ទីក្រុងឡុងដ៍ ប៉ារីស ញូវយ៉ក ជាញឹកញាប់ត្រូវបានជាប់ក្នុងបញ្ជីទីក្រុងល្បីល្បាញបំផុតរបស់ពិភពលោក ។ ទន្ទឹមនឹងនេះ សាលាធុរកិច្ច IESE ដែលបានបង្កើតចំណាត់ថ្នាក់ទីក្រុងឆ្លាតវៃ និងនិរន្តរភាពក្នុងរយៈពេលប្រាំបួនឆ្នាំកន្លងមកនេះ បានបង្ហាញថា មានធាតុជាច្រើន ដើម្បីបង្កើតទីក្រុងលំដាប់ពិភពលោក ហើយកត្តាទាំងនោះ រួមបញ្ចូលនូវវិធានការជារចនាសម្ព័ន្ធ ដូចជា ការធ្វើផែនការទីក្រុង ចល័តភាព និងកត្តាសេដ្ឋកិច្ច ដូចជាការទាក់ទាញ និងរក្សាបាននូវទេពកោសល្យពូកែៗ និងលើកកម្ពស់ការអភិវឌ្ឍសេដ្ឋកិច្ច។

ការការពារបរិស្ថាន និងបច្ចេកវិទ្យា ជាចំណុចសំខាន់មួយទៀត ដើម្បីពិចារណាក្នុងការដាក់ចំណាត់ថ្នាក់ទីក្រុងឆ្លាតវៃ ។ បន្ថែមពីនេះ ផ្នែកដែលទាក់ទងនឹង វប្បធម៌ និងសង្គម ត្រូវបានគេកំណត់លើការរៀបចំរចនាសម្ព័ន្ធសង្គមបានល្អ និងធនធានមនុស្សក្នុងទីក្រុងនោះ។ IESE បានលើកឡើងថា ទីក្រុងឆ្លាតវៃ ដែលល្អបំផុតសម្រាប់ពិភពលោក មិនគ្រាន់តែជាកន្លែងដែលផ្ដល់នូវសុភមង្គលសម្រាប់ការរស់នៅប៉ុណ្ណោះទេ ប៉ុន្តែក៏អាចទីកន្លែងអំណោយផលសម្រាប់ធ្វើអាជីវកម្មផងដែរ។

ទីក្រុងនៅអឺរ៉ុប និងអាមេរិកខាងជើង កំពុងគ្របដណ្តប់លើចំណាត់ថ្នាក់ក្នុងឆ្នាំនេះ ខណៈប្រទេសកំពុងអភិវឌ្ឍក្នុងពិភពលោកជាច្រើន កំពុងពិបាកក្នុងការធ្វើឱ្យទីក្រុងរបស់ខ្លួនមានភាពលេចធ្លោ។ បន្ទាប់ពីធ្វើការវិភាគ និងសិក្សាលើទីក្រុងចំនួន ១៨៣ នៅប្រទេសចំនួន ៩២ រួចមក IESE បានកំណត់អត្តសញ្ញាណទីក្រុងកំពូលទាំង ១០ លើពិភពលោក។ ទីក្រុងទាំងនោះមានដូចជា ទីក្រុងឡុងដ៍ ចក្រភពអង់គ្លេស, ញូវយ៉ក សហរដ្ឋអាមេរិក, ទីក្រុងប៉ារីស ប្រទេសបារាំង, តូក្យូ ប្រទេសជប៉ុន, ទីក្រុងប៊ែកឡាំង ប្រទេសអាល្លឺម៉ង់, ប្រទេសសិង្ហបុរី, ទីក្រុងអូស្លូ ប្រទេសន័រវេស, ទីក្រុងអាំស្ទ័រដាំ ប្រទេសហូឡង់, សាន់ហ្វ្រាន់ស៊ីស្កូ សហរដ្ឋអាមេរិក និងទីក្រុងឈីកាហ្គូ សហរដ្ឋអាមេរិក៕