ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឯកឧត្តម ឃាង សេង អនុប្រធានអង្គភាពប្រឆាំងអំពើពុករលួយ (ACU) មានប្រសាសន៍ថា នៅឆ្នាំនេះ អង្គភាពប្រឆាំងអំពើពុករលួយបានដាក់ពង្រាយមន្រ្តីជាអ្នកសង្កេតការណ៍របស់ខ្លួនសរុបចំនួន ៣៣១៨នាក់ នៅគ្រប់មណ្ឌលប្រឡងទាំងអស់នៅទូទាំងប្រទេស ដើម្បីធានាថា ការប្រឡងសញ្ញាបត្រមធ្យមសិក្សាទុតិយភូមិអាចប្រព្រឹត្តទៅដោយយុត្តិធម៌ ស្របតាមទិសស្លោក “អ្នកចេះ គឺជាប់”។
ឯកឧត្តម ឃាង សេង មានប្រសាសន៍ថា នៅឆ្នាំនេះ គឺជាឆ្នាំទី១០ហើយដែលអង្គភាពប្រឆាំងអំពើពុករលួយបានចូលរួមសង្កេតការណ៍ ហើយ ACU នៅតែគោរពទៅតាមគោលការណ៍ច្បាប់ តម្លាភាព យុត្តិធម៌ និងលទ្ធផលទទួលបាន ស្របតាមកម្មវិធីកំណែទម្រង់របស់រាជរដ្ឋាភិបាល ហើយក៏ឆ្លើយតបទៅនឹងទិសស្លោក អ្នកចេះគឺជាប់ និងប្រសាសន៍ ដ៏មានតម្លៃរបស់សម្តេចធិបតីដែលបានលើកឡើងថា “ជាប់ដោយមោទន ធ្លាក់ដោយអស់ចិត្ត”។
បើតាមមន្រ្តីជាន់ខ្ពស់អង្គភាពប្រឆាំងអំពើពុករលួយរូបនេះ ACU នៅតែបន្តពង្រឹងយកគោលការណ៍ច្បាប់ យន្តការដាក់ទណ្ឌកម្មដែលមានបទល្មើសចំនួន១៧ យកមកប្រើដដែល ហើយនៅក្នុងចំណោមបទល្មើសនោះមានបទព្រហ្មទណ្ឌ ហើយក៏មានរឿងរដ្ឋបាលដែរ។ ដូច្នេះ ក្នុងការប្រឡងសញ្ញាបត្រមធ្យមសិក្សានេះ ឯកឧត្តមសង្ឃឹមថា ទាំងបេក្ខជន ទាំងភាគីពាក់ព័ន្ធទាំងអស់នឹងគោរពទៅតាមច្បាប់ ដោយមិនអនុវត្តខុសនូវបទបញ្ញត្តិនោះឡើយ។
សូមបញ្ជាក់ថា ក្រៅពីអ្នកសង្កេតការណ៍ទាំងជាង៣ពាន់នាក់ត្រូវដាក់ពង្រាយនៅតាមមណ្ឌលប្រឡង អង្គភាពប្រឆាំងអំពើពុករលួយ ក៏មានមន្រ្តីចំនួន ៣៤៦នាក់ ចូលរួមពិនិត្យក្នុងការប្រឡងនេះ ទាំងនៅថ្នាក់ប្រទេស ថ្នាក់កណ្តាល និងថ្នាក់ក្រោមជាតិ៕
