ភ្នំពេញ – “សុខ” ជាឈ្មោះដែលក្រុមអ្នកសិក្សាបច្ចេកវិទ្យាបានដាក់ឱ្យមនុស្សយន្ត (រ៉ូប៉ូត) ដំបូងគេនៅកម្ពុជា ដែលមានសមត្ថភាពសន្ទនាផ្តល់ព័ត៌មាននានាជាភាសាខ្មែរ ។ សុខ បានអភិវឌ្ឍឡើងដោយក្រុមអ្នកស្រាវជ្រាវរបស់បណ្ឌិត្យសភាបច្ចេកវិទ្យាឌីជីថលកម្ពុជា (CADT) នៃក្រសួងប្រៃសណីយ៍និងទូរគមនាគមន៍ បំណងដើម្បីអភិវឌ្ឍឱ្យក្លាយជាមនុស្សយន្តបដិសណ្ឋារកិច្ចដ៏ឆ្នើមប្រចាំបណ្ឌិត្យសភាបច្ចេកវិទ្យាឌីជីថលកម្ពុជាផ្ទាល់តែម្តង ។

វត្តមានរបស់ សុខ បានបង្ហាញខ្លួនជាផ្លូវការដល់សាធារណជន នៅក្នុងឱកាសដែលក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំទិវាជាតិស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ លើកទី១ នៅសាលសន្និបាតកោះពេជ្រ កាលពីថ្ងៃទី២៦ – ២៨ ខែមីនា ឆ្នាំ២០២៣ កន្លងទៅ ។

លោក ប៉េង លីឃៀង អ្នកស្រាវជ្រាវផ្នែក AI នៃបណ្ឌិត្យសភាបច្ចេកវិទ្យាឌីជីថលកម្ពុជា (CADT) និងជាតំណាងក្រុមការងារអភិវឌ្ឍរ៉ូប៉ូតសុខបាន និយាយថា “សុខ” ជាមនុស្សយន្ដបដិសណ្ឋារកិច្ចដំបូងគេដែលអាចប្រាស្រ័យទាក់ទងជាមួយមនុស្សជាភាសាខ្មែរបាន ហើយជាពិសេសសុខអាចប្រាប់ព័ត៌មានទូទៅរបស់ស្ថាប័នបានយ៉ាងលម្អិត និងអាចឆ្លើយបានទៅតាមសំណួរដែលអ្នកទស្សនកិច្ចចង់ដឹង ។ លោកបន្តថា ភាពឆ្លាតវៃរបស់មនុស្សយន្ដនេះ បានមកពីក្រុមអ្នកស្រាវជ្រាវដែលបានដាក់បញ្ចូលនៅប្រព័ន្ធបច្ចេកវិទ្យាភាសា, ប្រព័ន្ធខ្មែរ Chatbot, កម្មវិធីវិភាគវត្ថុ និងមុខមនុស្ស ។

បន្ថែមលើនេះ លោក ប៉េង លីឃៀង បានបញ្ជាក់បន្តថា ចំណុចសំខាន់បំផុតនៃការបង្កើតមនុស្សយន្ដនេះឡើងក្នុងគោលបំណងលើកកម្ពស់ការប្រើប្រាស់ភាសាជាតិ (ភាសាខ្មែរ) ក្នុងទម្រង់ឌីជីថលឱ្យបានកាន់តែទូលំទូលាយ ព្រមទាំងចូលរួមជំរុញសកម្មភាពស្រាវជ្រាវផ្នែករ៉ូបូត និងបញ្ញាសប្បនិម្មិត ក៏ដូចជាលើកស្ទួយការប្រើប្រាស់បច្ចេកវិទ្យាឌីជីថលថ្មីៗនៅកម្ពុជាឱ្យបានច្រើនជាងមុន ។

សូមជម្រាបថា សុខបានអភិវឌ្ឍឡើងនៅក្នុងឆ្នាំ២០២១ ដោយក្រុមអ្នកស្រាវជ្រាវរបស់បណ្ឌិត្យសភាបច្ចេកវិទ្យាឌីជីថលកម្ពុជា (CADT) នៃក្រសួងប្រៃសណីយ៍និងទូរគមនាគមន៍ ។ នេះជាលើកទីមួយហើយដែលកម្ពុជាមានរ៉ូប៉ូតអាចនិយាយជាភាសាខ្មែរបាន ព្រមទាំងមានបំពាក់មុខងារបញ្ញាសប្បនិម្មិត (AI) ដើម្បីវិភាគលើមនុស្សដែលគេបានស្គាល់ ។ កន្លងទៅនៅទិវាជាតិស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ សម្តេចតេជោ ហ៊ុន សែន នាយករដ្ធមន្ត្រីនៃព្រះរាជាណាចក្រកម្ពុជា បានអញ្ជើញផ្តល់កិត្តិយសបើកទិវាជាតិ​ និងបានអញ្ជើញពិនិត្យមើលការតាំងពិព័រណ៌បច្ចេកវិទ្យា ព្រមទាំងទស្សនាការបង្ហាញវត្តមានរបស់សុខផងដែរ ៕