ប្រទេសកម្ពុជាបានឆ្លងកាត់សង្គ្រាមជាច្រើនដំណាក់កាលមកហើយ​ រួមទាំងសោកនាដកម្មដ៏អាក្រក់បំផុត គឺរបបប្រល័យពូជសាសន៍​។ ប្រជាជនខ្មែរ​គ្រប់រូបពិត​ជា​មិន​ចង់​ឃើញ​សង្រ្គាមបន្ត​ទៅទៀត​នោះទេ ហើយ​បានយល់ពី​គុណតម្លៃនៃសន្តិភាព និង​ខិតខំថែរក្សាមិនចង់ឱ្យបាត់បង់ទៅវិញនោះឡើយ។

កញ្ញា សាន់ ពុធ ដេបូរ៉ា អ្នកបង្កើតមាតិកាលើបណ្ដាញសង្គម បានលើកឡើងថា ពាក្យ “សន្តិភាព” មានន័យថា​ នៅក្នុងចិត្តយើងមានភាពសុខសាន្ត មានភាពស្ងប់ស្ងាត់។ ហើយបើមើលទៅលើបរិបទសង្គម គឺមានភាពសុខសាន្ត មានសុវត្ថិភាព ហើយមិន​មានបញ្ហាជម្លោះអ្វីឡើយ។

អ្នកបង្កើតមាតិកាលើបណ្ដាញសង្គមរូបនេះ និយាយថា មូលហេតុដែលនាំឱ្យកញ្ញា ចង់បានសន្តិភាព ព្រោះនៅពេលដែលមានសន្តិភាព អ្វីទាំងអស់នឹងល្អប្រសើរ មិនថាសុខភាពផ្លូវចិត្ត ឬក៏ប្រាស្រ័យទាក់ទងជាមួយគ្រួសារ មិត្តភក្ដិ អ្នកជិតខាង គឺល្អប្រសើរនៅពេលយើងមានសន្តិភាព។

កញ្ញា សាន់ ពុធ ដេបូរ៉ា បញ្ជាក់ថា កត្តាដែលធ្វើឱ្យកញ្ញាឱ្យតម្លៃសន្តិភាពកាន់តែខ្លាំងជាងមុន គឺទាក់ទងនឹងបញ្ហាព្រំដែនដែល​កំពុង​កើតឡើងនេះ មានន័យថា ពេលកញ្ញាឃើញរឿងនោះហើយធ្វើឱ្យកាន់តែឱ្យតម្លៃសន្តិភាពថា នៅពេលយើងមានសន្តិភាពយើងមានការសប្បាយរីករាយ ភាពសុខសាន្ត ជួយជំរុញឱ្យយើងរីកចម្រើន និងការអភិវឌ្ឍបន្ថែមទៀត។

កញ្ញា សាន់ ពុធ ដេបូរ៉ា យល់ថា ក្នុងនាមជាយុវជន អ្វីដែលអាចធ្វើបានដើម្បីរក្សាសន្តិភាព គឺការខិតខំសិក្សាបន្ថែមទៀត នៅពេលយើងខំប្រឹងរៀន យើងមានចំណេះដឹង នៅពេលយើងមានចំណេះដឹង យើងអាចបែងចែកថា អ្វីត្រូវ អ្វីមិនត្រូវ អ្វីដែលជាការពិត និងអ្វីដែលមិនពិត។ នៅពេលយើងមានចំណេះដឹងខ្ពង់ខ្ពស់ល្អ គឺអាចជួយប្រទេសជាតិយើងកាន់តែអភិវឌ្ឍ កាន់តែរីកចម្រើន ទៅកាន់ការរក្សាសន្តិភាពឱ្យកាន់តែយូរអង្វែង។

ជាមួយគ្នានេះ លោក តុន ច័ន្ទរិទ្ធិ ជាអ្នកនិពន្ធ យល់ថា ពាក្យ “សន្តិភាព” គឺភាពស្ងប់សុខ ទាំងផ្លូវចិត្ត និងផ្លូវកាយ មិនជួបការរំខាន រួមទាំងសង្គ្រាមជាដើម។ លោក តុន ច័ន្ទរិទ្ធិ បន្តថា សន្តិភាពប្រៀបដូចជាខ្យល់ដង្ហើមដែលមនុស្សត្រូវការជារៀងរាល់ថ្ងៃ។

