ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីសំណេះសំណាលជាមួយក្រុមបុគ្គលមានប្រជាប្រិយភាពនៅលើបណ្តាញសង្គមកាលពីរសៀលថ្ងៃចន្ទ (១៦ មិថុនា) លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្រ្តីទី១កម្ពុជា និងជាប្រធានកិត្តិយសនៃមូលនិធិគន្ធបុប្ឆាកម្ពុជា បានថ្លែងអំណរគុណ និងលើកទឹកចិត្តដល់អ្នកផលិតមាតិកា និងបុគ្គលមានប្រជាប្រិយភាពទាំងអស់ បន្តធ្វើការផ្សព្វផ្សាយពីយុទ្ធនាការ ១ម៉ឺនរៀល១ម៉ឺននាក់ ក្នុងស្មារតីខ្មែរជួយខ្មែរ ដើម្បីជួយទៅដល់កុមារដែលកំពុងទទួលការព្យាបាលនៅមន្ទីរពេទ្យគន្ធបុប្ឆាកម្ពុជា។
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត មានប្រសាសន៍ថា យុទ្ធនាការ ១ម៉ឺនរៀល១ម៉ឺននាក់ឆ្នាំ២០២៥ ពិតជាបានជួយដល់ប្រជាជនកម្ពុជា ជាពិសេសកុមារ នៅក្នុងមន្ទីរពេទ្យគន្ធបុប្ផាកម្ពុជាឱ្យទទួលបានការព្យាបាលឥតគិតថ្លៃ និងប្រកបដោយជំនាញច្បាស់លាស់របស់គ្រូពេទ្យ។ យុទ្ធនាការនេះ ជាចលនាកៀគរថវិកាសប្បុរសធម៌ពីប្រជាជនខ្មែរគ្រប់រូបឱ្យចូលរួម និងចែករំលែកក្ដីស្រឡាញ់តាមរយៈការបរិច្ចាគថវិកាផ្ទាល់ខ្លួនទៅកាន់មូលនិធិគន្ធបុប្ផា ដែលជាផ្លូវមួយក្នុងការជួយសង្គមតាមការជួយសង្គ្រោះជីវិត។
លោកជំទាវបណ្ឌិតបន្ថែមថា បុគ្គលមានប្រជាប្រិយភាពទាំងអស់សុទ្ធតែមានឥទ្ធិពលយ៉ាងសំខាន់ក្នុងការជួយផ្សព្វផ្សាយ យុទ្ធនាការនេះទៅកាន់សាធារណជននៅក្នុងបណ្ដាញសង្គម ជាពិសេសមានអ្នកតាមដាន (Followers) ច្រើនអ្នកតាមដានទស្សនា ដូចនេះសកម្មភាពពួកគាត់អាចជាកម្លាំងមួយជួយឱ្យមូលនិធិនេះកាន់តែរីកសុះសាយ ហើយមានអ្នកស្គាល់កាន់តែច្រើន។
បើតាមប្រសាសន៍របស់លោកជំទាវបណ្ឌិត ពេជ ចន្ទមុន្នី មូលនិធិគន្ធបុប្ឆាកម្ពុជា ត្រូវបានបង្កើតឡើងដោយសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្រាប់ជួយទៅដល់កុមារក្រីក្រ មកពីបណ្ដាខេត្តនានានៅទូទាំងប្រទេសកម្ពុជា ដោយក្នុងមួយថ្ងៃៗមន្ទីរពេទ្យគន្ធបុប្ផាកម្ពុជា ត្រូវចំណាយថវិកាប្រមាណ ១២ម៉ឺនដុល្លារអាមេរិកជាប្រចាំ ឬមួយឆ្នាំជាង ៤៣ម៉ឺនដុល្លារអាមេរិក ហើយឆ្នាំនេះគឺជាលើកទីពីរហើយ ដែលលោកជំទាវបណ្ឌិត បានចូលរួមនៅក្នុងការកៀរគរកមូលនិធិ ដោយឆ្នាំនេះឃើញថាមានសន្ទុះខ្លាំងជាងឆ្នាំមុន គិតត្រឹមរយៈ ពេល១៦ថ្ងៃ នៃយុទ្ធនាការ មានចំនួនអ្នកចូលរួមបរិច្ចាគរហូតដល់ជាង ២៥ម៉ឺននាក់ គិតជាថវិកាបានចំនួនជាង៤លានដុល្លារអាមេរិក គិតត្រឹមថ្ងៃទី១៦ ខែមិថុនានេះ។
ត្បិតតែយុទ្ធនាការ ១ម៉ឺនរៀល ១ម៉ឺននាក់ ប្រព្រឹត្តធ្វើតែរយៈពេលមួយខែ តែលោកជំទាវបណ្ឌិត ពេជ ចន្ទមុន្នី លើកទឹកចិត្តដល់ប្រជាពលរដ្ឋខ្មែរ សិស្ស និស្សិត យុវជន មន្ត្រីរាជការ ថ្នាក់ដឹកនាំ ពាណិជ្ជករ សាធារណជនគ្រប់រូប បន្តបរិច្ចាគដល់មូនិធិគន្ធបុប្ផាជាប្រចាំខែ បើទោះបីជាយុទ្ធនាការបញ្ចប់ត្រឹមចុងខែមិថុនានេះក្ដី។ ការចូលរួមរបស់ប្រជាពលរដ្ឋខ្មែរគ្រប់រូបជារៀងរាល់ខែ តិចក្ដី ច្រើនក្ដីសុទ្ធតែជាស្មារតីក្នុងការជួយ និងចែករំលែកនូវក្ដីស្រលាញ់ និងការយកចិត្តទៅដល់កុមារ ដែលជាធនធាននៅពេលអនាគតសម្រាប់ប្រទេសកម្ពុជា។
គួរជម្រាបថា យុទ្ធនាការ ១ម៉ឺនរៀល ១ម៉ឺននាក់ បានប្រកាសបើកកាលពីថ្ងៃទី១ ខែមិថុនា ឆ្នាំ២០២៥ ក្រោមអធិបតីភាពលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នឹងបន្តរហូតដល់ដំណាច់ខែមិថុនា ឆ្នាំ២០២៥៕
