ជាមួយ​ភាសាប្រមាថ ឬបំភិតបំភ័យ។

ជាវិធានការបន្ទាន់ សហគមន៍ Cambodia Local Guides បានផ្ញើ​របាយការណ៍ពី​ការរំលោភបំពាននេះ​ទៅ​កាន់ក្រុមហ៊ុន Google ដើម្បីពិនិត្យ​ពីស្ថានភាពនេះ នឹង​ស្នើ​ឱ្យ​ក្រុមហ៊ុន​យក្សមួយនេះ ផ្តល់អ្នក​តំណាង​ផ្នែក​បច្ចេកទេស​ជាក់លាក់​សម្រាប់​បញ្ហា​ប្រទេស​កម្ពុជា។​

លោក ជី សុផាត សមាជិកក្រុម​ការងារ Cambodia Local Guides លើកឡើងថា របាយការណ៍​ដែល​បានដាក់ទៅ​កាន់ក្រុមហ៊ុន Google ក៏​ដូចជា​រាជរដ្ឋាភិបាល មានគោលបំណង​ដើម្បី​ឱ្យ​មានការ​ជជែកគ្នា ព្រោះតែ​រឿងមួយ​នេះ​មិន​មែនជា​រឿងធម្មតា ជា​រឿងមុខមាត់ និងកិត្តិយស​របស់ប្រទេស​ជាតិទាំងមូល។

“មុនពេលយើងចេញរបាយការណ៍ មានទីតាំងសំខាន់មួយ​ត្រូវបានគេ​ផ្លាស់ប្តូរ នោះគឺទីតាំងប្រាសាទបន្ទាយសំរ៉ែ ត្រូវ​គេ​ប្តូរ​ទៅកាន់កណ្តាលទីក្រុង, យើងសាកស្រមៃមើលថា ប្រសិនជាជនបរទេស​គាត់ស្វែង​រក ហើយ​ទីតាំង​ត្រូវ​បាន​ប្តូរទៅ​កាន់កន្លែងផ្សេង…”

យ៉ាងណាក៏​ដោយ លោក ម៉ូសេ បញ្ជាក់ថា Cambodia Local Guides គ្រាន់តែជា​សហគមន៍​មួយ​ប៉ុណ្ណោះ ដូច្នេះ​លោករំពឹងថា ស្ថាប័នពាក់ព័ន្ធ​របស់រាជរដ្ឋាភិបាលនឹងចាត់តាំងមន្រ្តីដើម្បីត្រួតពិនិត្យ Google Maps ចំពោះ​សកម្មភាពមិន​ប្រក្រតីទាំងនេះ៕