អង្គការសុខភាពពិភពលោក (WHO) បានចេញផ្សាយគោលការណ៍ណែនាំថ្មីមួយនៅរវាងពាក់កណ្តាលឆ្នាំ២០២៣នេះ ស្តីពីជាតិផ្អែមមិនមានជាតិស្ករ ឬភាសាអង្គគ្លេសថា Non-Sugar Sweeteners (NSS) ។ គោលការណ៍ណែនាំប្រឆាំងនឹងការប្រើប្រាស់ជាតិផ្អែមដែលមិនមានជាតិស្ករ មានគោលបំណងបង្ហាញទៅកាន់មនុស្សគ្រប់រូបឱ្យយល់ដឹងបន្ថែមពីអាហារសុខភាព ការជ្រើសរើសអាហារ ការគ្រប់គ្រងទម្ងន់ខ្លួន ឬកាត់បន្ថយហានិភ័យនៃជំងឺមិនឆ្លង (NCDs) ។

អង្គការសុខភាពពិភពលោក (WHO) បានបង្ហាញថា អនុសាសន៍នៅក្នុងគោលការណ៍ណែនាំប្រឆាំងនឹងការប្រើប្រាស់ជាតិផ្អែមដែលមិនមានជាតិស្ករ បានមកពីការរកឃើញប្រព័ន្ធភស្តុតាងជាច្រើនដែលអាចបញ្ជាក់ថា ជាតិផ្អែមមិនមានជាតិស្ករ (NSS) មិនផ្តល់អត្ថប្រយោជន៍ដល់សុខភាពរាងកាយរបស់មនុស្សឡើយ ពិសេសសម្រាប់ក្មេងជំទន់ និងកុមារគួរចៀសវាងទើបជាការប្រសើរ ។

លទ្ធផលត្រួតពិនិត្យបានបង្ហាញថា ការប្រើប្រាស់ជាតិផ្អែមដែលមិនមានជាតិស្ករ អាចបង្ករហានិភ័យដល់សុខភាព ដូចជា បណ្តាលឱ្យមនុស្សងាយប្រឈមនឹងហានិភ័យកើតជំងឺទឹកនោមផ្អែមប្រភេទទី២ (ជំងឺទឹកនោមផ្អែមមិនពឹងអាស្រ័យអាំងស៊ុយលីន (NDDM) ឬជំងឺទឹកនោមផ្អែមកើតមនុស្សពេញវ័យ) រួមមាន បង្ករជាជំងឺសរសៃឈាមបេះដូង ព្រមទាំងងាយបង្កើតឱ្យមានអត្រាមរណភាពចំពោះមនុស្សពេញវ័យ ។

ជាតិផ្អែមដែលមិនមានជាតិស្ករ (NSS) ជាសារធាតុដែលបានសំយោគចេញពីធម្មជាតិ ឬបានកែច្នៃផ្សំឡើងឱ្យមានជាតិផ្អែមដែលគ្មានសារធាតុចិញ្ចឹមទាល់តែសោះ ដែលគេចាត់ទុកថា “មិនមែនជាស្ករ” ។ ជាតិផ្អែមមិនមានជាតិស្ករនេះ គេប្រើប្រាស់វាដើម្បីដាក់នៅក្នុងអាហារ និងភេសជ្ជៈ ។ និយាយឱ្យសាមញ្ញ ជាតិផ្អែមមិនមានជាតិស្ករ គឺជាសារធាតុជំនួសស្ករប្រើដើម្បីអាហារ ឬភេសជ្ជៈមានជម្រើសកាឡូរីទាប ឬសូន្យកាឡូរី ។ ទូទៅជាតិផ្អែមមិនមានជាតិស្ករ មានដូចជា Acesulfame K, Aspartame, Advantame, Cyclamates, Neotame, Saccharin, Sucralose, Stevia និង Stevia Derivatives ជាដើម ។

