ព្រោះតែឆន្ទៈ ចង់ឃើញប្រជាជននៅទីជនបទដាច់ស្រយាល មានលទ្ធភាពទទួលបានព័ត៌មានគ្រប់គ្រាន់ដូចអ្នកទីក្រុង និងចង់កាត់បន្ថយគម្លាតចំណេះដឹងរវាងអ្នករស់នៅទីក្រុង និងជនបទ បានជំរុញ​ អ្នកគ្រូ ប៉ែន សុគន្ធារី ដឹកនាំបុគ្គលិក និងសិស្សនុសិស្ស ឱ្យទទួល​បាន​ការប្រើប្រាស់បច្ចេកវិទ្យា សម្រាប់ការរៀន និងបង្រៀន រហូតពួកគេ​មានលទ្ធភាពប្រើបច្ចេកវិទ្យាថ្មីៗ និងបច្ចេកវិទ្យាបញ្ញាសិប្បនិម្មិត (AI) បានទៀត។

អនុវិទ្យាល័យ ថ្មតាព្រហ្ម មានទីតាំង​ស្ថិតនៅភូមិត្បូងខ្លា ឃុំអូរម្រេះ ស្រុកសៀមបូក មានចម្ងាយ​៥២គីឡូម៉ែត្រ​ពីទីរួមខេត្តស្ទឹងត្រែង និង​ចម្ងាយ​ប្រមាណ៥០០គីឡូម៉ែត្រ​ពី​រាជធានីភ្នំពេញ។ អនុវិទ្យាល័យនេះ មានសិស្សកំពុងសិក្សាចំនួន ១១៤នាក់ និងមានអាគារសិក្សាត្រឹមតែមួយខ្នងប៉ុណ្ណោះ។ ត្បិតថា ជាសាលារៀនតូច មានសិស្សតិច និងនៅតំបន់ជនបទ ប៉ុន្តែសិស្សានុសិស្សនៅទីនេះ គឺមានឱកាសទទួលបានការសិក្សាបែបទំនើប ដូចសិស្សដែលកំពុងសិស្សនៅប្រជុំជន និងនៅទីក្រុងដែរ។

អ្នកគ្រូ ប៉ែន សុគន្ធារី នាយិកា អនុវិទ្យាល័យ ថ្មតាព្រហ្ម បានរៀបរាប់ថា គិតមកទល់នឹងបច្ចុប្បន្ននេះ អ្នកគ្រូដែលជានាយិកាសាលា បានដឹកនាំលោកគ្រូអ្នកគ្រូ ដែលជាបុគ្គលិក និងសិស្សា​នុសិស្ស​ក្នុងសាលានេះ ឱ្យប្រើប្រាស់បច្ចេកវិទ្យា ដើម្បីសិក្សាអស់រយៈពេល ៤ឆ្នាំមកហើយ។ អ្នកគ្រូថា កាលពីដើមឆ្នាំ២០២០ នៅពេលគម្រោងនេះ បានចាប់ផ្ដើមដំបូង មិនសូវជាមានការគាំទ្រពីសំណាក់អ្នក​អាណាព្យាបាលសិស្ស និងលោកគ្រូអ្នកគ្រូនោះទេ ព្រោះតែពួកគាត់យល់ថា សាលានឹងមិនអាចនាំកូនៗពួកគាត់ទៅដល់គោលដៅ ខណៈ​លោកគ្រូអ្នកគ្រូពិបាក​ក្នុងការ​រត់​តាម​ឱ្យ​ទាន់បច្ចេកវិទ្យា។

នៅពីក្រោយភាពជោគជ័យ ដែលយើងមើលឃើញនេះ មានឧបសគ្គជាច្រើន ជាពិសេសអាណាព្យាបាល មួយចំនួនបានយល់ថា សាលានឹងមិនអាចនាំកូនៗរបស់គាត់ឱ្យដល់គោលដៅ និងនាំឱ្យរៀនបែបស្មុគស្មាញជាដើម។ ចំពោះបុគ្គលិកក៏មានដែរ គាត់មិនសូវជាសប្បាយចិត្តប៉ុន្មាននោះទេ នៅពេលដែលសាលាចាប់ផ្ដើមអនុវត្តបច្ចេកវិទ្យាបែបនេះ, ដោយសារគាត់ត្រូវប្រឹងប្រែងរៀន រត់តាម និងពង្រឹងសមត្ថភាព…

