ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពេលសម្រេចចិត្តជ្រើសរើសរៀនជំនាញបច្ចេកវិទ្យាអាហារ យុវតី សឿន សុខឃីម មានស្រុកកំណើតនៅខេត្តពោធិ៍សាត់ ធ្លាប់ទទួលបានពាក្យនិយាយថា «រៀនជំនាញនេះធ្វើអី? រៀនចប់ធ្វើចុងភៅមែន»។ ប៉ុន្តែពាក្យទាំងអស់នេះសុទ្ធតែជាការយល់ខុសរបស់អ្នកនិយាយ ព្រោះការសិក្សាជំនាញនីមួយៗជាពិសេសជំនាញបច្ចេកវិទ្យាអាហារ ជាជំនាញមួយដែលអាចផ្ដល់ឱកាសការងារជាច្រើនដូចជា បម្រើការងារនៅតាមក្រុមហ៊ុន ឬសិប្បកម្មនានា ឬអាចចូលបម្រើការងារក្នុងស្ថាប័នរដ្ឋ ឬជាអ្នកត្រួតពិត្យគុណភាពអាហារជាដើម។
យុវតី សឿន សុខឃីម ជានិសិ្សតជំនាញ បច្ចេកវិទ្យាអាហារ នៃវិទ្យាស្ថានបច្ចេកវិទ្យាកំពង់ស្ពឺ រៀបរាប់បន្តថា ត្បិតបានលឺមតិមិនល្អមួយចំនួនពីជំនាញនេះក្តី ប៉ុន្តែកញ្ញានៅតែជ្រើសរើសជំនាញបច្ចេកវិទ្យាអាហារនេះ ដោយព្យាយាមពីសារៈសំខាន់នៃជំនាញប្រាប់ទៅដល់ផ្ទះ ហើយព្យាយាមហាត់ពត់សមត្ថភាពពីមួយថ្ងៃទៅមួយថ្ងៃដើម្បីផ្តល់ទំនុកចិត្តឱ្យអ្នកផ្ទះកាន់តែជឿជាក់ថា យើងពិតជាអាចធ្វើបានល្អក្នុងការរៀនជំនាញមួយនេះពិតមែន។
យុវតី សឿន សុខឃីម ក៏បានឱ្យដឹងដែរថា ការសម្រេចចិត្តជ្រើសរើសរៀនជំនាញបច្ចកវិទ្យាអាហារនេះ គឺមិនមែនជារឿងចៃដន្យឡើយ ពោលគឺកញ្ញាស្រឡាញ់ ចូលចិត្តការកែច្នៃ និងការវិភាគគីមីនៅក្នុងអាហារ ម្យ៉ាងវិញទៀតការរៀនជំនាញមួយនេះអាចធ្វើឱ្យកញ្ញាស្គាល់ច្រើនពីសមាសធាតុគីមី និងគ្រោះថ្នាក់ផ្សេងៗនៅក្នុងអាហារដែលយើងបរិភោគ។ នៅពេលដែលបានសិក្សាមួយរយៈ កញ្ញាកាន់តែពេញចិត្តទៅលើមុខវិជ្ជាដែលទាក់ទងទៅនឹងជំនាញនេះថែមទៀត នោះគឺការបានចុះប្រតិបត្តិផ្ទាល់ ស្គាល់ពីស្តង់ដាក្នុងក្រុមហ៊ុន អាចជៀសវាងបាននូវអាហារដែលប៉ះពាល់សុខភាព និងទីផ្សារការងារទូលំទូលាយ។
បើតាម យុវតី សុខឃីម ជំនាញបច្ចេកវិទ្យាអាហារ គឺគេសិក្សាទាក់ទងទៅនឹងការកែច្នៃ (នំដុត អាហារកំប៉ុង ភេសជ្ជៈ សាច់ក្រក ប្រហិត) ការវិភាគទៅសមាសធាតុគីមី (អាស៊ីត បាស កាបូអ៊ីដ្រាត ខ្លាញ់ ប្រូតេអ៊ីន) ការវិភាគទៅលើមីក្រូជីវសាស្ត្រផ្សេងៗ ។ នៅក្នុងការសិក្សាជំនាញនេះ ក៏ត្រូវការសិក្សាទៅមេរៀនគោលការណ៍អាហារូបត្ថម្ភ ចុះអនុវត្តផ្ទាល់ដោយផ្សារភ្ជាប់ទៅនឹងមេរៀនដែលបានរៀននៅក្នុងថ្នាក់ បង្កើតជាគម្រោងមួយដើម្បីបញ្ចប់ការសិក្សា ថ្នាក់បរិញ្ញាបត្រ និងបរិញ្ញាបត្ររង។ លើសពីនេះ សិស្សថែមទាំងទទួលបានបទពិសោធន៍ក្នុងការហាត់ការងារនៅក្នុងក្រុមហ៊ុនជាក់ស្តែងផងដែរ។
ក្រោយពីសិក្សាជំនាញនេះ និងធ្លាប់បានហាត់ការងារផង យុវតី សុខឃីម យល់ឃើញថា ជំនាញបច្ចេកវិទ្យាអាហារ ពិតជាមានតម្លៃណាស់ ព្រោះអាចយល់ដឹងពីវិធីសាស្ត្រក្នុងការកែច្នៃផ្សេងៗ ស្វែងយល់បន្ថែមពីរបបអាហារដែលគួរទទួលទាន ដឹងពីគុណតម្លៃរបស់អាហារូបត្ថម្ភ ស្គាល់ពីប្រភេទសារធាតុគីមី និងមីក្រូសារពាង្គកាយផ្សេងៗ ចេះពីរបៀបប្រើប្រាស់គ្រឿងម៉ាស៊ីនដែលប្រើសម្រាប់វិភាគ កែច្នៃអាហារ និងមានជំនាញមួយច្បាស់លាស់ផ្ទាល់ខ្លួន។
ជាមួយគ្នានេះ យុវតី សឿន សុខឃីម ក៏បានផ្តល់ជាបទពិសោធន៍ដល់សិស្សានុសិស្សក្នុងការសម្រេចចិត្តមួយឱ្យបានត្រឹមត្រូវក្នុងការជ្រើសរើសជំនាញ គឺគួរតែស្វែងយល់ពីចំណង់ចំណូលចិត្តរបស់អ្នកជាមុនសិន ជៀសវាងការធ្វើឱ្យអ្នកមានអារម្មណ៍ធុញថប់កំឡុងពេលសិក្សា ម្យ៉ាងវិញទៀតអ្នកក៏គួរមើលទៅលើចំណុចខ្លាំង ចំណុចខ្សោយរបស់ខ្លួនជាក់ស្តែង ហើយត្រូវតាំងចិត្តរៀនឱ្យមុតមាំថា បញ្ចប់ការសិក្សាដើម្បីស្វែងរកការងារ ដើម្បីចិញ្ចឹមជីវិត និងអាចផ្លាស់ប្ដូរខ្លួនឯងបាន៕
