ចៅក្រម​សហព័ន្ធ​នៅទីក្រុង Boston កាលពី​សប្ដាហ៍មុន បាន​រារាំងជា​បណ្ដោះអាសន្ន ចំពោះ​បទបញ្ជា​របស់​ប្រធានាធិបតី​អាម៉េរិក លោក ដូណាល់ ត្រាំ ពីការ​រារាំង​ការចូល​សហរដ្ឋ​អាម៉េរិក​ចំពោះ​និស្សិត​បរទេស ដែល​ចង់​បន្តការ​សិក្សា ឬផ្លាស់ប្ដូរ​ការសិក្សា​នៅ​សាកលវិទ្យាល័យ Harvard ។

ក្រោម​ដីកា​ផ្អាក​បណ្ដោះអាសន្ន​ចំនួន ២ទំព័រ ដែលបាន​បញ្ជូន​ទៅឱ្យ Harvard ចៅក្រម​អាម៉េរិក លោកស្រី Allison Burroughs បាន​រារាំង​ការ​ប្រកាស​របស់​លោក ត្រាំ មិន​ឱ្យ​​ចូល​ជាធរមាន ដោយ​រង់ចាំ​ការ​ដោះស្រាយ​វិវាទបន្ថែមទៀត​លើបញ្ហានេះ ចំពេល​មាន​ជម្លោះកាន់តែ​ខ្លាំងឡើង រវាង​សាលា Ivy League និង​លោកត្រាំ។

ចៅក្រម​បាន​សម្រេច​ថា បទបញ្ជា​របស់​លោកត្រាំ ដែល​ហាម​ជនបរទេស​ចូល​សហរដ្ឋអាម៉េរិក ដើម្បី​សិក្សានៅ​សាកលវិទ្យាល័យ Harvard រយៈពេល ៦ខែ អាច​បណ្ដាល​ឱ្យមានបញ្ហា និង​មិនអាច​កែខៃបាន ហើយ​តុលាការ មាន​ឱកាស​ក្នុងការ​ត្រួត​ពិនិត្យ​មើល​ករណី​នេះ។

លោកស្រី Burroughs បាន​រារាំង លោកត្រាំ កាលពី​ខែមុន​ម្ដងរួច​មក​ហើយ ជុំវិញ​ការអនុវត្ត​បទបញ្ជា​ដាច់​ដោយ​ឡែក​មួយ​ទៀត ដែល​ហាមឃាត់ Harvard ពីការ​ចុះឈ្មោះ​និស្សិតអន្តរជាតិ​ឱ្យចូលរៀន ខណៈ​ចំនួន​និស្សិត​អន្តរជាតិ មាន​រហូត​ដល់ ១/៤ នៃចំនួន​និស្សិត​សរុប​របស់​សាកលវិទ្យាល័យ។ Harvard កាលពី​ថ្ងៃព្រហស្បតិ៍ សប្ដាហ៍​មុនបានធ្វើ​វិសោធនកម្ម​បណ្តឹង​របស់ខ្លួន​ដើម្បី​ជំទាស់​នឹង​ការណែនាំ​ថ្មី ដោយ​អះអាង​ថា លោកត្រាំ កំពុង​រំលោភ​លើការ​សម្រេច​ចិត្ត​របស់ Burroughs ។

សេចក្ដី​ប្រកាស​សាកល​វិទ្យាល័យ ថ្លែង​ថា «សេចក្ដី​ប្រកាស​បដិសេធ​សិស្សានុសិស្ស​រាប់ពាន់​នាក់ នៃ​សាកលវិទ្យាល័យ Harvard នូវ​សិទ្ធិមក​កាន់​សហរដ្ឋ​អាម៉េរិក ដើម្បី​បន្តការ​សិក្សា​របស់​ពួកគេ និង​ការ​សម្រេច​ក្ដីសុបិន​របស់​ពួកគេ ហើយ​សេចក្ដី​ប្រកាស​នេះ ក៏​ហាមឃាត់​សាកលវិទ្យាល័យ Harvard មិនឱ្យ​មានសិទ្ធិ​បង្រៀន​ពួកគេ​ផងដែរ។ បើគ្មាន​វត្តមាន​និស្សិត​អន្តរជាតិ​ទេ សាកលវិទ្យាល័យ Harvard មិនមែន​ជាសាកល​វិទ្យាល័យ Harvard ទេ។»

ការបញ្ជា​របស់​លោក Burroughs កាលពីថ្ងៃព្រហស្បតិ៍​ក៏បាន​បន្តនូវ​បទបញ្ជា​ហាមឃាត់​បណ្តោះ​អាសន្នដាច់​ដោយឡែក​មួយ​ដែលនាង​បាន​ចេញ​នៅ​ថ្ងៃទី​២៣ ខែឧសភា ប្រឆាំង​នឹងការ​រឹតបន្តឹង​របស់​រដ្ឋបាល​លើការ​ចុះឈ្មោះ​និស្សិត​អន្តរជាតិ​នៅ​សាកលវិទ្យាល័យ Harvard ។

អ្នកនាំពាក្យ​សេតវិមាន Abigail Jackson បាន​ហៅ​សាលា Harvard ថា ជាកន្លែង​ក្ដៅនៃ​អ្នកប្រឆាំង​ជនជាតិ​អាម៉េរិក ប្រឆាំង​ពូជសាសន៍​យូដា និងអ្នក​បង្កជម្លោះ ដែលគាំទ្រ​ភេរវករ ហើយ​អះអាង​ថា សាលានេះ បាន​បដិសេធ រឿងនេះ​ពីមុន​មក។

លោក Jackson បាននិយាយ​នៅក្នុង​សេចក្ដីថ្លែងការណ៍​មួយថា អាកប្បកិរិយា​របស់ Harvard បានធ្វើឱ្យ​ប៉ះពាល់​ដល់​សុចរិត​ភាព​របស់​និស្សិត និងប្រព័ន្ធ​ទិដ្ឋាការ​អ្នកផ្លាស់ប្ដូរ​ទិដ្ឋាការ​របស់​សហរដ្ឋ​អាម៉េរិក​ទាំងមូល និង​អាច​បង្ក​ហានិភ័យ ដែល​ប៉ះពាល់​ដល់​សន្ដិសុខជាតិ។ ហើយ​ឥឡូវ​នេះ Harvard ត្រូវតែ​ប្រឈម​មុខ​នឹង​ផលវិបាក ដែល​កើត​ចេញពី​សកម្មភាព​របស់ខ្លួន។

លោក ត្រាំ បាន​លើកឡើង​ពីការ​ព្រួយបារម្ភ​ផ្នែក​សន្តិសុខជាតិ ហើយ​ថា នេះជាហេតុផល​សម្រាប់​ការ​រារាំង​និស្សិត​អន្តរជាតិ មិន​ឱ្យចូល​សហរដ្ឋអាម៉េរិក ដើម្បី​បន្តការ​សិក្សា​នៅ​សាកលវិទ្យាល័យ មាន​មូលដ្ឋាន​នៅ Cambridge រដ្ឋ Massachusetts។

នៅក្នុង​ការប្តឹង​ទៅតុលាការ​កាល​ពីសប្តាហ៍មុន សាកលវិទ្យាល័យ Harvard បាន​និយាយ​ថា លោក​ត្រាំ បាន​បំពាន​ច្បាប់​សហព័ន្ធ ដោយមិនគាំទ្រ​ការអះអាង​របស់​គាត់អំពី​បញ្ហា​សន្តិសុខជាតិ​នោះ​ទេ៕