ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិក្ខាសាលាធនាគារ និងហិរញ្ញវត្ថុឆ្នាំ២០២៤ រៀបចំឡើងដោយក្លឹបធនាគារ និងហិរញ្ញវត្ថុផារ៉ាហ្គន ដែលប្រព្រឹត្តទៅកាលពីពេលថ្មីៗនេះ បានបន្សល់ទុកនូវចំណេះដឹងជាច្រើន ដល់សិស្ស និស្សិតដែលចូលរួម ឈ្វេងយល់ពីអាជីពចំនួន៣ ដែលមិនសូវមានអ្នកស្គាល់ និងចាប់អារម្មណ៍ច្រើនក្នុងវិស័យហិរញ្ញវត្ថុ នោះគឺ អ្នកគណនាវាយតម្លៃធានារ៉ាប់រង（Actuary）, មន្ត្រីប្រតិបត្តិអនុលោមបញ្ញត្តិ (Compliance officer), និងអ្នកវិភាគវិនិយោគ (Investment analyst)។
ក្នុងសិក្ខាសាលាក្រោមប្រធានបទ “Beyond Traditional Accounting and Finance Roles” អ្នកស្រីជា សូលីន នាយកអនុលោមបញ្ញត្តិ នៃធនាគារ ផេនដាខមមើសលប៊ែង ដែលមានបទពិសោធន៍យូរឆ្នាំក្នុងអាជីពជាមន្រ្តី និងប្រធានប្រតិបត្តិតាម (ឬអនុលោមបញ្ញត្តិ) បានសង្កត់ធ្ងន់នៅក្នុងបទបង្ហាញថា ក្រៅតែពីចំណេះដឹង អ្វីដែលសិស្សនិស្សិតត្រូវប្រកាន់ខ្ជាប់នោះគឺសីលធម៌ ព្រោះវាមានសារៈសំខាន់នៅក្នុងការប្រាស្រ័យទាក់ទងនៅកន្លែងការងារ និងកសាងទំនាក់ទំនងល្អទៅវិញទៅមកប្រកបដោយគុណធម៌។
ចំណែកឯលោក តាំង លីមឈួង នាយកប្រតិបត្តិវិនិយោគ នៃ ក្រុមហ៊ុន អមរា ឃែភីថល ដែលជាអ្នកគ្រប់គ្រងមូលនិធិឆ្នើមមួយរូប បានក្រើនរំលឹកដល់សិក្ខាកាមថា ប្រសិនបើយើងចង់ប្រឡូកក្នុងវិស័យវិនិយោគ យើងត្រូវសម្លឹងឱ្យហើយថា តើវិស័យណាដែលយើងស្រឡាញ់។ បន្ទាប់មកជ្រើសរើសមេដែលល្អ បង្ហាត់បង្រៀនការងារ និងបង្ហាញផ្លូវជោគជ័យលើវិថីវិនិយោគ។
រីឯកញ្ញា សំ ចន្ទ្រា ដែលមានជំនាញយ៉ាងចំណានក្នុងវិស័យធានារ៉ាប់រង នៃក្រុមហ៊ុនធានារ៉ាប់រងហ្វតតេ បានបង្ហាញថាការងារចម្បងរបស់អ្នកគណនាវាយតមម្លៃធានារ៉ាប់រង គឺបង្កើតផលិតផលធានារ៉ាប់រងថ្មីៗ កំណត់តម្លៃលក់ និងបុព្វលាភដែលអតិថិជនត្រូវបង់។ អ្នកឯកទេសខាងធានារ៉ាប់រងអាយុជីវិតរូបនេះ បានបន្ថែមទៀតថា ធានារ៉ាប់រងអាយុជីវិតនេះ អាចមានរយៈពេលវែង ពី១០ ទៅ៣០ឆ្នាំ ដែលទាមទារឱ្យមានការគណនាច្រើនដំណាក់កាល។ កញ្ញាក៏បានផ្ដល់នូវដំបូន្មានឱ្យសិស្ស និស្សិត ព្យាយាមសិក្សារៀនសូត្រ យកវិញ្ញាបនបត្រ បញ្ជាក់គុណវុឌ្ឍិផ្នែក Actuarial នេះផ្ទាល់ នោះគឺ SOA។
ក្នុងសិក្ខាសាលានោះក៏បានរួមបញ្ចូលនូវកិច្ចពិភាក្សាតុមូល ដើម្បីឱ្យសិក្ខាកាមមានឱកាសបានលើកឡើងជាសំណួរ ចោទសួរទៅកាន់វាគ្មិនកិត្តិយស ទាក់ទងនឹងផែនការការងារ និងទីផ្សារការងារ ជាពិសេសបទពិសោធន៍ និងបញ្ហាប្រឈមនានារបស់ពួកគាត់ផ្ទាល់៕
