នៅសល់ពេលប៉ុន្មានខែទៀតតែប៉ុណ្ណោះ ពោលគឺនៅដើមខែវិច្ឆិកាខាងមុខ ការប្រឡងសញ្ញាបត្រមធ្យសិក្សាទុតិយភូមិ ឬបាក់ឌុប នឹងចូលមកដល់ ដែលតម្រូវឱ្យសិស្សានុសិស្សថ្នាក់ទី១២ ត្រូវត្រៀមខ្លួនសម្រាប់ការប្រឡងនេះ។ យុវតី លុយ សុភី អតីតសិស្សនិទ្ទេស A ឆ្នាំ២០២១ បានចែករំលែក​នូវ​គន្លឹះមួយ​ចំនួនរបស់ខ្លួន ក្នុងការ​ត្រៀម​ប្រឡងបាក់ឌុប។

យុវតី លុយ សុភី លើកឡើងថា ការប្រឡងបាក់ឌុបជារឿងសំខាន់ ដោយសារតែទម្រាំឈានទៅដល់ការប្រឡងបាក់ឌុប សិស្សានុស្សិសត្រូវឆ្លងកាត់ការសិក្សារហូតដល់១២ឆ្នាំ និងបញ្ចប់ត្រឹមតែ២ថ្ងៃប៉ុណ្ណោះ។ ដូច្នេះ តើការខំរៀនអស់១២ឆ្នាំ និងបញ្ចប់ត្រឹមតែ២ថ្ងៃ យើងគួរបញ្ចប់ដោយស្នាមញញឹម ឬបញ្ចប់ដោយមានវិប្បដិសារី?

គ្រួសារខ្ញុំក៏មិនមានលទ្ធភាពបញ្ចូនខ្ញុំឱ្យមករៀននៅសាកលវិទ្យាល័យនោះទេ ប៉ុន្តែខ្ញុំនៅតែអាចដោះស្រាយបញ្ហានេះបានតាមរយៈការប្រឡងបាក់ឌុប ដោយខិតខំយ៉ាងណាដើម្បីយកនិទ្ទេសល្អបាន និងដើម្បីទទួលបានអាហារូបករណ៍នៅថ្នាក់មហាវិទ្យាល័យ

យុវតី លុយ សុភី អតីត​សិស្ស​និទ្ទេស A ឆ្នាំ២០២១

យ៉ាងណាក៏ដោយ អតីត​សិស្ស​និទ្ទេស A ឆ្នាំ២០២១ រូបនេះ បានចែករំលែកគន្លឹះមួយចំនួនដែលខ្លួនបានធ្វើ ក្នុងការត្រៀមខ្លួនបីខែមុនពេលប្រឡងបាក់ឌុប រួមមាន៖

ទី១. ថែរក្សាសុខភាព ៖ កាលណាសុខភាពល្អការសិក្សារបស់យើងក៏ល្អទៅតាមនោះដែរ។ សិស្សានុសិស្សដែលត្រៀមប្រឡងបាក់ឌុបត្រូវធ្វើយ៉ាងណាថែរក្សាសុខភាពជារឿងចម្បងបំផុតតាមអ្វីដេលអាចធ្វើទៅបាន គឺកុំឱ្យមានការឈឺ ឬមានជំងឺផ្សេងៗ។

ទី២. រំលឹកមេរៀនចាស់ៗឡើងវិញ ៖ សិស្សានុសិស្សអាចរំលឹកមេរៀនចាស់ៗឡើងវិញតាំងពីដើមឆ្នាំ ធ្វើលំហាត់ឱ្យបានច្រើន។ បើមិនទាន់បានធ្វើគ្រប់ជ្រុងជ្រោយទេ ក៏ត្រូវបន្តរៀនមេរៀនថ្មីៗដែរ។

៣. ធ្វើវិញ្ញាសាចាស់ៗឡើងវិញ ៖ សិស្សានុសិស្សអាចយកវិញ្ញាសាចាស់ៗចាប់តាំងពីឆ្នាំ២០១៤ រហូតមកដល់ឆ្នាំ២០២២ យកមកធ្វើឡើងវិញដើម្បីវ៉ាស់ស្ទង់សមត្ថភាពខ្លួន​នៅកម្រិតណា។ ការធ្វើវិញ្ញាសា គឺត្រូវកំណត់ពេលវេលាតាមមុខវិជ្ជានីយមួយៗ ដើម្បីងាយស្រួលទៅបំពេញបន្ថែមលើចំណុចខ្វះខាត។

