ក្នុងវេទិកាស្ដីពី «ស្ថានភាពសុខាភិបាលកម្ពុជា៖ បញ្ហាប្រឈម និងឱកាស» កាលពីព្រឹកថ្ងៃពុធ (១១ កញ្ញា) ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល មានប្រសាសន៍ថា សារព័ត៌មាន គឺជាឆ្នួននាំឱ្យមានការកែទម្រង់ក្នុងវិស័យសុខាភិបាល និងធ្វើយ៉ាងណាឱ្យវិស័យនេះមានការរីកចម្រើន។

ឯកឧត្តមសាស្រ្តាចារ្យ ឈាង រ៉ា បញ្ជាក់បន្ថែមថា អ្នកសារព័ត៌មាន ជាតួអង្គសំខាន់ក្នុងការចូលរួមជួយក្រសួងសុខាភិបាល ធ្វើយ៉ាងណាក្នុងការទំនាក់ទំនង ការវិភាគឱ្យមានតុល្យភាព និងកុំឱ្យមានការយល់ច្រឡំក្នុងចំណោមសាធារណជន ដើម្បីឱ្យប្រជាពលរដ្ឋទទួលបានព័ត៌មានត្រឹមត្រូវ និងច្បាស់លាស់។

ក្នុង​ឱកាសនោះ រដ្ឋមន្រ្តីក្រសួងសុខាភិបាល ក៏បានថ្លែងអំណរគុណដល់អ្នកសារព័ត៌មាន និងប្រព័ន្ធផ្សព្វផ្សាយ ចំពោះការរាយការណ៍អំពីបទអន្តរាគមន៍របស់ឯកឧត្តម ដែលធ្វើឱ្យប្រជាពលរដ្ឋយល់កាន់តែច្បាស់អំពីភាពស្មុគស្មាញ និងការចូលរួមតាមរយៈការថែទាំ ការពារសុខភាព រួមចំណែកដល់ការផ្សព្វផ្សាយសេចក្ដីណែនាំ និងអនុសាសន៍របស់រាជរដ្ឋាភិបាល ទាក់ទងនឹងឥរិយាបទដែលត្រូវប្រកាន់ភ្ជាប់ក្នុងពេលមានវិបត្តិ ដូចករណីក្នុងអំឡុងវិបត្តិកូវីដ-១៩ ជាដើម។

បើតាមឯកឧត្តមសាស្រ្តាចារ្យ ឈាង រ៉ា យុទ្ធសាស្ត្របញ្ចកោណ-ដំណាក់កាលទី១ បានដាក់បញ្ចូលសុខភាពក្នុងចំណោមអាទិភាព ក្នុងមុំទី៣ ស្ដីពីការអភិវឌ្ឍមូលធនមនុស្ស។ ក្នុងរយៈពេល​១ឆ្នាំ ពោលគឺចាប់ពីខែសីហា ឆ្នាំ២០២៣ ក្រសួងសុខាភិបាល បានសម្រេចលទ្ធផលការងារជាច្រើនតាមរយៈការដាក់ចេញផែនការសកម្មភាព និងវិធានការគន្លឹះ រួមមាន ទី១. ការឆ្លើយតបនឹងតម្រូវការចំពោះមុខរបស់ប្រជាជន តាមរយៈការពង្រីកសេវាសុខភាពទៅដល់ប្រជាពលរដ្ឋដោយផ្ទាល់ ធ្វើឱ្យប្រជាពលរដ្ឋ ៧,៥ លាននាក់ នាពេលបច្ចុប្បន្ននេះ ស្មើនឹង ៤៣% ទទួលបានប័ណ្ណក្រីក្រ និង ប.ស.ស ដែលមានសមាជិក ២ ៤៥៣ ០០០នាក់ នៅចុងខែកក្កដា។ ថ្មីៗនេះ មានមូលដ្ឋានសុខាភិបាលបន្ថែមចំនួន ១ ៥៧៣ បានចូលរួម។

ទី២. ការកសាងយុទ្ធសាស្ត្រសុខាភិបាលតាមវិស័យ និងការចូលរួមក្នុងការរៀបចំយុទ្ធសាស្ត្រអន្តរក្រសួង។ ឧទាហរណ៍ ផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសាកលនៅកម្ពុជា ឆ្នាំ២០៣៥, យុទ្ធសាស្ត្រជាតិសម្រាប់កម្មករក្រៅប្រព័ន្ធ, ការវិភាគរួមគ្នាជាមួយក្រសួងមុខងារសាធារណៈលើតម្រូវការបុគ្គលិកក្នុងរចនាសម្ព័ន្ធសុខាភិបាល ដើម្បីចាត់តាំងអ្នកវិជ្ជាជីវៈចាំបាច់។ និងទី៣. ការពង្រឹងមធ្យោបាយឆ្លើយតបទៅនឹងរាល់បញ្ហាប្រឈមដំណាលគ្នា ពោលគឺការកើតមានទន្ទឹមគ្នារវាងជំងឺឆ្លង ជំងឺមិនឆ្លង និងជំងឺរ៉ាំរ៉ៃ ដែលកំពុងតែកើនឡើងយ៉ាងខ្លាំង។ ក្នុងនោះ ការពង្រឹងមធ្យោបាយដំណើរការទៅបាន តាមរយៈបែបបទអន្តរាគមន៍ចំនួ៥ រួមមាន ការបណ្តុះបណ្តាលធនធានមនុស្ស បរិក្ខារ សំណង់ និងការពង្រឹងភាពជាដៃគូអន្តរជាតិ។

ឯកឧត្តមរដ្ឋមន្ត្រី បន្ថែមថា នៅមានវឌ្ឍនភាពដែលត្រូវសម្រេចឱ្យបានលើប្រធានបទផ្សេងទៀត ដូចជាការឈានឆ្ពោះទៅរកការគ្របដណ្តប់សុខភាពជាសាកល ដែលត្រូវតែកើនឡើងពី ៥១% ទៅ ៨០% ក្នុងឆ្នាំ២០៣៥ ការចាត់តាំងបុគ្គលិកសុខាភិបាលនៅតំបន់ជនបទដាច់ស្រយាល ការពង្រឹងគោលនយោបាយបង្ការ ការពង្រឹងការប្រយុទ្ធប្រឆាំងនឹងជំងឺមហារីក។ល។

បើតាម ឯកឧត្តមសាស្រ្តាចារ្យ ឈាង រ៉ា ក្រសួងសុខាភិបាល រួមជាមួយនឹងអ្នកវិជ្ជាជីវៈសុខាភិបាលទាំងអស់ សហការជាមួយស្ថាប័នពាក់ព័ន្ធ និងគាំទ្រដោយរាជរដ្ឋាភិបាល បានព្យាយាមវិនិយោគបន្ថែម ដើម្បីផ្ដល់ការឆ្លើយតបសមស្របបំផុតចំពោះតម្រូវការសុខភាពរបស់ប្រជាជន និងដើម្បីផ្សព្វផ្សាយឱ្យយល់ដឹងកាន់តែប្រសើរឡើងអំពីសកម្មភាពរបស់ក្រសួងសុខាភិបាល តាមរយៈការផ្លាស់ប្តូរយោបល់ជាប្រចាំជាមួយប្រជាជននៅតាមមូលដ្ឋាន ឈានទៅការបម្រើសេវាថែទាំសុខភាពកាន់តែប្រសើរឡើង៕