អ្នកនិពន្ធរូបនេះ បញ្ជាក់ថា មូលហេតុដែលលោកចង់បានសន្តិភាព និងឱ្យតម្លៃសន្តិភាពជាងមុន ពីព្រោះសង្គ្រាមបានបំផ្លាញអ្វីៗគ្រប់យ៉ាង មនុស្សជាច្រើនបានបាត់បង់អាយុជីវិត ក្មេងៗភ័យខ្លាចគ្រាប់កាំភ្លើង ហើយមានមនុស្សជាច្រើនព្រាត់ប្រាស់គ្រួសារ។ ទន្ទឹមគ្នានេះ សង្គ្រាមបំផ្លាញទាំងអនាគត បំផ្លាញទាំងក្ដីស្រមៃ បំផ្លាញទាំងការអប់រំ បំផ្លាញគ្រប់សព្វបែបយ៉ាងតែម្ដង។

“សង្គ្រាមមានតែភាពឈឺចាប់​ ភាពបាក់បែក ប៉ុន្តែក្ដីសុខពិតប្រាកដ គឺសន្តិភាព ទោះយើងខំច្បាំង ធ្វើឱ្យគ្នាឈឺចាប់ម៉េចក៏ដោយ ចុងក្រោយយើងរស់នៅក្រោមមេឃតែមួយ អ្វីដែលមនុស្សគួរធ្វើ គឺធ្វើជាមនុស្សដែលត្រឹមត្រូវ មិនឈ្លានពានអ្នកដទៃ”

លោក តុន ច័ន្ទរិទ្ធិ បន្ថែមថា លោកមិនចង់ឱ្យមនុស្សជំនាន់ក្រោយរស់នៅក្នុងអតីតកាលបែបនោះទៀតទេ ពោលគឺចង់បានសន្តិភាពមួយពិតប្រាកដ ដើម្បីឱ្យមនុស្សរស់នៅជាមួយភាពសុខដុមរម្យនា។ លើសពីនេះ លោកចង់ឃើញមនុស្សជំនាន់ក្រោយរស់នៅជាមួយភាពរីករាយ ភាពសប្បាយ ដោយគ្មានភាពភ័យខ្លាច ពួកគេអាចទៅរៀន ទទួលការអប់រំ មានអនាគតល្អ។ លោក តុន ច័ន្ទរិទ្ធិ ក៏បានលើកទឹកចិត្តយុវជន និងប្រជាជនកម្ពុជា ឱ្យក្លាហានប្រើសំឡេងដើម្បីការពារភាពត្រឹមត្រូវរបស់ប្រទេសជាតិយើង។ “សូមកុំឱ្យព័ត៌មានមិនពិត បានឮជាងការពិតរបស់យើង ហើយចូរចាំថាជំនាន់របស់យើង គឺជាជំនាន់នៃការកសាងប្រវត្តិសាស្រ្ត និងបញ្ចប់សង្គ្រាម ព្រោះយើងគឺជាជនជាតិ ដែលស្រឡាញ់សន្តិភាព“។

ឯកឧត្តមបណ្ឌិត ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញ បានលើកឡើងថា ពាក្យថា “អរគុណសន្តិភាព” មានតម្លៃបំផុតសម្រាប់រូបលោក និងរំឭកលោកពីអតីតកាលដ៏សែនរន្ធត់ ព្រោះលោកបណ្ឌិតបានកើត និងរស់នៅក្នុងសង្គ្រាមឥណ្ឌូចិនពេញមួយវ័យកុមារភាព។ ចំណែកបងប្អូនរបស់លោកដែលជាកងទ័ព ក៏បានលះបង់ជីវិតច្រើននាក់ដែរក្នុងសមរភូមិរំដោះ និងការពារទឹកដីនាពេលនោះ។ ហេតុនេះលោកថា សន្តិភាពដែលបានមកពីសម្តេចតេជោ គឺមានតម្លៃណាស់ ជាសម្បត្តិសម្រាប់កម្ពុជា។

គួរជំរាបជូនថា ចាប់ផ្តើម​តាំងពីដើមឆ្នាំ២០២០ ពាក្យ “អរគុណសន្តិភាព!” ត្រូវ​បានបិទនៅតាមសាលារៀន មណ្ឌលសុខភាព មូលដ្ឋានកងរាជអាវុធហត្ថ និងសាលាក្រុងនានា ទូទាំងប្រទេស ដើម្បីឱ្យប្រជាជនកម្ពុជាទាំងអស់ផ្តល់តម្លៃដល់សន្តិភាព។ បើគ្មានសន្តិភាព គ្មានអ្វីៗទាំងអស់!៕