ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលាអនុវិទ្យាល័យ និងវិទ្យាល័យចំនួន៦៨ មានទីតាំងស្ថិតនៅក្នុងរាជធានីភ្នំពេញ ត្រូវបានជ្រើសរើសឱ្យចូលរួមប្រកួតប្រជែង ក្នុងការអនុវត្តសាលារៀនស្អាត និងបរិស្ថានបៃតង។ នេះបើតាមប្រសាសន៍លើកឡើងរបស់លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា ក្នុងសិក្ខាសាលា “កម្មវិធីសាលារៀនស្អាត និងបរិស្ថានបៃតង” កាលពីពេលថ្មីៗនេះ។
លោកជំទាវ គឹម សេដ្ឋានី មានប្រសាសន៍ថា ពិភពលោក ក៏ដូចជាប្រទេសកម្ពុជាផ្ទាល់ បាននិងកំពុងតែប្រឈមមុខជាមួយនឹងបញ្ហាមួយចំនួនដូចជា៖ (១). ការប្រែប្រួលអាកាសធាតុ (២). ការបំពុល និង(៣). ការថយចុះនៃធនធានធម្មជាតិ។ បញ្ហាទាំងនេះមិនត្រឹមតែគំរាមកំហែងដល់បរិស្ថានប៉ុណ្ណោះទេ ប៉ុន្តែថែមទាំងប៉ះពាល់ដល់សុខភាព និងសុខុមាលភាពរបស់មនុស្សជំនាន់ក្រោយទៀតផង ដែលយើងទាំងអស់គ្នាត្រូវសហការជាមួយគ្នា ដើម្បីស្វែងរក និងចាត់វិធានការនានា ក្នុងការចាត់វិធានការទប់ស្កាត់ និងដោះស្រាយបញ្ហាទាំងនេះ ហើយនោះជាអ្វីដែលក្រសួងអប់រំ និងដៃគូសហការកំពុងចូលរួមចំណែកធ្វើ ដោយចាប់ផ្តើមពីសិស្សរបស់យើង តាមរយះ “កម្មវិធីសាលារៀនស្អាត និងបរិស្ថានបៃតង”។
បើតាមប្រសាសន៍លោកជំទាវរដ្ឋលេខាធិការ ចាប់តាំងពីឆ្នាំ២០២៣មក ក្រសួងអប់រំ យុវជន និងកីឡា បានដាក់ចេញនូវគំនិតផ្តួចផ្តើមជាច្រើនដើម្បីធ្វើឱ្យសាលារៀនកាន់តែស្អាត និងកាន់តែប្រសើរឡើងរួមមាន ស្តង់ដាសាលាគំរូ យុទ្ធនាការគ្មានកាកសំណល់ និងកម្មវិធីប្រមូលទឹកភ្លៀង។ ដើម្បីឆ្លើយតប និងសម្រេចបាននូវសូចនាករសំខាន់ៗ ដែលមាននៅក្នុងស្តង់ដាទាំង៥ នៃសាលារៀនគំរូ ក្រសួងអប់រំ រួមជាមួយក្រុមហ៊ុនឯកជនក្នុងស្រុក នឹងរៀបចំឱ្យមានការប្រឡងប្រណាំងគ្នា រយៈពេល ៧ខែ ដោយផ្តោតលើការគ្រប់គ្រងកាកសំណល់ និងការកែច្នៃឡើងវិញឱ្យទទួលបានជាសាលារៀនស្អាតនិងមានបរិស្ថានបៃតង ក៏ដូចជាលើកទឹកចិត្ត ឱ្យមានការគ្រប់គ្រងនិងការកែច្នៃ កាកសំណល់ផ្លាស់ស្ទិកផងដែរ។
ជាមួយគ្នានេះ លោកជំទាវរដ្ឋលេខាធិការក៏ជឿជាក់ថា “កម្មវិធីសាលារៀនស្អាត និងបរិស្ថានបៃតង” នឹងអាចបង្កើតឥទ្ធិពលរលកដែលលាតសន្ធឹងហួសពីសាលារៀន និងអាចទៅដល់ក្នុងសហគមន៍ និងប្រទេស ដោយជំរុញឱ្យមានវប្បធម៌ នៃភាពស្អាត (ចិត្តស្អាត បេះដូងស្អាត ឥរិយាបទស្អាត) ដែលដក់ជាប់ពេញក្នុងសង្គមខ្មែរ៕