៤. ពង្រឹងចំណុចខ្វះខាតរបស់ខ្លួនក្រោយឆមាស ៖ ការប្រឡងឆមាសលើកទី២ ជាចំណុចពិសេស ដែលអាចឱ្យសិស្សានុសិស្សដឹងពីសមត្ថភាពរបស់ខ្លួននៅកម្រិតណា ។ យើងអាចវាស់ស្ទង់បានថា យើងខ្សោយមេរៀនអ្វី ? ខ្សោយលើមុខវិជ្ជាអ្វី ? ទន្ទឹមគ្នានេះ ក្រោយឆមាសទី២ ជាពេលមួយពិសេសដែលសិស្សានុសិស្សអាចបំពេញសមត្ថភាពខ្លួនឯង ហើយរៀនឱ្យបានគ្រប់ជ្រុងជ្រោយឡើងវិញដើម្បីប្រឡងទទួលបាននិទ្ទេសល្អ។

ទី៥. ស្វ័យសិក្សាឱ្យបានច្រើន ៖ លើកទឹកចិត្តសិស្សានុសិស្សស្វ័យសិក្សាឱ្យបានច្រើនបំផុតតាមដែលអាចធ្វើទៅបាន ពីព្រោះលោកគ្រូ អ្នកគ្រូ គាត់គ្រាន់តែជួយតម្រង់ទិសយើង មិនបាននូវជាមួយយើង២៤ម៉ោង និងមិនបានដាស់តឿនយើងរហូតនោះទេ។ ដូច្នេះ យើងត្រូវមានស្វ័យសិក្សាដោយខ្លួនឯង ដោយកំណត់ពេលវេលាតាមសមត្ថភាពរបស់ខ្លួនម្នាក់ៗ។ ការស្វ័យសិក្សាបន្ថែម គឺជារឿងសំខាន់ដែលយើងអាចដឹងអំពីខ្លួនឯងនៅកម្រិតណា? ខ្សោយអ្វី? ខ្លាំងអ្វី? ទន្ទឹមគ្នានេះ ការស្វ័យសិក្សាអាចធ្វើម្នាក់ឯងក៏បាន ឬស្វ័យសិក្សាជាក្រុម តាមរយៈការបង្កើតក្លិបសិក្សាក៏បាន។

សម្រាប់ខ្ញុំផ្ទាល់កាលទី១២ ខ្ញុំបង្កើតជាក្លិបសិក្សាដែលខ្ញុំជួយបង្រៀនដល់មិត្តភក្ដិរបស់ខ្ញុំដែលមានការសិក្សាខ្សោយ គឺជាយុទ្ធសាស្រ្តអ្នកចេះល្មមបង្រៀនអ្នកមិនចេះ អ្នកចេះខ្លាំងបង្រៀនអ្នកចេះល្មម

យុវតី លុយ សុភី អតីត​សិស្ស​និទ្ទេស A ឆ្នាំ២០២១

ទី៦. ចេះលើកទឹកចិត្តខ្លួន​ឯង ៖ សិស្សានុសិស្សដែលត្រៀមប្រឡងបាក់ឌុបត្រូវចេះលើកទឹកចិត្តខ្លួនឯង ហើយសូមកុំប្រៀបធៀបខ្លួនឯងជាមួយអ្នកដែលខ្លាំងជាងខ្លួន ព្រោះមានសិស្សមួយចំនួនគេខំប្រឹងរៀនយូរឆ្នាំ ហើយយើងទើបតែចាប់ផ្ដើម។ ក្នុងករណីនេះ ប្រសិនបើការប្រៀបធៀបធ្វើឱ្យយើងមានកម្លាំងចិត្តនៅក្នុងការសិក្សាឱ្យពូកែនោះមិនមែនជាបញ្ហា ប៉ុន្តែបើការប្រៀបធៀននោះធ្វើឱ្យយើងបាក់ទឹកចិត្តខ្លួនឯង លែងចង់បន្តការសិក្សា លែងចង់ខិតខំប្រឹងប្រែងគឺសូមកុំប្រៀបធៀប។

យុវតី លុយ សុភី អតីត​សិស្ស​និទ្ទេស A ឆ្នាំ២០២១ ក៏បានលើកទឹកចិត្តដល់សិស្សានុសិស្សទាំងអស់ដែលជាបេក្ខជនប្រឡងបាក់ឌុប ត្រូវប្រើពេលវេលាដែលនៅសេសសល់ឱ្យមានតម្លៃ និងខំឱ្យអស់ពីសមត្ថភាពទៅតាមអ្វីដែលអាចធ្វើបាន។ នៅពេលយើងខំអស់ពីសមត្ថភាពលទ្ធផលចេញមកបែបណាយើងនឹងមិនមានវិប្បដិសារីនៅក្នុងជីវិតនោះទេ។ យើងត្រូវប្រាប់ខ្លួនឯងថា គេអាចធ្វើបាន យើងក៏អាចធ្វើបានដែរ៕