ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្មីៗនេះ ការចែកចាយព័ត៌មាន ក៏ដូចជារឿងរ៉ាវដែលមិនល្អជាច្រើននៅលើបណ្តាញសង្គម រហូតដល់មានយុវជន និងសារធារណជនមួយចំនួនបានលើកយកករណីនេះទៅជជែក ក្នុងន័យលេងសើចផ្លែផ្កាថែមទៀត ដែលនេះ មានមតិខ្លះយល់ថា អាចបង្កឱ្យប៉ះពាល់កិត្តិយសជាតិ និងបាត់បង់ភាពទាក់ទាញពីអ្នកវិនិយោគនៅប្រទេសបណ្តាប្រទេសផ្សេងៗមកកាន់កម្ពុជា ។ សម្រាប់លោក បណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ មានប្រសាសន៍ថា នៅក្នុងបណ្តាញសង្គមប្រព័ន្ធផ្សព្វផ្សាយ គឺជាអាវុធមុខពីរ ហើយការចែកចាយព័ត៌មានក៏ប្រៀបបានជាអាវុធមុខពីរដូចគ្នាដែរ។
លោកបណ្ឌិត ប៊ុនថង មានប្រសាសន៍ថា បើសិនជាយើងចែកចាយព័ត៌មានល្អៗ ដែលមានដូចជានិយាយទាក់ទងនឹងគ្រោះធម្មជាតិ ឬក៏ចែករំលែកនៅចំណេះដឹងទូទៅ ឬពាក់ព័ន្ធនឹងសុខភាពជាដើម ពោលគឺការចែកចាយព័ត៌មានទាំងឡាយណាដែលជាប្រភេទខ្លឹមសារមានបង្កប់នូវភាពវិជ្ជមាន វាជាកត្តានាំឱ្យយើងអាចទទួលឬផ្តល់ អត្ថប្រយោជន៍ទាំងខ្លួនយើងផ្ទាល់ ព្រមទាំងសង្គមដែរ។
បើក្រឡេកទៅមើល ជ្រុងនៃការចែកចាយព័ត៌មានមិនល្អ វិញ លោកបណ្ឌិត ឈត ប៊ុនថង ផ្តល់យោបល់ថា បើសិនជាយើង ចែករំលែកព័ត៌មានមិនល្អច្រើន ដូចជា ព័ត៌មានអសកម្មនៅក្នុងសង្គម ផលប៉ះពាល់ជាពិសេសនោះគឺ កុមារ និងយុវជន អាចទទួលអារម្មណ៍មួយ ដែលមានភាពដិតដាមនូវព័ត៌មានមិនល្អ ហើយចំណុចមួយទៀតគឺ ព័ត៌មានមិនល្អ ក៏អាចធ្វើឱ្យបរទេស គេមើលមកខ្មែរយើង ឃើញសុទ្ធតែរឿងមិនល្អកើតឡើងនៅក្នុងសង្គម ដែលជំរុញឱ្យពួកគាត់មានភាពភ័យខ្លាច មិនហ៊ានសូម្បីមកទស្សនាស្រុករបស់យើង ក៏ដូចជាមិនហ៊ានវិនិយោគជាដើម។
អញ្ចឹងគួរតែប្រយ័ត្នប្រយែង ព័ត៌មានមិនល្អពីកម្ពុជា ពីសង្គមខ្មែរនឹងរីកដុះដាល វាធ្វើឱ្យគេគិតថាខ្មែរយើង សុទ្ធតែរឿងមិនល្អ រឿងអត់ប្រយោជន៍ រឿងដែលធ្វើឱ្យគេភ័យខ្លាច គេមិនហ៊ានមកទស្សនា ឬក៏បណ្តាក់ទុននៅលើប្រទេសយើងជាដើម
លោក បណ្ឌិត ឈត ប៊ុនថង
យ៉ាងណាក៏ដោយបើតាមលោកបណ្ឌិត ឈត ប៊ុនថង យើងគួរចែករំលែកព័ត៌មាន ដែលបង្កប់នូវអត្ថប្រយោជន៍ ដូចជា ទាក់ទងនឹងចំណេះដឹង ភាសាបរទេស អំពីវប្បធម៌ ជំនាញផ្សេងៗ ឬក៏បទពិសោធន៍ក្នុងការដោះស្រាយបញ្ហា ការប្រកបមុខរបរ និងការដាំដុះជាដើម។ ក្រោយពេលដែលចែករំលែកប្រធានបទទាំងអស់នេះហើយ នោះអ្នកដែលចែកចាយនឹងទទួលបាននូវការគោរព កោតសរសើរ និងការដឹងគុណរាល់សេចក្ដីល្អដែលបានចែកចាយ។ ដោយឡែកបើនិយាយអំពីអ្នកដែលទទួលផលពីការចែករំលែករបស់យើងវិញ គឺជួយឱ្យពួកគាត់ដែលកំពុងត្រូវការចំណេះជំនាញទាំងនោះ មានភាពរីកចម្រើនជាងមុន មិនថា គ្រួសារ ឬសហគមន៍ រួមទាំងប្រទេសជាតិទាំងមូលផងដែរ។
បន្ថែមពីនោះ លោកបណ្ឌិត ឈត ប៊ុនថង ក៏សំណូមពរឱ្យដល់យុវជន ឬក៏សាធារណៈជនទូទៅក្ដី គួរតែផ្សាយបន្ថែមទៀត អំពីប្រយោជន៍នៃការប្រើប្រាស់ និងហានិភ័យក្នុងការប្រើប្រាស់បណ្តាញសង្គម អំពីរបៀបប្រើប្រាស់ឱ្យមានប្រសិទ្ធភាព និងការទាញអត្ថប្រយោជន៍ចំពោះខ្លួនឯង សហគមន៍ និងប្រទេសជាតិ។ ហើយនឹងប្រើប្រាស់បណ្តាញសង្គមបែបណាកុំឱ្យខ្ជះខ្ជាយពេលវេលា និងបញ្ចៀសខ្លួនពីការក្លាយជាជនរងគ្រោះ ឬនាំឱ្យប្រទេសយើងរងគ្រោះ ដោយសារការនាំគ្នាលេងសើច ឬក៏ប្រើប្រាស់បណ្តាញសង្គមក្នុងផ្លូវមិនត្រឹមត្រូវ៕
