ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិស្សបឋមសិក្សាវៀតណាម បានជាប់ចំណាត់ថ្នាក់លេខ១ ទាំងមុខវិជ្ជា គណិតវិទ្យា និងអំណាន ក្នុងចំណោម ប្រទេសនៅអាស៊ីអាគ្នេយ៍ចំនួន ៧ នៅក្នុងការស្ទង់មតិឆ្នាំ ២០២៤, នេះបើយោងតាម កាសែត VN Express ។
លទ្ធផលនេះ បានបង្ហាញនៅក្នុងរបាយការណ៍រង្វាស់សិក្សាបឋមសិក្សាអាស៊ីអាគ្នេយ៍ (SEA-PLM) ឆ្នាំ២០២៤ ដែលចេញផ្សាយកាលពីពេលថ្មីៗនេះ ដោយសិក្សាលើប្រទេសប្រាំពីរ នៅអាស៊ីអាគ្នេយ៍ចូលរួមមាន ទីម័រខាងកើត ឡាវ មីយ៉ាន់ម៉ា ម៉ាឡេស៊ី កម្ពុជា ហ្វីលីពីន និងវៀតណាម។ ខណៈលទ្ធផល សម្រាប់ប្រទេសទីម័រខាងកើត មិនត្រូវបានចេញផ្សាយនោះទេ។
សម្រាប់ការវាយតម្លៃ គឺត្រូវបានធ្វើទៅលើសិស្សថ្នាក់ទី៥ ដែលតម្រូវឱ្យចូលរួមបំពេញការធ្វើតេស្តលើមុខវិជ្ជា គណិតវិទ្យា និងអំណាន ដោយក្នុងនោះ មានសិស្សវៀតណាម ចំនួន ៥,៩៨០នាក់ បានចូលរួមធ្វើតេស្ត។
សិស្សត្រូវបានចាត់ថ្នាក់តាមកម្រិតជំនាញ ដោយមានប្រាំបួនកម្រិត សម្រាប់មុខវិជ្ជាគណិតវិទ្យា និងប្រាំមួយកម្រិតសម្រាប់អំណាន។ អ្នកដែលទទួលបានកម្រិតខ្ពស់បំផុត យ៉ាងហោចណាស់ត្រូវទទួលបានពិន្ទុ ៣៤៧ ពិន្ទុក្នុងមុខវិជ្ជាគណិតវិទ្យា និង ៣១៧ ពិន្ទុក្នុងការអាន។
សម្រាប់មុខវិជ្ជាគណិតវិទ្យា សិស្សវៀតណាម ៨៨ភាគរយ ទទួលបានពិន្ទុក្នុងកម្រិតជំនាញខ្ពស់ ដែលនេះ ជាតួលេខខ្ពស់បំផុត ក្នុងចំណោមប្រទេសទាំង ៧ ដែលចូលរួម ទោះបីចំនួននេះ ធ្លាក់ពី ៩២ភាគរយ ក្នុងឆ្នាំ ២០១៩ ក៏ដោយ។
វៀតណាមក៏បាននាំមុខគេ លើពិន្ទុគណិតវិទ្យាជាមធ្យមជាមួយនឹងពិន្ទុ ៣៣៤,៦ ដែលចំនួននេះ ថយចុះ ៦,៨ បើធៀបទៅនឹង ៥ឆ្នាំមុន។ ដោយឡែក មធ្យមភាគរបស់ម៉ាឡេស៊ីបានធ្លាក់ចុះ ៤,៨ពិន្ទុ មកត្រឹម ៣០៩,៩ ខណៈដែលប្រទេសដទៃទៀត កំពុងមានកំណើន ជាពិសេសម៉ាយ៉ាន់ម៉ា បានកើនឡើង ១៩,២ពិន្ទុ និងកម្ពុជា កើនឡើង ១២ ពិន្ទុ។
និន្នាការស្រដៀងគ្នានេះ បានលេចឡើង នៅក្នុងវិស័យអំណានដែរ។ សមាមាត្រសិស្សវៀតណាម ដែលសម្រេចបានកម្រិតជំនាញខ្ពស់បំផុត បានធា្លក់ចុះពី ៨២ភាគរយ ក្នុងឆ្នាំ២០១៩ មកត្រឹម ៦៦ភាគរយ ក្នុងឆ្នាំ២០២៤។ អត្រារបស់ប្រទេសម៉ាឡេស៊ី ក៏បានធ្លាក់ចុះ ៩ភាគរយផងដែរ ខណៈដែលប្រទេសដទៃទៀត ក៏ប្រសើរឡើង។
សម្រាប់ការអានប្រទេសវៀតណាម នៅតែបន្តជាប់ចំណាត់ថ្នាក់លេខ១ សម្រាប់ពិន្ទុ ការអាន ទោះបីជាពិន្ទុបានធ្លាក់ចុះ ១៣ពិន្ទុ បើធៀបទៅនឹងឆ្នាំ២០១៩ ក៏ដោយ។ ប្រទេសម៉ាឡេស៊ីក៏បានថយចុះ ៥,៣ពិន្ទុផងដែរ ខណៈដែលប្រទេសដទៃទៀត មានភាពប្រសើរឡើងចន្លោះពី ១,១ ទៅ ១៣,៦ពិន្ទុ ដោយប្រទេសមីយ៉ាន់ម៉ា មានការរីកចម្រើនខ្លាំង។
របាយការណ៍នេះ ក៏បានព្រមានផងដែរ អំពីការធ្លាក់ចុះនៃការវិនិយោគលើការអប់រំ និងការរួមតូចនៃប្រជាសាស្ត្រ។ របាយការណ៍បន្ថែមថា ការប្រើប្រាស់ការសម្រេចចិត្ត ដែលជំរុញដោយទិន្នន័យនៅតែស្ថិតក្នុងដំណាក់កាលដំបូង ដោយអំពាវនាវឱ្យពង្រីកការត្រួតពិនិត្យ ការវាយតម្លៃអន្តរាគមន៍ និងការធ្វើមាត្រដ្ឋាន ដែលដំណើរការ ដើម្បីបង្កើនប្រសិទ្ធភាពគោលនយោបាយ និងធានាបាននូវផលប៉ះពាល់នៃការវិនិយោគលើការអប់រំ៕
