ជាអនុសាសន៍​ដល់​សហភាពសហព័ន្ធយុវជន​កម្ពុជា (ស.ស.យ.ក.) ដើម្បីរួមចំណែកអភិវឌ្ឍ​ប្រទេស​កម្ពុជាទៅជារដ្ឋទំនើប ក្នុង​ឱកាសជាអធិបតី​ក្នុង​ពិធី​បិទ​កិច្ច​ប្រជុំ​គណៈកម្មាធិការ​កណ្តាល ស.ស.យ.ក. សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានស្នើ​ឱ្យ​ចលនាយុវជន ក្នុង​បុព្វ​ហេតុ​ជាតិ មាតុភូមិ​មួយ​នេះ បន្តយកចិត្តទុកដាក់ ពង្រឹងកិច្ចសហប្រតិបត្តិការ​ឱ្យ​បានទូលំទូលាយ ជាមួយគ្រប់ក្រសួងស្ថាប័ន និតិបុគ្គល រដ្ឋបាលថ្នាក់ក្រោមជាតិ អាជ្ញាធរមូលដ្ឋាន អង្គការសមាគម និងសហគមន៍ នានា ក្នុងដំណើរឆ្ពោះការកសាង អភិវឌ្ឍសង្គមជាតិ និងមាតុភូមិ​កម្ពុជា​​​ ផ្អែកលើចំណេះដឹង បច្ចេកវិទ្យា និង​វិទ្យាសាស្រ្ត។

ជាមួយគ្នានេះ សម្តេចនាយករដ្ឋមន្រ្តី ក៏​បានស្នើ​ដល់​​សហភាពសហព័ន្ធយុវជន​កម្ពុជា បន្ត​អភិវឌ្ឍសមត្ថភាព​យុវជន ដោយ​យក​ចិត្តទុកដាក់​លើ​ការ​ពង្រឹងគុណភាពអប់រំ បណ្តុះបណ្តាលជំនាញបច្ចេកទេស ការថែទាំសុខភាព និងសុខមាលភាព ប្រព័ន្ធគាំពារសង្គម និង​ប្រព័ន្ធស្បៀង និងតម្លៃភាពជាពលរដ្ឋល្អ ដើម្បី​ឱ្យ​យុវជន​ក្លាយជាមូលធន​មនុស្ស ប្រកបដោយថាមពល និង​សក្តានុពល នៅ​ក្នុងសង្គមឌីជីថល និង​សហសម័យ​កម្ពុជា។

ឆ្លៀត​ក្នុង​ឱកាស​នោះដែរ សម្តេចធិបតី ហ៊ុន ម៉ាណែត ក៏​បានថ្លែងកោតសរសើរ​ចំពោះ​កម្លាំង​យុវជន នៃ​សហភាព​សហព័ន្ធ​យុវជន​កម្ពុជា ដែល​កំពុង​រួបរួមគ្នា ជាធ្លុងមួយ ពួតដៃពូនជ្រំ ដោយឈរលើគោលការណ៍ស្ម័គ្រចិត្ត ឯកភាពជាតិ សាមគ្គីភាព និង ការបំប្លែង កម្លាំងស្ម័គ្រចិត្តទៅជាចលនាជាតិ ក្នុងស្មារតីខ្មែរតែមួយ ដើម្បីចូលរួមជាមួយរាជរដ្ឋាភិបាល ក្នុងការកសាងសហសម័យកម្ពុជា ឱ្យរីកចម្រើនរុងរឿងឡើងវិញ ដូចសម័យមហាអង្គរ ។

សម្តេចនាយករដ្ឋមន្រ្តីបញ្ជាក់ថា រាជរដ្ឋាភិបាល តែងតែចាត់ទុកយុវជន គឺជាក្តីសង្ឃឹម របស់ប្រទេសជាតិ ដោយយកចិត្តទុកដាក់ខ្ពស់ ក្នុងការលើកកម្ពស់ស្ថានភាព ឋានៈ តួនាទី និង សិទ្ធិរបស់យុវជន តាមរយៈការដាក់ចេញនូវយុទ្ធសាស្ត្រគោលនយោបាយ ផែនការ និង វិធានការនានា ដើម្បីអភិវឌ្ឍយុវជនកម្ពុជា ឱ្យក្លាយជាមូលធនមនុស្សពិតប្រាកដដែល មានចំណេះដឹងទូលំទូលាយ និង មានជំនាញពិតប្រាកដ, សុខភាពល្អ និងសីលធម៌ល្អ សំដៅត្រៀមយុវជនកម្ពុជារួចជាស្រេច សម្រាប់ចូលរួមបម្រើជាតិមាតុភូមិ នៅគ្រប់កាលៈទេសៈ និង ជាអ្នកបន្តវេនប្រកបដោយថាមពល និង សក្តានុពល៕