អ្នកគ្រូ សុគន្ធារី បន្ថែមថា ទោះខ្វះការគាំទ្រនៅដំណាក់កាលដំបូង ប៉ុន្តែរយៈពេល ២ឆ្នាំចុងក្រោយនេះ​ ដំណើរការបង្រៀនតាមបែបទំនើប ដែលអ្នកគ្រូផ្ដួចផ្ដើមបានទទួលភាពជោគជ័យ និងផ្លែផ្កាជាបន្តបន្ទាប់។ ជាក់ស្ដែង បច្ចុប្បន្ន គ្រូបង្រៀន ភាគច្រើន សុទ្ធតែអាចប្រើកុំព្យូទ័រ បង្កើតស្លាយ និងបញ្ញាសិប្បនិម្មិត (AI) ដើម្បីរៀន និងបង្រៀន, ខណៈសិស្សដែលប្រឡងសញ្ញាបត្រមធ្យមសិក្សាបឋមភូមិនៅឆ្នាំនេះ គឺជាប់រហូតដល់ ១០០ភាគរយ។ អ្នកគ្រូបញ្ជាក់បន្ថែមទៀតថា រាល់ថ្ងៃនេះ រាល់កិច្ចការរៀនសូត្រ និងប្រឡង ក្នុងសាលាគឺត្រូវប្រើទូរស័ព្ទ និងកុំព្យទ័រ។

បើតាមអ្នកគ្រូ សុគន្ធារី បច្ចុប្បន្ននេះ ឧបសគ្គចម្បង ដែលសាលាអ្នកគ្រូជួបប្រទះគឺ កម្សោយសេវាអ៊ីនធឺណិត, យ៉ាងណាក៏ដោយ ដោយមើលឃើញពីបញ្ហានេះ អាណាព្យាបាលបានបង្កើតជាមូលនិធិគាំទ្រ ការចំណាយលើថ្លៃសេវាអ៊ីនធឺណិត ដែលអាចផ្គត់ផ្គង់លើការប្រាស់ប្រាស់ដុំវាយហ្វាយបាន។

ការសាទរ និងគាំទ្រពីភាគីពាក់ព័ន្ធ ព្រមទាំងផ្លែផ្កាជាបន្តបន្ទាប់នៃការដឹកនាំរបស់អ្នកគ្រូ បានធ្វើឱ្យអនុវិទ្យាល័យថ្មតាព្រហ្ម ទទួលបានជ័យលាភីសាលាស្ដង់ដាគំរូ ពីក្រសួងអប់រំ យុវជន និងកីឡា ហើយក៏​ក្លាយជាសាលារៀនគំរូមួយក្នុងខេត្តស្ទឹងត្រែង។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ មានប្រសាស៍ថា សកម្មភាពនេះជាការចូលរួមមួយសំខាន់ របស់លោកគ្រូ អ្នកគ្រូ ដែលមាននវានុវត្តន៍ទាក់ទងនឹង វិធីសាស្ត្របង្រៀន ជាពិសេស ធ្វើយ៉ាងណានាំឱ្យសិស្សានុសិស្សមានបំណិនសតវត្សរ៍ទី២១ ពាក់ព័ន្ធ នឹង AI និង ឌីជីថល។ ជាមួយគ្នានេះលោកជំទាវ ក៏បានលើកទឹកចិត្តលោកគ្រូ អ្នកគ្រូ ក្នុងការបន្តការធ្វើនវានុវត្តន៍ក្នុងការជំរុញការអប់រំ ដ៏សិស្សានុសិស្សឱ្យកាន់តែប្រសើរឡើង៕