សិស្សចំនួន២១៦នាក់ ក្នុងចំណោមបេក្ខជនជ័យលាភីចំនួន៧០៤នាក់របស់ប្រទេស​កម្ពុជា ទទួលបានជ័យលាភីមេដាយមាស ក្នុងការប្រកួតគណិតវិទ្យា វិទ្យាសាស្ត្រ និងព័ត៌មានវិទ្យា អូឡាំព្យាដអន្តរជាតិ ឆ្នាំ២០២៤ កាលពីពេលកន្លងទៅថ្មីៗនេះ។ មេដាយដែលបេក្ខជនជ័យលាភីទទួលបាន គឺពីកម្មវិធីប្រឡងចំនួន៦ រួមមាន ការប្រឡង SMC 2024, AMO 2024, MMT 2024, VNJSO 2024, NJCO 2024 និង DrCT 2024។

លោក យ៉ែម សុភ័ណ្ឌ ប្រធានមជ្ឈមណ្ឌល ដឺ ប្រ៊េននីអេក ហ្វេកធើរី (The Brainiac Factory) មានប្រសាសន៍ថា នៅក្នុងរយៈពេលបួនខែចុងក្រោយក្នុងឆ្នាំ២០២៤ សិស្សកម្ពុជាមានចំនួនច្រើនគួរឱ្យកត់សម្គាល់ ដែលបានចូលរួមក្នុងការប្រឡងការប្រកួត គណិតវិទ្យា វិទ្យាសាស្ត្រ និងព័ត៌មានវិទ្យា អូឡាំព្យាដ អន្តរជាតិ។

ប្រធានមជ្ឈមណ្ឌល ដឺ ប្រ៊េននីអេក ហ្វេកធើរី បញ្ជាក់ថា សិស្សឆ្នើមកម្ពុជាសរុបចំនួន៧០៤នាក់ ទទួលបានជ័យលាភីក្នុងការប្រកួតគណិតវិទ្យា វិទ្យាសាស្ត្រ និងព័ត៌មានវិទ្យា អូឡាំព្យាដអន្តរជាតិ ក្នុងរយៈពេលបួនខែចុងក្រោយក្នុងឆ្នាំ២០២៤។

បើតាមរបាយការណ៍របស់ លោក យ៉ែម សុភ័ណ្ឌ មានបេក្ខជនសរុបចំនួន ២៩៦៦នាក់ (ប្រុស១៦៩២នាក់ និងស្រី១២៧៤នាក់) ដែលជាសិស្សានុសិស្សកម្ពុជាមកពីបណ្តាគ្រឹះស្ថានអប់រំសាធារណៈ និងឯកជននានានៅទូទាំងប្រទេសកម្ពុជា ចូលរួមប្រឡងប្រកួតប្រជែងជាមួយសិស្សមកពីប្រទេសដទៃទៀតចំនួន៣៨ប្រទេស។ ក្នុងនោះ បេក្ខជនកម្ពុជាដែលទទួលបានជ័យលាភី មេដាយមាស ចំនួន២១៦នាក់ មេដាយប្រាក់ ចំនួន២៣២នាក់ និងមេដាយសំរិទ្ធ ចំនួន២១៦នាក់ សរុបចំនួន ៩៥៩មេដាយ ដែលសិស្សជ័យលាភីមានចំនួន ៧០៤នាក់។

ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា ឯកឧត្តមពិតជាមានមោទនភាពបំផុតចំពោះក្មួយៗសិស្សានុសិស្សកម្ពុជា ដែលមានសមត្ថភាពចូលរួមការប្រឡងគណិតវិទ្យា វិទ្យាសាស្រ្ត និងព័ត៌មានវិទ្យា កម្រិតអន្តរជាតិ ដោយមានបេក្ខជនចូលរួមប្រឡងនៅជុំវិញពិភពលោក ជាពិសេស ក្មួយៗបានដណ្តើមយកមេដាយជាច្រើនសម្រាប់ប្រទេសកម្ពុជា។ នេះសបញ្ជាក់ឱ្យឃើញពីសមត្ថភាពរបស់ក្មួយៗ ពិតជាពូកែ មិនចាញ់សិស្សានុសិស្សនៅក្នុងបណ្តាប្រទេសជឿនលឿន នៅក្នុងតំបន់ និងនៅក្នុងពិភពលោកឡើយ។

ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏បានលើកទឹកចិត្តដល់ក្មួយៗសិស្សានុសិស្ស ឱ្យបន្តការខិតខំប្រឹងប្រែងរៀនសូត្របន្ថែមទៀត ដើម្បីក្លាយជាអ្នកបន្តវេនពោរពេញដោយសមត្ថភាពនាពេលអនាគតខាងមុខ និងសូមលើកទឹកចិត្តដល់លោកគ្រូ អ្នកគ្រូ សូមបន្តការអប់រំបណ្តុះបណ្តាលដល់សិស្សានុសិស្សឱ្យរឹតតែពូកែថែមទៀត ជាពិសេស សូមលើកទឹកចិត្តដល់មាតាបិតា អាណាព្យាបាល បន្តណែនាំទូន្មាន តម្រង់ទិស និងលើកទឹកចិត្ត ដល់បុត្រធីតារបស់ខ្លួន ឱ្យមានភាពក្លាហាន ចូលរួមប្រកួតប្រជែងក្នុងកម្មវិធីលក្ខណៈអន្តរជាតិធំៗ ដើម្បីវាស់ស្ទង់សមត្ថភាព ដោយការប្រៀបធៀបខ្លួនឯង ជាមួយខ្លួនឯង និងការប្រៀបធៀបខ្លួនឯង ជាមួយពិភពលោក។

គួរជម្រាបជូនថា នៅក្នុងឆ្នាំ២០២៤​កន្លងទៅ ពោលគឺចាប់ពីខែមីនា ដល់ខែវិច្ឆិកា បេក្ខជនជាយុវជន​កម្ពុជា​សរុបចំនួន ៤,៧០៥នាក់ (ស្រី ១,៩៣៧នាក់) បានចូលរួម​ប្រកួតប្រជែងជាអន្តរជាតិ ដោយទទួលបានមេដាយសរុបចំនួន ១,៦០៥ ក្នុងនោះ មេដាយមាសសរុប ៣៦៩ មេដាយប្រាក់សរុប ៤៥៤ និងមេដាយសំរឹទ្ធចំនួន ៧៨២មេដាយ៕