ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បញ្ញាសិប្បនិម្មិត (AI) នឹងក្លាយជាបច្ចេកវិទ្យា ដែលមនុស្សចាំបាច់ត្រូវតែប្រើ និងមិនអាចបដិសេធនោះទេ ហើយអ្នកប្រើប្រាស់ត្រូវសហការជាមួយនឹងបច្ចេកវិទ្យានេះ ដើម្បីជាប្រយោជន៍ ជាជាងប្រកួតប្រជែងជាមួយវា, នេះជាការលើកឡើងរបស់លោកបណ្ឌិត កាក់ សុខគី សាស្ត្រាចារ្យផ្នែកព័ត៌មានវិទ្យា នៃបណ្ឌិតសភាបច្ចេកវិទ្យាឌីជីថលកម្ពុជា ក្នុងមហោស្រពបច្ចេកវិទ្យាមេគង្គ កាលពីចុងសប្ដាហ៍កន្លងទៅ។
លោកបណ្ឌិត កាក់ សុខគី មានប្រសាសន៍ថា ចាប់ពីពេលនេះទៅ AI មិនមែនជាបច្ចេកវិទ្យា ដែលយើងចង់ប្រើក៏បាន មិនចង់ក៏បាននោះទេ ប៉ុន្តែវានឹងក្លាយជាផ្នែកមួយ នៃការរស់នៅក្នុងជីវិតប្រចាំថ្ងៃរបស់យើង។ យ៉ាងណាក៏ដោយ គោលគំនិតចម្បងនៃការបង្កើត AI គឺមិនមែន ដើម្បីវាយប្រហារ ឬបំផ្លាញមនុស្សនោះទេ ប៉ុន្តែគោលដៅសំខាន់ ដើម្បីដោះស្រាយបញ្ហា និងធ្វើឱ្យជីវិតមនុស្សប្រសើរជាងមុន។
បើតាមលោកបណ្ឌិត បច្ចេកវិទ្យានេះ អាចជះឥទ្ធិពលវិជ្ជមាន ឬអវិជ្ជមាន អាស្រ័យលើអ្នកបង្កើត និងអ្នកប្រើប្រាស់។ ប្រសិនបើពួកគេយក AI ប្រើក្នុងផ្លូវល្អ នោះពួកគេ នឹងទទួលបានផលល្អ ប៉ុន្តែបើពួកគេយកបច្ចេកវិទ្យានេះ ទៅប្រើក្នុងទម្រង់បោកបញ្ឆោត ឬក៏បន្លំ នោះវានឹងក្លាយទៅជា AI បែបអាក្រក់មួយ។
ស្របនឹងការលើកឡើងនេះ លោកបណ្ឌិត ឃៀង សុធី សាកលវិទ្យាធិការ នៃសាកលវិទ្យាល័យខេមតិច មានប្រសាសន៍ថា ការរីកចម្រើន នៃបញ្ញាសិប្បនិម្មិត (AI) បានបម្រើផលប្រយោជន៍ច្រើនដល់ការសិក្សា និងការស្រាវជ្រាវ របស់អ្នកស្រាវជ្រាវ និស្សិត និងអ្នកប្រើប្រាស់ទូទៅ ប៉ុន្តែទន្ទឹមនឹងនេះ វាតម្រូវឱ្យអ្នកប្រើប្រាស់បញ្ញាសិប្បនិម្មិត (AI) ប្រកបដោយសុចរិតភាព និងក្រមសីលធម៌។
លោកស្រីបណ្ឌិត ព្រហ្ម សុភា ព្រឹទ្ធបុរសរងមហាវិទ្យាល័យវិស្វកម្ម និងជាសាស្ត្រាចារ្យជាន់ខ្ពស់នៃសាកលវិទ្យាល័យខេមតិច បានលើកឡើងថា បញ្ញាសិប្បនិម្មិត (AI) គឺជាកាំបិតមុខពីរ ព្រោះបច្ចេកវិទ្យានេះអាចផ្ដល់ទាំងអត្ថប្រយោជន៍ និងគុណវិបត្តិសម្រាប់សង្គម អាស្រ័យលើការបង្កើត ការប្រើប្រាស់ និងរបៀបនៃការគ្រប់គ្រង ដែលមានតម្លាភាព និងទំនួលខុសត្រូវខ្ពស់។
អ្នកជំនាញវិស្វកម្មរូបនេះបញ្ជាក់ថា រាល់ការអភិវឌ្ឍនៃបច្ចេកវិទ្យា គឺតែងតែមានភាពផ្ទុយគ្នា ជាមួយនឹងការអភិរក្ស ប៉ុន្តែ មនុស្សមិនអាចព្យាយាមគ្រប់គ្រងទាំងស្រុងលើការវិត្តន៍នៃបញ្ញាសិប្បនិម្មិត (AI) នោះទេ។ មិនអាចគ្រប់គ្រងបានទាំងស្រុង ព្រោះការបដិសេធ មិនទទួលយក ឬហាមឃាត់មិនឱ្យមានការប្រើប្រាស់ នឹងបង្កផលអវិជ្ជមានសម្រាប់សង្គមផងដែរ។ ដូច្នេះ អ្វីដែលមនុស្សអាចធ្វើបានគឺត្រូវរក្សាតុល្យភាពរវាងការអភិវឌ្ឍ និងការអភិរក្សបច្ចេកវិទ្យានេះ ក្នុងរូបភាពដ៏ត្រឹមត្រូវមួយ៕
