ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បើយោងតាមបទប្បញ្ញត្តិ ក្នុងការប្រឡងសញ្ញាបត្រមធ្យមសិក្សាទុតិយភូមិ ចេញផ្សាយដោយក្រសួងអប់រំយុវជន និងកីឡា កាលពីពេលថ្មីៗនេះ បានបញ្ជាក់ពីវិន័យយ៉ាងធ្ងន់ធ្ងរចំពោះបេក្ខជនរូបណាដែលឱ្យអ្នកដទៃមកប្រឡងជំនួស រហូតដល់បញ្ជូនទៅកាន់ស្ថាប័នមានសមត្ថកិច្ចថែមទៀត។
តាមប្រការ១១ នៃបទប្បញ្ញត្តិ បេក្ខជនដែលឱ្យអ្នកដទៃមកប្រឡងជំនួស នឹងត្រូវបានចាត់ទុកជាការប្រព្រឹត្តសកម្មភាពកម្រិតថ្នាក់ទី៣ ដោយកំណត់ឱ្យធ្លាក់ដោយស្វ័យប្រវត្តិ និងផ្អាកមិនឱ្យប្រឡង ២ (ពីរ)ឆ្នាំបន្ទាប់ ។ ក្នុងករណីចាំបាច់ បេក្ខជននឹងត្រូវបញ្ជូនទៅស្ថាប័នមានសមត្ថកិច្ច ដើម្បីដោះស្រាយតាមច្បាប់ជាធរមាន។
ជាមួយគ្នានេះ បើយោងតាមមាត្រា៤៩ នៃច្បាប់ស្តីពីការអប់រំ ចែងថា សាម៉ីខ្លួន ឬជនណា ដែលប្រឡងជំនួស ឬបន្លំគ្រប់រូបភាពក្នុងការប្រឡងដូចបានបញ្ញត្តិក្នុងមាត្រា២៦ នៃច្បាប់នេះ ត្រូវទទួលពិន័យអន្តរការណ៍ជាប្រាក់ពី ១លានរៀល ទៅ៥លានរៀល ។ ករណីមិនរាងចាល សាម៉ីខ្លួនត្រូវទទួលពិន័យអន្តរការណ៍ជាប្រាក់ចំនួនទ្វេដង នៃប្រាក់ពិន័យអន្តរការខាងលើ ហើយត្រូវព្យួរការប្រឡងសម្រាប់រយៈពេល ២(ពីរ)ឆ្នាំ ឬហាមឃាត់មិនឱ្យចុះឈ្មោះក្នុងបញ្ជីប្រឡងជាស្ថាពរ។
ចំពោះជនដែលប្រឡងជំនួស ឬបន្លំគ្រប់រូបភាពក្នុងការប្រឡង ត្រូវផ្តន្ទាទោសតាមច្បាប់ព្រហ្មទណ្ឌជាធរមាន។
ដោយឡែកចំពោះករណីសូកប៉ាន់វិញ បើតាមមាត្រា៦០៥ នៃក្រមព្រហ្មទណ្ឌចែងថា ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ បុគ្គលណា ដោយគ្មានសិទ្ធដោយផ្ទាល់ ឬដោយប្រយោល ប្រគល់អំណោយ ឬជំនូន ធ្វើការសន្យាជាមួយ ឬផ្តល់អត្ថប្រយោជន៍អ្វីមួយដល់អ្នករាជការសាធារណៈ ឬពលរដ្ឋទទួលអាណត្តិសាធារណៈ ដោយការបោះឆ្នោត ដើម្បីឱ្យអ្នករាជការ ឬពលរដ្ឋនោះ ៖ ១.បំពេញកិច្ច នៃមុខងាររបស់ខ្លួន ឬកិច្ចដែលសម្រួលដោយសារមុខងាររបស់ខ្លួន, ២. មិនបំពេញកិច្ច នៃមុខងាររបស់ខ្លួន ឬកិច្ចដែលសម្រួលដោយសារមុខងាររបស់ខ្លួន។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម្រាប់ឆ្នាំសិក្សា២០២២-២០២៣ នឹងប្រព្រឹត្តទៅរយៈពេល២ថ្ងៃ គឺនៅថ្ងៃទី៦ និងថ្ងៃទី៧ ខែវិច្ឆិកា ឆ្នាំ២០២៣ ៕