លោកវេជ្ជបណ្ឌិត Francesco Branca នាយកគ្រប់គ្រងផ្នែកអាហារូបត្ថម្ភ និងសុវត្ថិភាពចំណីអាហារនៃអង្គការសុខភាពពិភពលោក (WHO) មានប្រសាសន៍ថា ការជំនួសជាតិស្ករដោយប្រើជាតិផ្អែមមិនមានជាតិស្ករ មិនអាចជួយគ្រប់គ្រងការឡើងទម្ងន់របស់មនុស្សក្នុងរយៈពេលវែងនោះទេ ។ ផ្ទុយទៅវិញ ប្រជាជនត្រូវគិតគូរពីវិធីផ្សេងទៀត ដើម្បីកាត់បន្ថយការទទួលទានជាតិស្ករបែបនេះ ដូចជា ការទទួលទានអាហារដែលមានជាតិស្ករធម្មជាតិ រួមមានផ្លែឈើ ឬអាហារ និងភេសជ្ជៈមិនមានជាតិផ្អែមជាដើម ។

នាយកគ្រប់គ្រងផ្នែកអាហារូបត្ថម្ភ និងសុវត្ថិភាពចំណីអាហារ នៃអង្គការសុខភាពពិភពលោក លោកវេជ្ជបណ្ឌិត Francesco Branca បានបញ្ជាក់ថា “ជាតិផ្អែមមិនមានជាតិស្ករ (NSS) មិនមែនជាកត្តាសំខាន់សម្រាប់របបអាហារនោះទេ ហើយក៏គ្មានគុណតម្លៃអាហារូបត្ថម្ភដែរ ។ មនុស្សគួរកាត់បន្ថយការញ៉ាំអាហារផ្អែមទាំងស្រុង ដោយចាប់ផ្តើមពីអាយុដំបូង ដើម្បីពង្រឹងសុខភាពផ្ទាល់ខ្លួន” ។

សូមជម្រាបថា វិធីងាយចំណាប់បំផុតចំពោះជាតិផ្អែមដែលមិនមានជាតិស្ករ គឺជាអាហារ ឬភេសជ្ជៈវេចខ្ចប់ទាំងឡាយណាដែលមានជាតិផ្អែម ប៉ុន្តែបានបញ្ជាក់ថា មិនមានជាតិស្ករខ្ពស់ (ផ្អែមតែបង្ហាញថាគ្មានជាតិស្ករ) ។ ម្យ៉ាងទៀត គេអាចហៅជាតិផ្អែមដែលមិនមានជាតិស្ករថា ជាតិផ្អែមទាប ឬគ្មានកាឡូរី, ជាតិផ្អែមជំនួសស្ករ, ជាតិផ្អែមគ្មានសារធាតុចិញ្ចឹម, ឬអាចហៅថា ជាតិផ្អែមសិប្បនិម្មិត ។

យោងតាមក្រុមប្រឹក្សាព័ត៌មានអាហារអន្តរជាតិ (International Food Information Council) បានបង្ហាញថា អាហារ និងភេសជ្ជៈជាង ៤,០០០មុខដែលបានដាក់លក់នៅក្នុងប្រទេសប្រហែល ៩០ ជុំវិញពិភពលោក មានផ្ទុកសារធាតុ Acesulfame K ។ ជាតិផ្អែម Acesulfame K មានជាតិផ្អែមជាងស្ករធម្មតាប្រហែល ២០០ដង ដោយផ្អែកលើបរិមាណដូចគ្នា ប៉ុន្តែមិនមានកាឡូរីក្នុងរបបអាហារនោះទេ ។

គួររំលឹកដែរថា គោលការណ៍ណែនាំរបស់អង្គការសុខភាពពិភពលោកខាងលើ (WHO) បានបញ្ជាក់យ៉ាងខ្លីថា ជាតិផ្អែមមិនមានជាតិស្ករ មិនល្អសម្រាប់សុខភាពឡើយ ហើយមានតែការបង្កើតទម្លាប់ទទួលទានអាហារ និងជ្រើសរើសរបបសុខភាពតែប៉ុណ្ណោះ ទើបធ្វើឱ្យមនុស្សចៀសផុតពីហានិភ័យសុខភាពនានា ។ ពោលកែលម្អគុណភាពរបបអាហាររបស់ខ្លួន និងរក្សាលំហាត់ប្រាណជាប្រចាំ ទើបជាជម្រើសកាត់បន្ថយហានិភ័យជំងឺមិនឆ្លងនានានៅទូទាំងពិភពលោក ៕