ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពិធីបុណ្យភ្ជុំបិណ្ឌជាឱកាសជួបជុំសម្រាប់និស្សិតខ្មែរដែលកំពុងសិក្សានៅក្រៅប្រទេសដើម្បីបានចែករំលែកបទពិសោធន៍ល្អៗ ការធ្វើបុណ្យរួមគ្នា និងបន្ថយការនឹកស្រុកកំណើតផងដែរ។ នេះជាការលើកឡើងរបស់លោក ខ្វែង ភារម្យ ប្រធានសមាគមនិស្សិតខ្មែរប្រចាំសហព័ន្ធរុស្សី ។
លោក ខ្វែង ភារម្យ បានលើកឡើងថា ក្នុងឱកាសបុណ្យភ្ជុំបិណ្ឌនេះ សមាគមន៍និស្សិតខ្មែរប្រចាំសហព័ន្ធរុស្សីនឹងមានគម្រោងទៅកាន់វត្តពុទ្ធសាសនាមីយ៉ានម៉ាក្នុងប្រទេសរុស្សី ព្រោះនៅក្នុងប្រទេសរុស្សីនេះមិនមានវត្តពុទ្ធសាសនាខ្មែរទេ ។ លោកបន្តថា ការទៅវត្តជួបជុំគ្នានេះជាទំនៀមទម្លាប់ល្អមួយសម្រាប់ប្រជាជនខ្មែរក៏ដូចជានិស្សិតដែលកំពុងសិក្សានៅក្រៅប្រទេស ព្រោះអាចជួយឱ្យបាត់នឹកផ្ទះ និងមានការជួបជុំនិស្សិតដែលនៅតំបន់ដាច់ស្រយាល ឬនៅឆ្ងាយពីគ្នាដើម្បីធ្វើបុណ្យ និងឱកាសចែករំលែកបទពិសោធន៍ការសិក្សា ឬសួរសុខទុក្ខគ្នាជាដើម។
ជាមួយគ្នានេះ បើទោះបីជានៅឆ្ងាយប៉ុន្តែសិស្សនិស្សិតទាំងអស់ក៏បានរៀបចំចង្ហាន់ ម្ហូបអាហារ និងភេសជ្ជៈ ប្រគេនព្រះសង្ឃដើម្បីឧទ្ទិសជូនដល់ញាតិកាទាំងប្រាំពីរសណ្ដានដែលបានចែកឋានទៅ។ លោក ខ្វែង ភារម្យ បន្ថែមថា ក្រៅពីគម្រោងទៅបុណ្យពេលខាងមុខ ក៏មាននិស្សិតខ្មែរមួយចំនួនបានទៅធ្វើបុណ្យនៅវត្តមីយ៉ានម៉ាហើយខ្លះដែរ ដើម្បីជាការជួបជុំនិងមិត្តនិស្សិតផ្សេងៗ ។
ក្នុងការលើកឡើងនេះលោក ខ្វែង ភារម្យ ក៏បានរំលេចឡើងថា លោកក៏ចង់ឱ្យមានវត្តខ្មែរនៅក្នុងប្រទេសរុស្សីដែរ ប៉ុន្តែដោយមូលហេតុថាមិនមានប្រជាជនខ្មែររស់នៅ ឬសិក្សាច្រើនដូចនៅក្នុងប្រទេសអូស្ត្រាលី ឬសហរដ្ឋអាមេរិកឡើយ៕
