ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – បន្ទាប់ពីបញ្ចប់ដោយជោគជ័យ ក្នុងការរៀបចំព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ពេលនេះ ប្រទេសកម្ពុជាទាំងមូល កំពុងត្រៀមខ្លួនសម្រាប់ព្រឹត្តិការណ៍ប្រកួតអាស៊ានប៉ារ៉ាហ្គេមលើកទី១២ ដែលនឹងចាប់ផ្តើមពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ខាងមុខ ក្នុងទឹកដី នៃព្រះរាជាណាចក្រកម្ពុជា។
ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា មានប្រសាសន៍ថា ក្នុងដំណើរឆ្ពោះទៅការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ កម្ពុជាត្រៀមខ្លួនជាស្រេចក្នុងការទទួលគណៈប្រតិភូប៉ារ៉ាហ្គេមទាំង១១ប្រទេស មកកាន់ទឹកដីដ៏ស្រស់បំព្រងរបស់យើង។
“សូមចូលរួមគាំទ្រដល់អត្តពលិកប៉ារ៉ាឡាំពិកកម្ពុជារបស់យើង ខណៈវេលានេះអត្តពលិកទាំងអស់បាន និងកំពុងផ្តោតទាំងកាយទាំងចិត្ត ស្មារតី ក្នុងការហ្វឹកហាត់តាមវិញ្ញាសារនីមួយៗ ក៏ដូចជាត្រៀមខ្លួនគ្រប់ជ្រុងជ្រោយក្នុងការសម្រេចឱ្យបាននូវជោគជ័យជាសមិទ្ធផលថ្មីបន្ថែមជូនជាតិមាតុភូមិរបស់យើង”
កីឡាអាស៊ានប៉ារ៉ាហ្គេម គឺជាព្រឹត្តិការណ៍ នៃការប្រកួតកីឡាអន្តរជាតិសម្រាប់ជនពិការក្នុងក្របខណ្ឌប្រទេសនៅតំបន់អាស៊ីអាគ្នេយ៍ ដែលបានផ្តួចផ្តើមគំនិតបង្កើតឡើងក្នុងឆ្នាំ២០០០ ដោយលោក ហ្សាយណល អាប៊ូសារីម ជនជាតិម៉ាឡេស៊ី ដែលជាប្រធានគណៈកម្មការប៉ារ៉ាឡាំពិកម៉ាឡេស៊ី។
នៅថ្ងៃទី២៨ ខែមេសា ឆ្នាំ២០០១ ប្រទេសស្ថាបនិក នៃកីឡាអាស៊ានប៉ារ៉ាហ្គេមទាំង១០ រួមមាន កម្ពុជា ប្រ៊ុយណេ ឥណ្ឌូនេស៊ី មីយ៉ានម៉ា ឡាវ ហ្វីលីពីន សិង្ហបុរី ថៃឡង់ ម៉ាឡេស៊ី និងវៀតណាម បានសម្រេចរៀបចំព្រឹត្តិការណ៍កីឡាអាស៊ានប៉ារ៉ាហ្គេមក្នុងរយៈពេល២ឆ្នាំម្តង ដើម្បីបង្ហាញនូវចេតនា និងឥទ្ធិពលជូនឆាកអន្តរជាតិអំពីសមត្ថភាព និងសក្តានុពលអត្តពលិកជនមានពិការភាពនៅក្នុងតំបន់អាស៊ីអាគ្នេយ៍។
បន្ទាប់មកនៅថ្ងៃទី២៣ ខែតុលា ឆ្នាំ២០០១ សហព័ន្ធកីឡាជនមានពិការភាពអាស៊ាន (APSF) ដែលជាអង្គការចាត់តាំងកិលាជនមានពិការភាពក្នុងតំបន់អាស៊ីអាគ្នេយ៍ត្រូវបានបង្កើតឡើង ដើម្បីដឹកនាំ និងគ្រប់គ្រងការប្រកួតកីឡាអាស៊ានប៉ារ៉ាហ្គេម។
កីឡាអាស៊ានប៉ារ៉ាហ្គេមត្រូវបានរៀបចំជាលើកដំបូង ពីថ្ងៃទី២៦ ដល់ថ្ងៃទី២៩ ខែតុលា ឆ្នាំ២០០១ នៅទីក្រុងគូឡាឡាំពួ ប្រទេសម៉ាឡេស៊ី និងត្រូវបានរៀបចំជាបន្តបន្ទាប់នៅតាមបណ្តាប្រទេសសមាជិកអាស៊ាននានា។ រហូតមកដល់ពេលនេះ ព្រឹត្តិការណ៍អាស៊ានប៉ារ៉ាហ្គេមមាន១១លើករួចមកហើយ។
កម្ពុជាទទួលបានជោគជ័យយ៉ាងធំធេងក្នុងព្រឹត្តិការណ៍អាស៊ានប៉ារ៉ាហ្គេមលើកទី១១ ដែលបានប្រារព្ធធ្វើឡើងនៅប្រទេសឥណ្ឌូនេស៊ីក្នុងឆ្នាំ២០២២ ។ កម្ពុជាបានបង្កើតប្រវត្តិសាស្រ្តដោយទទួលបានមេដាយមាសចំនួន៧ មេដាយប្រាក់ចំនួន១០ និងមេដាយសំរឹទ្ធចំនួន១១។
កីឡាអាស៊ានប៉ារ៉ាហ្គេមលើកទី១២ នឹងរៀបចំឡើងនៅប្រទេសកម្ពុជាដែលចាប់ផ្តើមពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ក្នុងនោះមានការប្រកួតកីឡា១៤ប្រភេទ ក្រោមប្រធានបទ «កីឡារស់ក្នុងសន្តិភាព»៕
