ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធីពិព័រណ៌ឱកាស ២០២៥ (AOKAS 2025) ជាវេទិកាលើកកម្ពស់ការអប់រំ អាជីព សហគ្រិនភាព និងយុជន នៅកម្ពុជាឱ្យបានស្វែងយល់ និងស្វែងរកឱកាសជាច្រើនដែលនឹងដាក់តាំងពិព័រណ៌ជាច្រើនស្តង់នាថ្ងៃទី២៥ ដល់ថ្ងៃទី២៧ ខែកក្កដា ឆ្នាំ២០២៥ ខាងមុខនេះ។
លោក ជា សុខហ៊ី សហស្ថាបនិក AOKAS បានលើកឡើងថា AOKAS ជាមួយក្រុមហ៊ុនឯកជននានា និងក្រសួងការងារ និងបណ្ដុះបណ្ដាលវិជ្ជាជីវៈ នឹងរួមគ្នាក្នុងការដោះស្រាយបញ្ហាមួយចំនួនក្នុងដំណើរការសិក្សាមិនច្បាស់លាស់របស់សិស្ស និស្សិត ដែលមានគម្លាតនៃជំនាញ កង្វះឱកាសការងារ ឬកង្វះអាជីវកម្ម។ សហស្ថាបនិករូបនេះបន្តថា ព្រឹត្តិការណ៍ ពិព័រណ៌ឱកាស២០២៥ នឹងចែករំលែកចំណេះដឹង ថ្នាក់រៀនជំនាញខ្លីៗ និងការតាំងពិព័រណ៍ ពីសំណាក់សិស្សានុសិស្សនៃថ្នាក់វិទ្យាល័យ សាកលវិទ្យាល័យ ធុរកិច្ចថ្មី អាជីវកម្មខ្នាតតូច និងមធ្យម អង្គការ សមាគម សភាពាណិជ្ជកម្ម និងស្ថាប័នរដ្ឋជាដើម។
លើសពីនេះ សិស្សានុសិស្ស និងអ្នកចូលរួមនឹងទទួលបានឱកាសស្វែងយល់ពីការបន្តការសិក្សាក្នុង និងក្រៅប្រទេស ឱកាសស្ម័គ្រចិត្ត ហាត់ការ ការងារ និងសម្រាប់សហគ្រិន ចាប់ផ្ដើមអាជីវកម្ម និងពង្រីកអាជីវកម្ម។
ឯកឧត្ដម ម៉ុល វិបុល អនុរដ្ឋលេខាធិកានៃក្រសួងការងារ និងបណ្ដុះបណ្ដាលវិជ្ជាជីវៈ ថ្លែងថា ដើម្បីបន្តចូលរួមអនុវត្តឱ្យបានជោគជ័យយុទ្ធសាស្ត្របញ្ចកោណ ដំណាក់កាលទី១ និងនយោបាយជាតិនានា របស់រាជរដ្ឋាភិបាល នីតិកាលទី៧ នៃរដ្ឋសភា ក្រសួងការងារ និងបណ្ដុះបណ្ដាលវិជ្ជាជីវៈ ចូលរួម និងគាំទ្រយ៉ាងសកម្មជាមួយស្ថាប័ន និងដៃគូពាក់ព័ន្ធ ដើម្បីធានា ការផ្ដល់ព័ត៌មានទីផ្សារការងារ និងមគ្គទេសក៍គ្រប់គ្រាន់, ភាពសុខសាន្តនៅកន្លែងការងារ, យន្តការគាំពារ និងការពារកិត្តិយស, ការអភិវឌ្ឍរបបសន្តិសុខសង្គមពេញលេញ។
ក្នុងន័យនេះ ឯកឧត្ដម ម៉ុល វិបុល ក្នុងនាមតំណាងឱ្យក្រសួងការងារ និងបណ្ដុះបណ្ដាលវិជ្ជាជីវៈ ក៏បានលើកឡើងនូវយុទ្ធសាស្ត្រចំនួន៦ក្នុងគោលបំណងរួមចំណែកបង្កើត រក្សា និងបង្កើនការងារទាំងបរិមាណ និងគុណភាពដល់ប្រជាជនកម្ពុជា អភិវឌ្ឍមូលធនមនុស្សប្រកបដោយចំណេះដឹង ជំនាញ ឥរិយាបថការងារ សីលធម៌វិជ្ជាជីវៈ ផលិតភាព និងភាពប្រកួតប្រជែងខ្ពស់, លើកកម្ពស់បរិយាកាសការងារល្អប្រសើរទាំងសម្រាប់កម្មករនិយោជិត ទាំងក្នុង និងក្រៅប្រព័ន្ធ និងទាំងសម្រាប់និយោជក, ធានាសុវត្ថិភាព និងសេចក្តីថ្លៃថ្នូរជូនពលករទេសន្តរប្រវេសន៍ និងពង្រីកការគ្របដណ្ដប់នៃរបបសន្តិសុខសង្គមឱ្យកាន់តែទូលំទូលាយ។
គួរបញ្ជាក់ថា ការលើកឡើងខាងលើបានធ្វើឡើងក្នុង ពិធីចុះអនុស្សារណៈយោគយល់ និងប្រកាសជាផ្លូវការ ព្រឹត្តិការណ៍ ពិព័រណ៌ឱកាស AOKAS 2025 កាលពីថ្ងៃទី១០ ខែមិថុនា កន្លងទៅនេះ៕
