ទិដ្ឋភាពសាធារណជន​ច្រើនកុះករ​នាំគ្នា​ក្រាល​កន្ទេល​អង្គុយ​ទស្សនា​ការ​សម្តែង​ល្ខោនបាសាក់ នៅ​ផ្សារ​ទំនើប Aeon 3 កាលពីសប្តាហ៍​កន្លងទៅនេះ កំពុងតែទាក់ទាញចំណាប់អារម្មណ៍​យ៉ាងខ្លាំងនៅលើបណ្តាញសង្គម ។ អ្នកជំនាញផ្នែកវប្បធម៌ យល់ឃើញថា សកម្មភាពសម្ដែងល្ខោនបាសាក់នៅផ្សារទំនើបនេះ ជារូបភាពថ្មីគួរឱ្យចាប់អារម្មណ៍ និងកំពុងតែរួមចំណែករលើកកម្ពស់សិល្បៈវប្បធម៌ខ្មែរឱ្យ​មានការគាំទ្រកាន់តែច្រើន។

លោក ឈាង ឆដាភ័ក្រ្ត ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ មានប្រសាសន៍ថា ការសម្ដែងល្ខោនបាសាក់នៅផ្សារទំនើប គឺជាសញ្ញាមួយដ៏ល្អដែលបានបង្ហាញថា ប្រជាជនខ្មែរនៅតែគាំទ្រ និងស្រឡាញ់វិស័យសិល្បៈបុរាណជាតិ។ លោកបន្តថា ក្នុងនាមជាអ្នកវប្បធម៌មួយរូប លោកគិតថា យើងត្រូវបង្កើនផលិតផលវប្បធម៌ឱ្យបានច្រើន ដើម្បីសម្ដែងជូនប្រជាពលរដ្ឋទស្សនាឱ្យបានច្រើន ដើម្បីឱ្យពួកគាត់បានស្គាល់ បានដឹងពីមរតកវប្បធម៌សម្រាប់កូនចៅជំនាន់ក្រោយ។

ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ បញ្ជាក់បន្ថែមថា ចំពោះការសម្ដែងសិល្បៈល្ខោនបាសាក់ មិនថាជាការសម្ដែងនៅផ្សារទំនើប ឬនៅទីសាធារណៈ លោកគិតថា គឺជាសកម្មភាពមួយដ៏ល្អ ជាការភ្ជាប់ទំនាក់ទំនងរវាងអ្នកសម្ដែងនិងប្រជាពលរដ្ឋ ព្រោះជួនកាលប្រជាពលរដ្ឋមិនមានពេលវេលា ឬជាប់រវល់ មិនបានដឹងអំពីការសម្ដែង ហើយនៅពេលប្រជាជនទៅលេងនៅផ្សារទំនើប គាត់បានឃើញការសម្ដែង ធ្វើឱ្យគាត់បានទស្សនា។

បើតាម លោក ឈាង ឆដាភ័ក្រ្ត ដើម្បីធ្វើឱ្យទម្រង់សិល្បៈល្ខោនបាសាក់មានការគាំទ្រច្រើន គឺយើងត្រូវធ្វើឱ្យប្រជាជនបានស្គាល់ ដោយបង្កើនផលិតផលវប្បធន៌ឱ្យបានច្រើន មិនថាជាទ្រង់ល្ខោនបាសាក់ យីកេ អាយ៉ៃ ប្រមោទ័យ ឬអាប៉េ ជាដើម។ កាលណាប្រជាជនបានស្គាល់ នឹងចូលរួមស្រឡាញ់ ថែរក្សាការពារ គឺជាចំណុចមួយដ៏សំខាន់ដែលយើងគួរមានវិធីសាស្រ្តផ្សេងៗក្នុងការបញ្រ្ជាប ឬធ្វើការសម្ដែងអំពីកេរ្តិ៍មរតកដ៏មានតម្លៃរបស់បុព្វបុរសយើង ដែលបានបន្សល់ទុកសម្រាប់កូនចៅជំនាន់ក្រោយ។

លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ថា នៅពេលមានការរៀបចំសម្ដែងល្ខោនបាសាក់នៅផ្សារទំនើបមួយ ហើយមានមនុស្សចូលរួមច្រើនកុះករ មានន័យថា ប្រជាពលរដ្ឋខ្មែរនៅតែគាំទ្រ ឱ្យតម្លៃ និងចូលចិត្តទស្សនាទស្សនីយភាពល្ខោនបាសាក់។ ដូច្នេះ ប្រសិនជាយើងមានការរៀបចំការសម្ដែងបន្ថែមទៀត អាចមានផ្សារទំនើប និងកន្លែងផ្សេងទៀត។

បើតាមលោកបណ្ឌិត ឈត ប៊ុនថង ការដាក់ឱ្យមានការសម្ដែងល្ខោននៅផ្សារទំនើបជាការលើកកម្ពស់ផ្នែកសិល្បៈវប្បធម៌ខ្មែរ។ ទន្ទឹមគ្នានេះ ក៏ត្រូវលើកកម្ពស់ ឬជំរុញឱ្យមានការសម្ដែងល្ខោននិយាយ អាយ៉ៃ យីកេ ល្ខោនស្បែក និងរបាំផ្សេងៗច្រើនទៀត ព្រមទាំងភាពយន្តជាដើម។ ទន្ទឹមគ្នានេះ ការសម្ដែងនៅទីកន្លែងដែលមិនមែនជាមហោស្របជារឿងមួយ ប៉ុន្តែប្រសិនជាមានមហោស្របខ្នាតតូចធំ ជាលក្ខណៈជាតិ និងអន្តរជាតិ ដែលត្រូវតាមស្តង់ដា បច្ចេកទេសសម័យទំនើប រឹងតែធ្វើឱ្យប្រទេសយើងដែលមានសម្បត្តិវប្បធម៌ កាន់តែមានភាពទាក់ទាញប្រជាជនក្នុងស្រុកផង និងអាចទាក់ទាញភ្ញៀវបរទេសដែលមកទស្សនាប្រទេសកម្ពុជាផង។

មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា បន្ថែមថា ដើម្បីលើកកម្ពស់សិល្បៈល្ខោនបាសាក់ខ្មែរឱ្យមានការគាំទ្រ ការអភិរក្ស ការអភិវឌ្ឍរីកចម្រើនទៅមុខ គឺត្រូវមានការចូលរួមគាំទ្រពីមហាជន តាមរយៈការចូលរួមទស្សនា ចូលរួមពីអ្នកជំនាញដោយត្រូវបង្រៀនបន្ត ដឹកនាំ បង្ហាត់បង្រៀនផ្នែកសិល្បៈល្ខោនបាសាក់បន្ថែម ។ ទន្ទឹមគ្នានេះ សិស្សផ្នែកសិល្បៈ ធ្វើយ៉ាងណាឱ្យមានក្រុម និងមានការគាំទ្រថវិកាសម្រាប់សម្ដែង ដូចជា មានការឧបត្ថម្ភពីអ្នកមានធនធាន ក៏ដូចជារដ្ឋាភិបាលអាចវិនិយោគផ្នែកណាមួយជាប្រាក់របស់រដ្ឋដើម្បីទ្រទ្រង់ផ្នែកល្ខោនបាសាក់ ឬសិល្បៈផ្សេងទៀតដែរ ៕