ភ្នំពេញ – សមាគមកាយឫទ្ធិនារីកម្ពុជាបានក្លាយជាម្ចាស់ផ្ទះរៀបចំសន្និបាតពិភពលោកលើកទី៣៩ ឆ្នាំ២០២៦ បន្ទាប់ពីជាប់ឆ្នោតនៅអង្គសន្និបាតលើកទី៣៨ របស់សមាគមកាយឫទ្ធិនារីពិភពលោក (38th WAGGGS Conference) នៅសាធារណរដ្ឋ Cyprus ដែលដឹកនាំប្រតិភូចូលរួមដោយលោកជំទាវបណ្ឌិត ពេជ ចន្ទមុន្នី អគ្គស្នងការសមាគមកាយឫទ្ធិនារីកម្ពុជា ចាប់ពីថ្ងៃទី២៦ ដល់ថ្ងៃទី៣១ ខែកក្កដា ឆ្នាំ២០២៣ ។ ជោគជ័យចំពោះការត្រៀមខ្លួនរៀបចំសន្និបាតពិភពលោកនេះ ទទួលបានការអបអរសាទរយ៉ាងខ្លាំង និងជាមោទនភាពសម្រាប់កម្ពុជា ។

សេចក្តីប្រកាសព័ត៌មានរបស់សមាគមកាយឫទ្ធិនារីកម្ពុជា បានឱ្យដឹងថា លោកជំទាវបណ្ឌិត ពេជ ចន្ទមុន្នី បានដឹកនាំគណៈប្រតិភូទៅចូលរួមអង្គសន្និបាតលើកទី ៣៨ របស់សមាគមកាយឫទ្ធិនារីពិភពលោក និងបានព្យាយាមយ៉ាងសកម្មដើម្បីស្នើបេក្ខភាពកម្ពុជាឱ្យបានចូលរួមបោះឆ្នោតជ្រើសរើសប្រទេស ធ្វើជាម្ចាស់ផ្ទះសម្រាប់រៀបចំសន្និបាតពិភពលោកលើកទី៣៩ ឆ្នាំ២០២៦ ។

សមាគមកាយឫទ្ធិនារីកម្ពុជា បានបញ្ជាក់ថា កម្ពុជាបានជាប់ក្នុងចំណោមបីប្រទេសចុងក្រោយ រួមមាន កម្ពុជា, ហ្គាណា, និងទុយនេស៊ី ក្រោយពីគណៈកម្មាធិការបានវាយតម្លៃយ៉ាងល្អិតល្អន់ឈានទៅបោះឆ្នោតវគ្គបន្ត ។ បន្ទាប់មកកម្ពុជាបានបន្តជាប់ក្នុងចំណោមពីរប្រទេសចុងក្រោយ គឺកម្ពុជា និងហ្គាណា ដើម្បីឈានទៅបោះឆ្នោតសម្រេចផ្ដាច់ព្រ័ត្រ ហើយនៅទីបំផុតព្រះរាជាណាចក្រកម្ពុជាត្រូវបានជ្រើសរើសឱ្យធ្វើជាម្ចាស់ផ្ទះរៀបចំសន្និបាតពិភពលោកលើកទី៣៩ ។

ថ្លែងនៅក្នុងសន្និសីទសារព័ត៌មានបន្ទាប់ត្រឡប់ពីចូលរួមកិច្ចប្រជុំសមាគមកាយឫទ្ធិនារីពិភពលោកក្នុងប្រទេសសាយប្រឹស នៅថ្ងៃទី២ ខែសីហា ឆ្នាំ២០២៣ នាព្រលានយន្តហោះអន្តរជាតិភ្នំពេញ លោកជំទាវបណ្ឌិត ពេជ ចន្ទមុន្នី បានលើកឡើងថា នេះជាលើកទីមួយដែលកម្ពុជាក្លាយជាប្រទេសម្ចាស់ផ្ទះនៃសន្និសីទកាយរិទ្ធនារីពិភពលោក បន្ទាប់ពីបានចូលជាសមាជិកនៃសមាគមដ៏ធំមួយនេះជាង ៧០ឆ្នាំមុន។ លោកជំទាវលើកឡើងថា ការក្លាយខ្លួនជាប្រទេសម្ចាស់ផ្ទះនៃសន្និសីទកាយរិទ្ធនារីនេះ បានបង្ហាញពីសុខសន្តិភាព ស្ថេរភាព និងការអភិវឌ្ឍនៃប្រទេសកម្ពុជា និងជាឱកាសសម្រាប់កម្ពុជាក្នុងការបង្ហាញទៅកាន់ពិភពលោកនូវវប្បធម៌ ទេសចរណ៍ ការអភិវឌ្ឍរបស់ខ្លួនផងដែរ។

សូមជម្រាបថា សមាគមកាយប្ញទ្ធិនារីពិភពលោក (WAGGGS) មានសមាជិកមកពី ១៦៩ប្រទេសមកពីគ្រប់ទ្វីបលើពិភពលោក៕