ក្នុងគោលបំណងធ្វើឱ្យប្រសើរឡើងនូវការគ្រប់គ្រង និងការផ្តល់សេវាអប់រំយុវជន និងកីឡា ប្រកបដោយប្រសិទ្ធភាព គុណភាព គណនេយ្យភាព តម្លាភាព បរិយាប័ណ្ន និងសមធម៌សង្គម រាជរដ្ឋាភិបាលកម្ពុជា បានសម្រេចធ្វើការផ្ទេរការទទួលខុសត្រូវក្នុងការគ្រប់គ្រង និងការផ្តល់សេវាអប់រំ ពីថ្នាក់ជាតិទៅឱ្យរដ្ឋបាលក្រុង ស្រុក ខណ្ឌទូទាំងប្រទេសវិញ។

បើយោងតាមអនុក្រឹត្យ ស្តីពីការផ្ទេរមុខងារក្នុងវិស័យអប់រំ យុវជន និងកីឡា ចុះថ្ងៃទី២៨ ខែកក្កដា ឆ្នាំ២០២៣ បានបញ្ជាក់ថា វិស័យអប់រំចំនួន៣ ដែលត្រូវផ្ទេរទៅឱ្យរដ្ឋបាលក្រុង ស្រុក ខណ្ឌ រួមមាន ៖ ១.មុខងារគ្រប់គ្រងការអប់រំកុមារតូច, ២.មុខងារគ្រប់គ្រងការអប់រំបឋមសិក្សា និង ៣.មុខងារគ្រប់គ្រងការអប់រំក្រៅប្រព័ន្ធ។

ក្នុងនោះ ក៏មានការធ្វើប្រតិភូកម្មមុខងារគាំទ្រផ្នែករដ្ឋបាលក្នុងវិស័យអប់រំ យុវជន និងកីឡា ចំនួន៣ ទៅឱ្យរដ្ឋបាលក្រុង ស្រុក ខណ្ឌ ផងដែរ រួមមាន ៖ ១.មុខងារគាំទ្រផ្នែករដ្ឋបាលដល់គ្រឹះស្ថានមធ្យមសិក្សាចំណេះទូទៅ, ២.មុខងារគាំទ្រផ្នែករដ្ឋបាលដល់ការងារអភិវឌ្ឍយុវជន និង ៣.មុខងារគាំទ្រផ្នែករដ្ឋបាលដល់ការងារអប់រំកាយ និងកីឡា។

ពាក់ព័ន្ធនឹងការផ្ទេរធនធានមនុស្ស បើតាមមាត្រា១១ នៃអនុក្រឹត្យ បញ្ជាក់ថា ក្រោមការសម្របសម្រួលរបស់ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) ក្រសួងអប់រំ យុវជន និងកីឡា ត្រូវសហការជាមួយក្រសួងមុខងារសាធារណៈ និងរដ្ឋបាលក្រុង ស្រុក ខណ្ឌ ដើម្បីកំណត់ និងផ្ទេរបុគ្គលិកអប់រំដែលកំពុងបម្រើការងារនៅតាមគ្រឹះស្ថានមត្តេយ្យសិក្សាសាធារណៈ គ្រឹះស្ថានបឋមសិក្សាសាធារណៈ និងមជ្ឈមណ្ឌលសិក្សាសហគមន៍ទៅឱ្យរដ្ឋបាលក្រុង ស្រុក ខណ្ឌនីមួយៗស្របតាមបែបបទ និងនីតិវិធីជាធរមាន។

តែយ៉ាងណាក៏ដោយ បើយោងតាមមាត្រា២៤ នៃអនុក្រឹត្យ ក្រសួងអប់រំ យុវជន និងកីឡា នៅតែមានតួនាទី និងភារកិច្ច ក្នុងការរៀបចំគោលនយោបាយ ស្តង់ដាអប់រំ ផែនការយុទ្ធសាស្រ្ត លិខិតបទដ្ឋានគតិយុត្តនានា, រៀបចំកម្មវិធីសិក្សា វិធីសាស្រ្តបង្រៀន និងសៀវភៅសិក្សាគោល, កំណត់និយាមសម្រាប់ការសាងសង់ហេដ្ឋារចនាសម្ព័ន្ធ ស្តង់ដាអប្បបរមាសម្រាប់ផ្គត់ផ្គង់ និងការប្រើប្រាស់បុគ្គលិក, ផ្តល់ការសាងសង់ និងការជួសជុលហេដ្ឋារចនាសម្ព័ន្ធនានាសម្រាប់គ្រឹះស្ថានសិក្សាសាធារណៈ, ផ្តល់ការគាំទ្រ និងលើកទឹកចិត្តដល់រដ្ឋបាលក្រុង ស្រុក ខណ្ឌ និងបុគ្គលិកអប់រំ ដែលត្រូវបានផ្ទេរទៅឱ្យរដ្ឋបាលក្រុង ស្រុក ខណ្ឌ, ជ្រើសរើស បណ្តុះបណ្តាល បែងចែក និងវិក្រឹតការគ្រូមតេយ្យសិក្សា និងគ្រូបឋមសិក្សា, ផ្តល់ការបណ្តុះបណ្តាលដល់រដ្ឋបាលក្រុង ស្រុក ខណ្ឌអំពីការគ្រប់គ្រង ការចាត់ចែង និងការអនុវត្តមុខងារដែលបានប្រគល់ និងបានធ្វើប្រតិភូកម្ម, កៀរគរធនធានពីប្រភពស្របច្បាប់នានាសម្រាប់គាំទ្រដល់កម្មវិធី ឬសកម្មភាពនានាពាក់ព័ន្ធនឹងការកែលម្អគុណភាព នៃការអប់រំ យុវជន និងកីឡា, តាមដាន ត្រួតពិនិត្យ និងវាយតម្លៃលើការអនុវត្តមុខងារអប់រំ យុវជន និងកីឡាដែលបានប្រគល់ និងបានធ្វើប្រតិភូកម្ម, វាយតម្លៃគុណភាពសេវាអប់រំ យុវជន និងកីឡា ដែលបានប្រគល់ និងបានធ្វើប្រតិភូកម្ម, អនុវត្តតួនាទី ភារកិច្ចផ្សេងទៀតស្របតាមលិខិតបទដ្ឋានគតិយុត្តជាធរមាន។

ក្រសួងអប់រំ យុវជន និងកីឡា អាចធ្វើប្រតិភូកម្មជូនមន្ទីរអប់រំ យុវជន និងកីឡារាជធានី ខេត្តក្នុងការគាំទ្របច្ចេកទេស ការអភិវឌ្ឍសមត្ថភាព ការតាមដាន ការត្រួតពិនិត្យ ការវាយតម្លៃ ការធ្វើអធិការកិច្ច សវនកម្ម និងកិច្ចការផ្សេងទៀតតាមការចាំបាច់លើការអនុវត្តមុខងារអប់រំដែលបានប្រគល់ និងបានធ្វើប្រតិភូកម្មទៅរដ្ឋបាលក្រុង ស្រុក ខណ្ឌ៕